كەيبىر ايتقىشتاردىڭ سوزدەرىنە قاراساق اناۋ دا ءسالافي، مىناۋ دا ءسالافي. قىڭىر سويلەپ، قيسىق باسقاننىڭ ءبارى ءسالافي. ساقال قويىپ، بالاعىن قىسقارتقان تۇگەل ءسالافي. ءانشى دە، كۇيشى دە، بيدعاتشى مەن حاۋاريج دە ءسالافي. بۇل نە قىلعان قويىرتپاق؟!

راس، بۇرىنىرىقتا ءبىز دە بۇل شىم-شىتىرىقتى تۇسىنبەيتىنبىز. سوسىن بىرەسە اناعان جاقتاسىپ، بىرەسە مىنانى ءجون دەپ كۇلكى بولاتىنبىز. سوسىن، بۇلاي اقىماق بولعانشا، ەلگە ساۋاتسىز ءسوز سويلەپ كۇنا ارقالاعانشا عالىمداردى تىڭداپ ءبىلىمىمىزدى كوتەرۋدى ءجون كوردىك. شامامىز كەلگەنشە ءدىن ۋاعىزداپ جۇرگەندەردىڭ ءبارىن وقىدىق، تىڭدادىق، كوردىك، ارالاستىق، سالىستىردىق. سوڭىندا اقيقاتقا كوزىمىز جەتتى. سەبەبى، وتىرىك قاشان دا اشىلىپ، اقيقات ۇستەمدىك ەتەدى ەكەن. سول ءوزىمىز تانىپ-بىلگەندى قىسقاشا سىزدەردىڭ دە نازارىڭىزعا ۇسىنۋدى ءجون كوردىك. مۇنى ءتىپتى، ۇزاق جىلعا سوزىلعان جۋرناليستىك زەرتتەۋىمىزدەن ءبىر ۇزىك دەسەك تە بولادى. بالكىم، عايباتتان ساقتانىپ، جالا مەن وسەكتىڭ كۇناسىنەن الىس جۇرۋىڭىزگە ءبىر كومەك بولار دەپ ويلادىق.

سونىمەن، ءسالافيدى باسقادان قالاي اجىراتامىز؟ ەڭ الدىمەن ءوز سوزىنە قاراپ. مىسالى، مۇحامەدجان تازابەكوۆ ارنايى سۇقبات بەرىپ، بەكبولات تىلەۋحان ەكەۋىنىڭ ەشقانداي ءسالافي ەمەس ەكەنىن مالىمدەگەن. وعان سەنبەۋگە قانداي قاقىڭىز بار؟ ءسوزىن امالىمەن دالەلدەپ، ءوزى باسقاراتىن "اسىل ارنا" تەلەارناسىندا قمدب ۇستاناتىن ماتۋرۋديلدىكتى، سوپىلىق تۇسىنىكتەردى ناسيحاتتايتىنى سىزگە جەتكىلىكسىز بە؟ ال، بەكبولات تىلەۋحان، مىنە، استانا تورىندە دۇركىرەتىپ كونسەرت بەرەيىن دەپ جاتىر. مۋزىكانى سالافيلەر حارام دەيدى. بۇل سىزگە دالەل ەمەس پە؟ ال، كەيبىرىڭىز سوندا دا بولماي ەكەۋىنە "سالافيسىڭدەر، مويىنداڭدار" دەپ جالا جاۋىپ قويماي جۇرسىزدەر.

ەكىنشى، امالىنا قاراپ ايىرامىز. تاۋحيد ۇستانۋعا (ءبىرقۇدايشىلدىق، تەك قانا اللاھقا قۇلشىلىق ەتۋ) قارسى شيرك (اللاھقا سەرىك قوسۋ، كوپقۇدايشىلدىق) تۇرادى. ال، احليۋ-سۋنناعا (پايعامبارىمىز ساللالاھۋ عالەيكۋ ۋاسسالامنىڭ سۇننەتىن ۇستانۋ) قارسى احليۋ-بيدعا (دىنگە كەيىن قوسىلعان جاڭالىقتاردى ۇستانۋ) تۇرادى. كوپشىلىگىمىز بىلمەي ءسالافي دەپ جۇرگەن ادامدار وسى احليۋ-بيدعا قاۋىمىنان. 

