ەسىرتكى ساتتى دەگەن ايىپپەن جۇڭگو حالىق رەسپۋبليكاسىنىڭ تۇرمەسىندە وتىرعان قازاقستان ازاماتشاسى اقجارقىن تۇرلىباي ءقازىر جۇڭگو تۇرمەسىندە جۇمىس ىستەپ ءجۇر، دەپ حابارلايدى «قازاقپارات» حاا-نىڭ قحر-داعى مەنشىكتى ءتىلشىسى.

«اقجارقىن تەرگەۋ اباقتىسىندا بىررەتتىك پاكەتتەرگە قولعاپتار مەن باسقا دا بۇيىمداردى سالىپ، قاپتايدى. اقجارقىن كۇندە جۇڭگو تەلەديدارى ارقىلى جاڭالىقتاردى تىڭداي الادى (كۇنىنە 1-1،5 ساعات تەلەديدار كورۋگە رۇقسات ەتىلگەن - اگەنتتىك). اقجارقىن كەلەسى جولى وتباسىمەن بىرگە تۇسكەن سۋرەتتەرىن بەرىپ جىبەرۋدى ءوتىندى. كوزىلدىرىك ماسەلەسىن شەشىپ بەردىك. بۇرىن ونىڭ كامەراسىندا ىستىق سۋ بولماعان، ءقازىر بۇل ماسەلە دە شەشىلگەن»، - دەدى قازاقپارات تىلشىسىمەن اڭگىمەلەسكەن قحر-داعى قازاقستان ەلشىلىگىنىڭ كونسۋلدىق ءبولىم جەتەكشىسى بولات سىرلىبايەۆ.

ديپلومات بۇگىن گۋانچجوۋداعى تەرگەۋ يزولياتورىندا اقجارقىنمەن كەزدەسىپ، 40 مينۋتتاي اڭگىمەلەسىپ قايتتى.

ب.سىرلىبايەۆتىڭ ايتۋىنشا، ءقازىر اقجارقىننىڭ كوڭىل-كۇيى جاقسى. كەلەسى - مەرەكەلىك اپتادا اقجارقىن جۇمىسقا تارتىلمايدى جانە 16 اداممەن بىرگە كامەراسىندا دەمالادى.

ديپلومات اقجارقىندى اقپان ايىنداعى تۋعان كۇنىمەن قۇتتىقتاپ، كارتوچكاسىنا ازداپ اقشا سالىپ بەردى. اقپان ايىندا اقجارقىن 23 جاسقا تولادى.

ديپلومات بۇگىن سونداي-اق، گۋانچجوۋ قالاسىندا ۇستالعان قازاقستاندىق تاعى بىرنەشە ازاماتپەن كەزدەسەدى.

ب.سىرلىبايەۆ قازاقستاندىق قورعاۋشى سۇڭقار نۇرماعامبەتوۆتىڭ اقجارقىننىڭ سوتى 27-28 اقپان كۇنى وتەدى دەگەن مالىمەتتى  راستاعان جوق.

ەسكە سالا كەتەيىك، اقجارقىن تۇرلىباي 2014 جىلدىڭ ناۋرىز ايىندا گۋانچجوۋ اۋەجايىندا 4،5 كەلى ەسىرتكىمەن ۇستالعان بولاتىن.

ول مالايزياعا ءساندى كيىمدەردىڭ كۋرەرى بولىپ جۇمىس جاساۋعا اتتانعانىن ايتىپ كەتكەن. قىزدىڭ ءوزى ەسىرتكىنى وعان ارانداتۋشىلار سالىپ جىبەرگەنىنە سەنىمدى.

بۇل ىسكە قاتىستى جۇڭگو سوتى اۋىر جازا تاعايىنداپ، ونى ءومىر بويى باس بوستاندىعىنان ايىرعان بولاتىن.

الايدا كەيىن، ەسىرتكى، پسيحوتروپتى زاتتاردىڭ زاڭسىز اينالىمىمەن كۇرەس ورتالىق ازيالىق ايماقتىق ورتالىعى جاس قىز نيگەريالىق ەسىرتكى مافياسىنىڭ قۇربانى بولۋى مۇمكىن ەكەنىن ايتقان.

2016 جىلدىڭ 7 ساۋىرىندە اپەللياسيالىق سوت ساتىسى اقجارقىن تۇرلىبايدى ءومىر بويىنا باس بوستاندىعىنان ايىرعان سوت ۇكىمىنىڭ زاڭدى كۇشىن توقتاتىپ، العاشقى سوت ساتىسىنا ءىستى قايتا قاراۋ تۋرالى قاۋلى شىعارعان.