استانادا جۇڭگو دوكەيلەرىنە قىز ىزدەگەن نەكە اگەنتتىگىنىڭ ديرەكتورى قورقىتىپ-ۇركىتۋ مانىندەگى حاتتاردىڭ ءتۇسىپ جاتقانىنا بايلانىستى قۇقىق قورعاۋ ورگاندارىنا ارىز جازدى دەپ حابارلايدى tengrinews.kz. بۇل تۋرالى تولىعىراق ديرەكتور تاتيانا لوگۆينەنكو ايتىپ بەردى.

"قورقىتىپ-ۇركىتۋ دەرەگى بويىنشا بەيبىتشىلىك 19 مەكەنجايىنداعى ىىد-گە ارىز جازدىم"، - دەدى Gimeney نەكە اگەنتتىگىنىڭ ديرەكتورى تاتيانا لوگۆينەنكو.

"ماعان ايەلدەردى ساۋدالاپ جاتسىڭ دەپ ءتيىستى. ال وسى كۇندەرى ءبىز كليەنتتەرىمىزدەن قولداۋ كورىپ وتىرمىز، ولار حابارلاسىپ، كومەك قولىن سوزامىز دەپ جاتىر. نەكە اگەنتتىگىمىزدىڭ نەگىزگى ماقساتى - ادامداردى باقىتتى ەتۋ. ونىڭ ۇلتى قانداي بولاتىنى ماڭىزدى ەمەس. ايەل شەتەلدىككە تۇرمىسقا شىققىسى كەلسە - وعان ەشكىم تىيىم سالا المايدى. باقىتتى بولىپ، بالا سۇيگىسى كەلسە - بۇل ونىڭ جەكە شارۋاسى. بۇل جوبا قازاقتار ءۇشىن ەمەس، قازاقستاندىقتار ءۇشىن. بۇل جوباعا ورىستار دا، بەلورۋستەر دە، ۇيعىرلار دا، تاتار قىزدارى دا قاتىسادى، تەك قازاق قىزدارى ەمەس. قالاعان ادام قاتىسادى"، - دەدى نەكە اگەنتتىگىنىڭ وكىلدەرى.

اگەنتتىكتەگىلەر ەلوردادا كۇيەۋبالا از دەيدى.

"وتكىر ماسەلە بۇل. استانادا ءبىر ەر ادامعا سەگىز قىزدان كەلەدى. ال ەندى ايەلدەرىمىز نە ىستەۋى كەرەك؟ 37-45 جاستاعىلار قايتەدى؟ ولار تۇرمىسقا شىقپاعان، بالا سۇيمەگەن. ال ءبىزدىڭ قوعام 40-تان اسقانداردى قوقىسقا تاستاپ جاتىر. كليەنتتەرىمىز ءار ءتۇرلى، جاستارى 32-دەن 55-كە دەيىن بارادى. قىتايمەن قاتار، باتىس ەۋروپا ەلدەرىنىڭ اگەنتتىكتەرىمەن جۇمىس ىستەيمىز. بۇعان بايلانىستى ەشكىم دە نارازى بولماعان"، - دەدى لوگۆينەنكو.

ايتا كەتەيىك، پروكۋراتۋرانىڭ مالىمەتىنشە، 11 قاڭتاردا شامامەن ساعات 11.30-دا رەسپۋبليكا، 42 مەكەنجايىندا ورنالاسقان "ينديرا ي ك" بيزنەس ورتالىعىنىڭ جەكە تەرريتورياسىندا 20 ادام جينالىپ، GIMENEY اگەنتتىگىنىڭ قىزمەتىنە نارازىلىق بىلدىرگەن. "وسى دەرەك بويىنشا، ىشكى ىستەر ورگاندارى مەن پروكۋراتۋرا قىزمەتكەرلەرى وقيعا ورنىنا باردى. بيزنەس-ورتالىقتىڭ باسشىلىعىنان شاعىم مەن ءوتىنىش تۇسپەگەندىكتەن، قۇقىق قورعاۋ ورگاندارىنىڭ وكىلدەرى الدا بولۋى مۇمكىن زاڭبۇزۋشىلىقتاردىڭ الدىن الۋ بويىنشا شارا جۇرگىزدى"، - دەلىنگەن حابارلامادا.

وقيعا ورنىندا اۋداندىق پروكۋراتۋرا ءتۇسىندىرۋ جۇمىستارىن جۇرگىزگەننەن كەيىن نارازىلىق تانىتۋشىلارعا كومپانيانىڭ كەڭسەسىنە كىرۋ ۇسىنىلعان. ءسويتىپ، اگەنتتىك باسشىسىمەن باسپا ءسوز ءماسليحاتى وتكىزىلدى. ءماسليحات اياقتالعاننان كەيىن جينالعاندار تاراپ كەتكەن.

"استانا اكىمدىگىنە وسى ماسەلە بويىنشا نارازىلىق اكسياسىن ۇيىمداستىرۋ بويىنشا ءوتىنىش كەلىپ تۇسپەگەنىن قوسىمشا حابارلايمىز"، - دەپ اتاپ ءوتتى پروكۋراتۋرا وكىلدەرى.

ەسكە سالايىق، قازاقستاندىقتار بەيجىڭنەن كەلەدى دەلىنگەن دوكەي قىتايلارعا قازاقستاندىق قالىڭدىقتاردى جيناۋ تۋرالى حابارلاندىرۋعا نارازى بولعان ەدى. وسىنداي مازمۇنداعى حابارلاما Facebook الەۋمەتتىك جەلىسىندەگى "دوسكا وبياۆلەنيي الماتى، استانا" پابليگىندە جاريالانعان. حابارلامادا بەيجىڭنەن كەلگەن دوكەي جىگىتتەر توبى قازاقستاندىق قىزدار مەن شىنايى قارىم-قاتىناس قۇرۋ ءۇشىن كەلە جاتقانى ايتىلادى.