يراكتىق اسكەريلەر بتۋ اللامي مەن نايەف حرەبيد ءبىر-بىرىن يراكتاعى سوعىستا كەزدەستىردى. 12 جىلدان كەيىن ەكەۋى بىرگە تۇرا باستادى.

2003 جىلى نايەف حرەبيد امەريكالىق اسكەرگە اۋدارماشى بولىپ جۇمىسقا كىردى.

«ءبىز راماداداعى پاتەرگە ورنالاستىرىلدىق. سول ۋاقىتتا ودان جامان جەر بولماعان شىعار. ادام ءولىمى، اتىس، جارىلىس. مەن ۇنەمى وزىمنەن «بۇل جەردە نە ىستەپ ءجۇرمىن؟» دەپ سۇرايتىنمىن. وسىنداي سۇرىقسىز كۇندەردىڭ بىرىندە ءبىر جىگىتتى كوردىم. ونىڭ قارا كوزدەرى وت شاشىپ، كۇلىمدەپ تۇردى. ىشتەي «قانداي سۇيكىمدى جىگىت» دەپ ويلادىم. جان تۇرشىگەرلىك جەردەن عاجايىپتى تاپقانداي بولدىم» دەيدى اسكەري اۋدارماشى.

حرەبيد باسقا ەر ادامداردان وزگەشە ەكەنىن ەشكىمگە ءتىس جارىپ ايتپادى. يراكتا ءبىر جىنىستى نەكەگە قاتاڭ تىيىم سالىنعان. ال قىزتەكەلەر زورلىقتىڭ قۇربانى بولاتىن جاعدايلار ءجيى كەزدەسەدى.    

نايەف حرەبيد سول كەزدەسۋ كەزىندە بتۋ ءاللاميدىڭ دە ونى ۇناتقانىن بىلمەدى.

«مەن دە ءبىرتۇرلى سەزىم بولدى. ءومىر بويى تەك سول ادامدى ىزدەگەندەيمىن. كۇننەن كۇنگە وعان دەگەن سەزىمىم كۇشەيە بەردى» دەيدى اللامي.

جاقىن تانىسۋعا مۇمكىندىك ورتاق وپەراسيا كەزىندە پايدا بولدى. ەكەۋى بىرگە تاماقتانۋعا بارىپ، بىر-بىرىنە دەگەن سەزىمدەرى كۇشەيى تۇسكەن.

ءۇش كۇن وتكەننەن كەيىن حرەبيد پەن اللامي بىر-بىرىنە سەزىمدەرىن ايتتى.

«مەن ونىمەن ەرەكشە جاقىندىقتى بايقادىم. حرەبيد مەنى ءسۇيىپ الدى دا، بىردەن كەتىپ قالدى. وسىدان كەيىن ءۇش كۇن بويى تاماق جەي المادىم» دەيدى اللامي.

سۇراپىل سوعىستاعى ماحاببات

اسكەري لاگەردەگى ەكى جىگىت ۋاقىتتى بىرگە وتكىزە باستادى. مۇنى امەريكاندىق اسكەريلەر دە، يراندىق اسكەريلەر دە بايقادى.

«مەن امەريكاندىق كاپيتانعا بتۋ تۋرالى ايتىپ بەرىپ ەدىم، ونى مەن جۇرگەن امەريكاندىق لاگەرگە ورنالاستىرىپ بەردى. ءبىراق مەنىڭ قىزتەكە ەكەنىمدى باسقا جىگىتتەر بىلگەننەن كەيىن مەنىمەن ارالاسپاي قويدى. ءتىپتى جەرلەسىم ۇلكەن تاياقپەن ۇرىپ، قولىمدى سىندىرعان كەزدەرى دە بولدى» دەيدى اۋدارماشى.

2009 جىلى حرەبيد اقش-تان باسپانا سۇرادى. سەبەبى امەريكاندىقتارمەن ۇزاق جۇمىس ىستەگەننەن كەيىن تۋعان ەلدە قالۋ ءقاۋىپتى بولدى.

حرەبيد بوسقىن ستاتۋسىن الىپ، سيەلەتتە دە تۇراقتادى. الايدا اللاميعا ۆيزا الىپ بەرۋ ارەكەتتەرىنەن تۇك شىقپادى. ءاللاميدىڭ وتباسى ونىڭ قىزتەكە ەكەنىن ءبىلىپ، ونى ايەل الۋعا ماجبۇرلەي باستادى. حرەبيدتىڭ تانىسى، سيەتلداعى شىركەۋدە ۋاعىزشى قىزمەتىن اتقاراتىن مايكل فايل اللاميدىڭ بەيرۋتقا قاشىپ كەتۋىنە كومەكتەستى.

«مۇنداي شەشىم قابىلداۋ ماعان وڭايعا سوقپادى. مەن 25 جىلعى ارميامەن كەلىسىم-شارتقا وتىرعانمىن. سونىمەن قاتار، وتباسىندا تەك مەن عانا جۇمىس ىستەدىم. الايدا حرەبيدپەن بىرگە بولعىم كەلدى» دەيدى اللامي.  

يراكتاعى قىزتەكەلەر

يراكتا ەرەكشە قارىم-قاتىناستاعى ادامدارعا جاۋگەرشىلىك كوزقاراسپەن قارايدى. ولاردى ءولتىرىپ كەتكەن جاعدايلار ءجيى ورىن الادى.  2012 جىلى جۇرگىزىلگەن زەرتتەۋگە سايكەس گوموسەكسۋاليستەردى كوبىنە قۇقىققورعاۋ ورگاندارى قۋدالايدى ەكەن. دايش تەرروريستىك توبىنىڭ ەرەكشە ادامدارعا دەگەن كوزقاراسى وتە قاتال. ونداي ادامداردى بيىك عيماراتتاردان لاقتىرعان جاعدايلار دا بولعان.