ەندى ءسال تۇسىندىرە كەتەيىك. نەگىزى يسلام دىنىنەن اۋەلى ءبولىنىپ شىققان قاۋىم شيىتتەر بولاتىن. سوندىقتان، مۇسىلماندار اۋەلدە سۇننيتتەر مەن شيىتتەر (شيعالار) بولىپ بولىنگەن. كەيىن سۋننيتتەردىڭ ءوزى ىشىنەن تالاي اعىمعا ءبولىندى. الايدا، يسلام بىرەۋ عانا. ونى ۇستانعاندار جۇرەتىن جول - قۇران مەن پايعامباردىڭ سۇننەتى. ال، ەندى بولىنگەندەر وزدەرىن ءبارىبىر احليۋ-سۋننامىز دەپ اتاپ كەلەدى. ءبىراق، امالدارىندا جاڭالىق كوپ بولادى. مىسالى، ءاشعاري-ماتۋرۋدي اعىمىن ۇستاناتىندار وزدەرىن احليۋ-سۋننا ءۋال-جاماعاتپىز، ءابۋ حانيفا مازحابىن ۇستاناتىن، ءبىراق (!) ءاشعاري-ماتۋرۋدي احيداسىمەن جۇرەتىن، ءوزىمىزدىڭ ءداستۇرلى (!) يسلامداعى قاۋىمبىز دەيدى. ءسويتىپ، پايعامبارىمىز ساللالاھۋ عالەيكۋ ۋاسسالام ۇيرەتپەگەن، ساحابالار مەن تابيعيندار سەكىلدى ىلگەرىدەگى ىزگىلەر - ءسالافتار جاساماعان (ءسالافي - ءسالافتاردىڭ احيداسىمەن، سەنىمىمەن جۇرۋشىلەر؛ ي - ءسوز تۋدىرۋشى جۇرناق) امالداردى جاسايدى. ول امالدار بيدعات دەپ اتالادى جانە شيركتەن كەيىن تۇراتىن ۇلكەن كۇنا سانالادى. سەبەبى، دىنگە جاڭالىق قوسۋ - ونى بىزگە جىبەرگەن اللاھ پەن بىزگە جەتكىزگەن ونىڭ ەلشىسىندە كەمشىلىك بار، ۇيرەتۋدى ۇمىتىپ كەتكەن، سول كەمشىلىكتىڭ ورىنىن ءوزىمىز تولتىرىپ جاتىرمىز دەگەن ءسوز. سالافيلەر وسىلاي تۇسىنەدى، بيدعاتتان قاشادى جانە ونى جاساۋشىلاردى احليۋ-بيدعا (بيدعات يەلەرىنىڭ ارتىنان ەرۋشىلەر) دەپ اتايدى.

ءجا، ەندى بۇل بيدعات يەلەرى سالافيلەردىڭ جاۋى ما؟ بۇلاردى سالافيلەر اداسىپ جۇرگەن باۋىرلارىمىز دەپ سانايدى، ناسيحات قىلادى. اللاھ بۇيىرعانداي ءال-ۋالا ءۋال-بارا (اللاھ ريزاشىلىعى ءۇشىن جەك كورىپ، اللاھ ريزاشىلىعى ءۇشىن جاقسى كورۋ) سەنىمىن تانىتادى. ياعني، مۇسىلمان باۋىرىم دەپ جاقسى كورىپ، جاناشىرلىق تانىتادى، ءبىراق، بيدعات امالدارىن جەك كورىپ، ولاردى قالدىرۋدى ناسيحات ەتەدى، ەسكەرتەدى. جاماعاتتى اداستىرىپ جۇرگەن ۋاعىزشىلاردىڭ كەمشىلىگىن، بەتپەردەسىن اشىپ كورسەتەدى. ءبىراق ءبىلىمسىز، دالەسىز سويلەمەيدى.

