الماتىنىڭ حالىققا قىزمەت كورسەتۋ ورتالىعىنا ۋاقىتشا تىركەۋگە كەلىپ كوز جۇمعان ازاماتتىڭ وتباسىنا مەملەكەت تاراپىنان ەشقانداي كومەك كورسەتىلمەگەن دەپ حابارلايدى 31.kz. ءتىپتى، رەسمي ورىنداردان ءبىر دە ءبىر جان وتباسىنا كەلىپ كوڭىل ايتپاپتى. ارتىندا ەكى بالاسى مەن جارى قالعان مارقۇمنىڭ تۋىستارى كەشە عانا ونى جەر قوينىنا تاپسىردى.

ۋاقىتشا تىركەۋگە كەلىپ كەزەكتە تۇرعان جاراس نۇركەباي ۇلى قايتىس بولاردان بەس مينۋت بۇرىن ايەلىنە حابارلاسىپتى. باسى اۋىرىپ، ءوزىن جايسىز سەزىنگەنىن ايتىپ ۇيگە قايتپاق بولعان. جارى ىنجۋگۇل "ۋاقىتشا تىركەۋگە اسىقپاي-اق بارارمىز" دەسە، "ايىپپۇل سالسا تولەۋ قيىن بولار، تەزىرەك تىركەلەيىك" دەپ ورتالىققا ەرتە بارعان ەكەن. دارىگەرلەر ايتقان ەپيلەپسيا سىرقاتىمەن اۋىرماعان، ساپ-ساۋ ازامات ەدى دەيدى جاقىندارى. 

نۇركەباي قونقاقوۆ، مارقۇمنىڭ اكەسى:

- ەشقانداي اۋرۋى جوق ەدى. اياعىنان تىك باردى عوي. اۋىرعان جوق، ۋچەتتا جوق، زدوروۆىي جىگىت ەدى. ءىرى.

ىنجۋگۇل كاليمبەتوۆا، مارقۇمنىڭ جارى:

- ەشقانداي اۋرۋى جوق، بۇدان 4-5 جىل بۇرىن گرىجا بولعان ومىرتقاسىنان، ءبىراق ەمدەلىپ جاقسى بولىپ كەتكەن. اۋىر جۇمىس ىستەمەيتىن، ءقازىر وحرانيك بولىپ جۇمىس ىستەيتىن.

ازعانتاي ايلىعىن ايىپپۇلعا بەرۋگە قورىققان ازامات ءوز اكەسىنىڭ ۇيىنە تىركەۋگە تۇرماق بولعان. ۇلكەن ۇيگە جاپسارلاس سالىنعان وسى شاعىن باسپانادا وتباسىمەن كۇن كەشكەن ەكەن. ءوز قولىندا جان تاپسىرعان ۇلىنىڭ ولىمىنە 80-دەگى قاريا زاڭ شىعارۋشىلاردى، جاعداي جاسالماعان تىرەۋ ورتالىعىن كىنالايدى.

نۇركەباي قونقاقوۆ، مارقۇمنىڭ اكەسى:

- البەتتە، كىنالايمىز. قوعام حالىققا قىزمەت ىستەۋ كەرەك قوي. ادال قىزمەت ىستەۋ كەرەك، حالىقتىڭ جاعدايىن ويلاۋ كەرەك، حالىقپەن كەڭەسۋ كەرەك. بىردەن زاڭ شىعارىپ، ۇيات قوي بۇل. قىلمىس قوي بۇل، اينالايىندار-اۋ!  

"ۇلىمنىڭ قازاسىنا كىم جاۋاپ بەرەدى" دەگەن قاريا بيلىك وكىلدەرىنىڭ ەش نازار سالماعانىنا كۇيىنەدى. 80 جاستاعى نۇركەباي اقساقال اكەسىز قالعان ەكى نەمەرەسىن قامقورلىعىنا الىپتى. "تىركەۋگە كەلىپ جان تاپسىرعاندار وتباسىنا كومەك بولادى ما" دەگەن ساۋالىمىزعا رەسپۋبليكالىق "ازاماتتارعا ارنالعان ۇكىمەت" كورپوراسياسى رەسمي جاۋاپ بەرۋدەن باس تارتتى.

جاراس نيازبەك، ءتىلشى:

- حالىققا قىزمەت كورسەتۋ ورتالىعىنا كەلىپ قايتىس بولعان ازاماتتاردىڭ وتباسىنا قانداي دا ءبىر كومەك كورسەتۋ جوسپاردا جوق دەگەندى "ازاماتتارعا ارنالعان ۇكىمەت" مەكەمەسىنىڭ وكىلدەرى تەلەفون ارقىلى ايتتى. ۋاقىتشا تىركەۋگە اسىققان ادامداردىڭ قاراسى ءالى دە قالىڭ. ءدال وسى جاعدايعا بايلانىستى "ۇيىندە دە ول ادام ولەر دەيسىز، ۇيدە ءولۋ ارمان عوي، ءۇيىڭ بولسا" دەگەن تورعايلىق اقىننىڭ ولەڭ جولدارى ەل اراسىندا كەڭ تارالۋدا.