اللامي مەن حرەبيد وسى جاعدايلار ءوز باسىندا قايتالانباۋى ءۇشىن قولدارىنان كەلگەنشە تىرىستى.

ەكەۋى كۇندە سكايپ ارقىلى سويلەسىپ وتىرعان. اللامي بىرنەشە مارتە بۇۇ جوعارعى كوميسسارىنىڭ بوسقىندار ءىسى جونىندەگى باسقارماسىنا جۇمىسقا تۇرۋ الدىنداعى سۇحبات جۇرگىزۋگە شاقىرىلدى. الايدا ءار كەزدە ءتۇرلى كەدەرگىلەرگە تاپ بولدى. وسى كەزدە مايكل فايل قايتادان كومەككە كەلدى. اللامي ونى كىندىك اكەم دەپ اتايدى ەكەن.

اللامي 2013 جىلى  كاناداعا جۇمىسقا ورنالاستى. قوس عاشىقتى 225 شاقىرىم جەر ءبولىپ تۇردى. حرەبيد ءار دەمالىستا ماحابباتىنا قوناققا بارىپ تۇردى.

2014 جىلى 14 اقپاندا ەكەۋى كانادادا نەكەسىن تىركەدى. وسىدان كەيىن حرەبيد زاڭدى جۇبايىنا امەريكاندىق ۆيزا بەرۋدى سۇرادى. ءبىر جىلدان كەيىن اقش-تىڭ مونرەالداعى كوشى-قون قىزمەتى قوس عاشىقتى سۇحباتتاسۋعا شاقىردى.

«ۇشاقتا 7 ساعات ۇشتىق. دالادا 27 گرادۋس سۋىق» دەپ ەسكە الادى حرەبيد. «بىزگە ەكى، ءۇش سۇراق قويىپ، 10 مينۋتتان كەيىن بتۋعا «امەريكا قۇراما شتاتىندا تۇرۋعا رۇقسات ەتىلدى» دەپ جاۋاپ بەردى».

«مەن قۋانعاننان ايقايلاپ جىبەرە جازدادىم. شىققاننان كەيىن جىلاپ جىبەردىم. باقىتتان باسىم اينالىپ، تۇلا بويىم دىرىلدەپ كەتتى! ءبىز باسىندا ارمانداعانىمىزداي بىرگە تۇراتىن بولدىق».

2015 جىلى ناۋرىز ايىندا حەربيد پەن اللامي ۆانكۋۆەردەن سيەتلگە اۆتوبۋسپەن كوشتى. ولار نەكەلەرىن رەسمي تۇردە ۆاشينگتوندا تىركەپ، دۇركىرەتىپ توي جاسادى.

«بىرىنشە رەت نەكەمىزدى تىركەگەندە توي جاسامادىق. ال ءبىز ەرتەگىدەي توي جاساۋدى ارماندادىق. بۇل مەنىڭ ومىرىمدەگى ەڭ باقىتتى كۇن بولدى» دەيدى حرەبيد.

ءقازىر ولار سيەتلدە تۇرادى. حرەبيد امەريكاندىق ازاماتتىقتى الىپ، مەنەدجەر بولىپ جەرگىلىكتى كومپانيادا جۇمىس ىستەيدى. اللامي گرينكارتا الدى. بولاشاقتا اقش ازاماتتىعىن الۋى كەرەك. ازىرشە قۇرىلىسشى رەتىندە جۇمىس ىستەيدى.

ولاردىڭ ماحاببات حيكاياسى تۋرالى دەرەكتى فيلم دە ءتۇسىرىلدى. 2016 جىلى لوس-انجەلەس فەستيۆالىندە «يراكتان» ءفيلمىنىڭ پرەمەراسى بولدى.  

«ەندى بىزگە جاسىرىنۋدىڭ قاجەتى جوق. كوشەدە كەلە جاتقاندا مەن ونىڭ قولىنان ۇستاي الامىن» دەيدى حرەبيد.

ونىڭ جۇبايى وتباسىن قۇرىپ، بۇرىنعىداي وزدەرىن قورعانسىز سەزىنبەيتىنىن جەتكىزدى.  

قازاقستاندا ءبىر جىنىستى نەكەگە رۇقسات جوق. قوعام دا تابيعاتقا قارسى كەلگەن ادامداردى قابىلدامايدى. قازاقستانداعى ءداستۇرلى يسلام دىنىندە ءبىر جىنىستىلاردىڭ ماحابباتى ۇلكەن كۇنا بولىپ ەسەپتەلەدى. ماماندار مۇنى پسيحولوگيالىق اۋىتقۋشىلىق ەكەنىن ايتادى. ەڭ سوراقىسى ەلىن، جەرىن قورعاپ، وتباسىن قۇرىپ، ۇرپاق جالعاستىراتىن ەر ازاماتتاردىڭ اراسىندا قىزتەكەلەر كوبەيىپ كەلەدى. تابيعات زاڭىنا مويىنسۇنباعانداردىڭ دۇنيەتانىمىنا ناقتى نە اسەر ەتەتىنىن عالىمدار تابا الماي كەلەدى.  

دەرەككوز: bbc.com