كەز-كەلگەن مەملەكەتكە سالافيلەر ەمەس، تاكفىرشىلەر مەن حاۋاريجدەر ءقاۋىپتى. بۇلاردى ءدىن دۇشپاندارى ادەيى سالافيلەردىڭ قاتارىنا قوسىپ، "راديكالدى سالافيلەر" دەپ اتايدى. شىن مانىندە ءسالافيا بولىنبەيدى. ءبىراق، بىلايعى جۇرت احليۋ-سۋننا جاۋلارىنىڭ وتىرىگىنە سەنىپ قالادى. سەبەبى، تاكفىرشىلەر مەن حاۋاريجدەردى سىرتقى كەلبەتىنە قاراپ سالافيلەردەن ايىرۋ قيىن. ولار دا سۇننەتكە ساي ساقال قويادى، بالاقتارىن قىسقارتىپ، وزگە دە سۇننەتتەردى ۇستانادى. ولاردى تەك سەنىمىنە قاراي ايىرامىز. ەڭ باستىسى، ولار انانى دا كاپىر، مىنانى دا كاپىر دەپ تاكفىر شىعارىپ تاستايدى. ءتىپتى، اتا-اناسىن دا كاپىر دەپ، ارالاسپاي قويادى. تۇستەرى سۋىق، قاباقتارى قاتۋ. سالقىن امانداسادى، وزىنە بەلگىلى ءبىر يممۋنيتەت جاساپ العان. بۇلار كەزىندە حاليل (حاۋاريجدىگى ءۇشىن ۇزاق جىلعا سوتتالىپ ساۋد ارابياسىنىڭ تۇرمسەسىندە وتىر)، رينات دەگەن ۋاعىزشىلاردىڭ ەككەن داندەرى. تۇگەسىلىپ بىتپەي جاتىر. ۆيرۋس تەز تاراپ، ارەڭ جويىلادى قاشاندا. ەگەر سىرتقى كەلبەتى سالافيگە ۇقسايتىن بىرەۋ "پاتشامىز كاپىر، اناۋ كاپىر، مىناۋ كاپىر" دەپ تۇرسا، ول ءسالافي ەمەس، تاكفىرشى بولعانى. ال، ەگەر ول پاتشاعا باعىنبايتىن، وعان قارسى شىعۋدى كۇنا سانامايتىن بولسا - وندا ناعىز حاۋاريج بولعانى. سالافيلەر مۇندايلاردى قولىنان جەتەكتەپ قۇزىرلى ورىندارعا تاپسىرادى. سەبەبى، فاناتيكتەر مەملەكەتكە اسا ءقاۋىپتى.

حاۋاريج بۇلىكشىلەر جينالىپ جالعان جيھاد جۇرگىزىپ جاتقان سيرياعا اتتانعان قازاقستاندىقتاردىڭ ىشىندە بىردە-بىر ءسالافي جوق. ونى ۇقك دا، باسقالار دا ايتىپ بەرە الادى. كەتكەندەر نەگىزىنەن  تاكفىرشى ۋاعىزشىلاردى تىڭداعان اداسقان جاستار. ءقازىر قۇقىق قورعاۋ ورىندارى ول ۋاعىزشىلاردى قاتتى شەكتەپ، الدىن قاماپ تاستاعان. بۇلاردىڭ ول جاقتاعى سوعىستى جيھاد دەپ ساناۋىنا سەبەپ بولعان ويدان شىعارىلعان  تۇسىنىك مىناۋ: قازاقستان مۇسىلمان ەلى بولعانمەن شاريعاتپەن جۇرمەيدى، سوندىقتان پاتشانىڭ بۇيرىعىن كۇتپەي كاپىرمەن سوعىسقا اتتانۋ - جيھاد. بۇل قاتە تۇسىنىك، بيدعات امالدان دەيدى ءسالافي عالىمدار. سەبەبى، پايعامبارىمىز ساللالاھۋ عالەيكۋ ۋاسسالام مەن ءسالافتاردىڭ زامانىندا بۇكىل دۇنيە جۇزىندەگى مەملەكەتتەر ەكىگە عانا بولىنگەن: مۇسىلمان جانە كاپىر. ءۇشىنشى ۇعىم بولماعان. ەلدىڭ مۇسىلمان ەكەنىن شاقىرىلعان ازاننىڭ داۋىسىنا قاراپ ايىراتىن. كەيىن حريستيان، مۇشىرىك مەملەكەتتەردە دە مەشىت سالىنىپ، ازان شاقىرىلىپ جاتقاندىقتان احليۋ-سۋننا عالىمدارى شاريعاتتاعى ەكىنشى شارتتى العا تارتتى. ول حالىقتىڭ سانىنا قاراپ ايىرۋ. ەگەر مۇسىلماندارى كوپ بولسا - مۇسىلمان مەملەكەتى، كاپىرلەرى كوپ بولسا - كاپىر مەملەكەتى. بولدى، ءۇشىنشى تۇسىنىك جوق. قازاقستان نەگىزگى حالقى مۇسىلمان، مۇسىلماندارى كوپ ەل، دەمەك - مۇسىلمان مەملەكەتى. ال پاتشامىز كىم بولسا دا باعىنۋىمىز شارت. ونىڭ بۇيرىعىنسىز، اتا-اناڭىزدىڭ رۇقساتىنسىز ەشقانداي جيھاد جاساي المايسىز. مىنە، كوپ جاستار وسى تۇستان قاتەلەسكەن. ولاردىڭ كەيبىرەۋى ءتىپتى وزدەرىن ءسالافيمىز دەپ سەنگەن. سەبەبى، ولار ۋاعىزىن تىڭداعان حاۋاريج عالىمدار سىرتقى كەلبەتىمەن سالافيلەرگە ۇقساعان تاقياشىلار (شىن كەلبەتىن جاسىرۋشىلار) ەدى. وندايلار ءالى دە بار. ولاردى تىڭدايتىندار ەلىمىزدى، پاتشامىزدى، حالقىمىزدى كۇپىرگە شىعارىپ، كاپىر اتاپ جۇرەدى. وندايلار ءسالافي ەمەس، ساق بولىڭىز ولاردان.

سالافيلەر سالت-داستۇرگە قارسى ما؟ بۇل - جالا. ەجەلدەن يسلامدى ۇستانعان قازاق حالقىنىڭ ءسالت-داستۇرى دىنمەن بىتە قايناسقان. ۇلكەنگە قۇرمەت، كىشىگە ىزەت كورسەتۋدەن باستالاتىن نەبىر قۇندىلىقتار ءوز نەگىزىن قۇران مەن سۇننەتتەن الادى. سالافيلەر داستۇرگە ەمەس، ىرىمعا (كىشى شيرك)، جالعان سەنىمگە قارسى. ىرىم - الدەبىر نارسەنى جاقسىلىق نەمەسە جاماندىق اكەلەدى دەپ سەنۋ. مىسالى، بوساعانى مايلاۋ - بايلىققا باستايدى دەپ نانۋ، وتقا ماي قۇيۋ جاماندىقتان ساقتايدى دەپ سەنۋ. بۇلار ءسالت-داستۇر ەمەس، ىرىم. ءسالت-داستۇر - تۇرمىس-تىرشىلىگىڭنەن كورىنەدى، ىرىم - سەنىمىڭنەن بايقالادى. مۇنى ءتۇسىنۋدىڭ تۇك تە قيىندىعى جوق دەپ ويلايمىز. ەگەر ءوزىن ءسالافيمىن دەپ جۇرگەy بىرەۋ ىرىمدارعا سەنسە، وندا وتىرىكشى بولعانى، ياعني، ول ءسالافي ەمەس. ال ەگەر ول اتا-اناسىن سىيلامايتىن، كوركەم مىنەزدەن ادا بىرەۋ بولسا، ءسالافي سەنىمىن ءتۇسىنىپ ۇستاپ جۇرگەنىنەن كۇماندانۋعا بولادى. ويتكەنى، اتا-اناعا قۇرمەت كورسەتۋ مۇسىلماننىڭ ەڭ ۇلكەن پارىزدارىنىڭ ءبىرى.

سالافيلەر باسشىعا باعىنباي ما؟ بۇل ەندى ۇلكەن ماسەلە. مەملەكەتتەگى وزگە ازاماتتارعا قاراعاندا پاتشاعا ەشبىر جاعىنباي، تابىنباي، ودان ءبىر جاقسىلىق كورسەم دەگەن دۇنيەلىك ەسەپتى ۇستانباي، الدەبىر لاۋازىم ۇسىنا ما دەگەن ۇمىتكە ەرمەي، شاريعاتقا جانە سۇننەتكە ساي قالتقىسىز باعىناتىن ءارى كەز كەلگەن مەملەكەتكە قارسى بۇلىككە سوققى بەرۋگە ءبىرىنشى بولىپ دايىن تۇراتىن سالافيلەر دەسەك ارتىق ەمەس. سەبەبى، مۇسىلمانداردان اللاھ سونى تالاپ ەتەدى. باسشىعا باعىنۋ شارت دەپ قويىپ، ەرتەلى-كەش پاتشانى جاماندايتىنداردى دىنىمىزدە مۇنافىقتار، ەكىجۇزدىلەر دەيدى. ءسال سەبەپ تابىلسا پاتشانى كوپىرتىپ ماقتايىنداردى جاعىمپاز دەيدى. ال، سالافيلەر باسشىعا باعىنبايدى دەگەن اڭگىمەنى شىعارىپ جۇرگەن قمدب-نىڭ (زاڭ بويىنشا ءمۇفتياتتىڭ قوعامدىق بىرلەستىك ەكەنىن ايتا كەتكەن ءجون) ءماتۋرۋديشى ۋاعىزشىلارى مەن يمامدارى بولىپ تابىلادى. ولار ايتىپ وتىرعان باسشى پرەزيدەنت نازاربايەۆ ەمەس، وزدەرى. باسشىعا، ياعني، يمامعا باعىنبايدى دەپ وزدەرى جاساپ جاتقان بيدعات امالدارىنا قوسىلماعان مۇسىلمانداردى ايىپتايدى. مۇسىلمان ادام يمامعا باعىنبايدى، وعان ۇييدى. ارتىندا تۇرىپ ناماز وقيدى. ناماز "اللاھۋ اكبار" دەگەن تاكفىرمەن باستالىپ، سالەم بەرۋمەن اياقتالاتىن قۇلشىلىق. سالەمنەن كەيىن سەنىڭ يمامعا ۇيۋ پارىزىڭ اياقتالدى. ال كەيبىر يمامدار نامازدان كەيىن دە جاماعاتتىڭ وزدەرىنە باعىنىپ، بىرگە وتىرىپ بيدعات امالدار جاساپ، ءتىپتى، بىلايعى كەزدە دە الدىن كەسىپ وتپەي، بۇيرىقتارىن ەكى ەتپەۋىن قالايدى. ونى ىستەمەگەندەردى باسشىعا باعىنبايدى دەپ جاماندايدى. شىن مانىندە بۇل شيىتتەردىڭ ءتاسىلى. ولاردا مەملەكەتتى باسقاراتىن پرەزيدەنتى جانە رۋحاني كوسەمدەرى - اياتوللالارى بار: بيلىك بولىنگەن. پرەزيدەنت اياتوللاسىز اۋىزىن اشا المايدى. مىنە، احليۋ-سۋننادان ىرگە اجىراتقان كەز كەلگەن اعىمنىڭ نەگىزگى ماقساتى وسى - بيلىككە جەتۋ، كوسەم بولۋ. سوندىقتان ءدىن اتىن جامىلىپ جاماعاتتى وزدەرىنە قالقىسىز باعىندىرعىسى كەلەدى.

سالافيلەر كىمدى تىڭدايدى؟ ولار پايعامبارىمىز سالاللاھۋ عالەيكي ۋاسسالامنىڭ مۇراگەرى - عالىمداردى تىڭدايدى. عالىمدار بولعاندا دا "نۇر-مۇباراك" سەكىلدى اناۋ-مىناۋ ۋنيۆەرسيتەتتە 4-5 جىل وقىپ كەلگەن ءارى اداسىپ اعىمداردا جۇرگەن جالعان عالىمداردى ەمەس، سيلسيلياعا ىلىنگەن ناعىز عالىمداردى تىڭدايدى. سيلسيليا دەگەن نە؟ بۇل - پايعامبارىمىز سالاللاھۋ عالەيكي ۋاسسالامعا بارىپ تىرەلەتىن التىن شىنجىر، تىزبەك. پايعامبارىمىز ءبىلىمدى ساحابالارعا ۇيرەتكەن، ساحابالار تابيعيندەرگە، تابيعيندەر تابا-تابيعيندەرگە ۇيرەتكەن. ولاردان ءبىلىم العان عالىمداردىڭ تىزبەگى ەش ۇزىلگەن ەمەس. عالىم اتانۋ ءۇشىن سيلسيلياداعى شەيحتىڭ الدىندا 30-40 جىل وتىرادى. وزىنە دەيىنگى عالىمداردىڭ بارلىق ەڭبەكتەرىن وقيدى. ءسويتىپ، ەگدە تارتقان شاعىندا ناعىز عالىم اتانىپ ءپاتۋا بەرە الادى. مۇنداي عالىمدار ءقازىر دە بار. قۇدايعا شۇكىر ولاردىڭ الدىن كورىپ، ءبىلىم الىپ جۇرگەن وتانداستارىمىز دا از ەمەس. بۇلاردى توليبتار، شاكىرتتەر دەيدى. ولار ءوز بەتتەرىمەن ءپاتۋا شىعارا المايدى، ءبىراق، وزدەرىنە دەيىنگى عالىمداردىڭ، ۇستازىنىڭ ەڭبەگىنە سۇيەنىپ ۋاعىز ايتادى، ءتاۋحيدتى تاراتىپ ناسيحات ەتەدى. ال، اندا-مىندا 4-5 جىل وقىپ كەلىپ عالىم، ۇستاز، عۇلاما، شەيح اتانىپ جۇرگەندەر احليۋ-بيدعا قاۋىمىنان بولىپ تابىلادى.

ءسالافي بولۋ وڭاي ما؟ ول ءسىز بەن ءبىز ويلاعانداي وڭاي نارسە ەمەس ەكەن. ءارى ءبىلىم ىزدەنىپ، شيرك پەن بيدعاتتان ساقتانىپ جۇرسەڭ قيىن تۇگى دە جوق. ەڭ باستىسى قۇراندا ايتىلعانداي پايعامبارىمىزدىڭ ۇسىنعانىن الىپ، تىيعانىنان تىيىلۋ دەيدى عالىمدار. ياعني، سۇننەتپەن ءجۇرۋ. ول كەز كەلگەننىڭ قولىنان كەلمەيدى. سەبەبى، كوپتەگەن مۇسىلمان باۋىرلارىمىز وزدەرى سۇننەتكە كەلمەك تۇگىلى، سۇننەت ۇستانعانداردى جاۋ سانايدى. ال، ەگەر بىرەۋ سۇننەت ۇستانىپ جۇرسە وعان تاڭىرقاپ، سونىڭ عانا ارتىنان ەرۋگە تاعى بولمايدى. سەبەبى، عالىمدار بىرەۋدىڭ سۇننەتكە كەلگەنىنە ەمەس، سۇنەتتە ولگەنىنە تاڭعالۋ كەرەك دەيدى ەكەن. اقىرەتىن دۇنيەگە ايىرباستاعان كۇنى ادام جولدان تايىپ كەتەدى. بۇگىن سۇننەت ۇستانىپ، ساقال ءوسىرىپ، بالاعىن قىسقارتىپ جۇرگەندەر، كۇنى ەرتەڭ قىرما ساقال ءسانقوي بيدعاتشى بولىپ شىعا كەلۋى ابدەن مۇمكىن. سوندىقتان، سالافيلەر يسلامدى ىلگەرىدەگى ىزگىلەر - ءسالافتار قالاي تۇسىنگەن بولسا، سولاي ءتۇسىنىپ، تەك پايعامباردىڭ ارتىنان ەرەدى. سوندىقتان وزدەرىنە ەرمەگەندەرى ءۇشىن احليۋ-بيدعا قاۋىمى ولاردى جەك كورەدى، عايباتتايدى، حالىققا جامان كەلبەتتە كورسەتۋگە تىرىسادى ەكەن.

سالافيلەردىڭ ەشبىر لاڭكەستىك وقيعالارعا، تەرروريزمگە قاتىسى جوق. بارلىعىن جاسايتىن حاۋاريجدەر مەن تاكفىرشىلەر. ەلىمىزدە ورىن العان ءبىرقاتار قاندى وقيعالاردى سالافيلەر جاسادى دەپ جالا جابىلعانىمەن، ۋاقىت وتە كەلە وتىرىكتىڭ بەتى اشىلدى. ونى وزدەرىڭىز دە جاقسى بىلەسىزدەر. كەڭەس زامانىندا بىرەۋدى تۇتقىنداعاندا وعان نەگىزىنەن تىڭشىنىڭ، ساتقىننىڭ بەلگىلەرى تابىلدى دەپ ايىپ تاعاتىن، توقسانىنشى جىلدارى قىلمىسكەردى ۇستاعاندا قالتاسىنان ەسىرتكى، قارۋ تابىلدى دەپ جاتاتىن، ءقازىر كۇشتىك قۇرىلىمدار قىلمىسكەردى ۇستاسا ودان ءدىني ادەبيەت تابىلدى، ەكسترەميست ءسالافي ەكەن دەپ ايىپ تاعادى. بۇل دا وتەر، كەتەر. سەبەبى، وتىرىك ۇزاق ءومىر سۇرە المايدى.

سوندىقتان، اناۋ تەررورشى ءسالافي ەكەن، مىناۋ قىلمىسكەر ءسالافي ەكەن دەگەن جەل سوزگە ەرە بەرمەڭىزدەر جانە ءسالافتارعا ءتىل تيگىزىپ كۇنا ارقالاماڭىزدار. قيامەتتە بارلىق ءسالاف ەمەس، ءبىر عانا ءسالافتىڭ، ماسەلەن، جالعىز ساحابانىڭ  اقىسىن بەرۋگە شاماڭىز كەلە مە، ويلانىڭىز. ناعىز ءسالافي ءوزىن كەلبەتىمەن، امالىمەن، سوزىمەن تانىتادى. ول ءوزىن جاسىرمايدى. سەبەبى، ول ۇرى، قاراقشى، قىلمىسكەر ەمەس. ەلدى بۇزعان بۇلىكشى ەمەس. كوزى اشىق، كوكىرەگى وياۋ باۋىرلارىمىز جاقسى بىلەتىن ءبىر اقيقات بار - باق-تا، الەۋمەتتىك جەلىدە، ينتەرنەتتە ءبىرىن-بىرى جامانداپ، ءبىر-بىرىنىڭ قوياسىن اقتارىپ جۇرگەن تەك قانا بيدعات يەلەرى. مۇنداي داۋلارعا سالافيلەر ارالاسپايدى. ولار ءبىلىمسىز، دالەلسىز سويلەمەيدى. داۋكەسپەن ءسوز تالاستىرمايدى. تۇسىنگەنگە ەسكەرتەدى ەكەن.

اۆتور: اردابەك سولداتباي

شىن-اقپارات