كەلسي دەگەن يت قۇتقارۋ قىزمەتى كەلگەنشە 20 ساعات بويى يەسىنىڭ قاسىنان ءبىر ەلى كەتپەي، ونى جىلىتقىسى كەلگەن دەيدى adme.ru.

جاڭا جىل ءتۇنى كەلسيدىڭ يەسى 64 جاسار بوب ۇيىنەن بىرەر مينۋتقا شىققان ەكەن. ۇيگە تەز كىرەمىن دەپ ويلاعان ول دالاداعى -4 تەمپەراتۋراسىنا قاراماستان سىرتقى كيىمدى كيمەي، ءۇي كيىمىمەن، ءۇي تاپىشكەسىمەن شىعا سالعان. سونداعى ويى – تەز بارىپ وتىن اعاش الۋ. الايدا ابايسىزدا اياعى شالىنىپ، قۇلاپ قالادى. تۇرايىن دەسە مويىن ومىرتقاسىنا زاقىم كەلگەن، دەنەسى قيمىلداتا الماي قالعان.

بوبتىڭ قولىنان كەلگەنى بار پارمەنىمەن ايعايلاپ كومەككە شاقىرۋ بولدى. ءبىراق جاقىن ماڭدا كورشىسى جوق. ەڭ جاقىن كورشىلەر 4 ءميلدىڭ جەردە تۇرادى ەكەن. ونىڭ جان ايقايىن ەستىگەن تەك ءيتى بولدى. كەلسي يەسىنىڭ قاسىنا كەلىپ، ونى جىلىتۋعا تىرىسقان. 20 ساعات بويى كومەككە شاقىرىپ ۇرگەن. تاڭ اتا ءيتتىڭ داۋسى شىقپاي قالعان. يەسىنىڭ جانىنان ءبىر ەلى كەتپەگەن كەلسي بوبتى ءوزىنىڭ دەنەسىمەن جىلىتۋعا تىرىسقان. كەلەسى كۇننىڭ كەشكىلىك ۋاقىتىندا بوبتىڭ ريك ەسىمدى كورشىسى ءيتتىڭ ۇرگەن داۋىسىن ەستىپ، كورشىسىنىڭ قىزىنا زۆونداپ، سوسىن جەدەل جاردەم شاقىرادى. بوبتى ماكلارەن (McLaren Northern Michigan Hospital) ەمحاناسىنا جاتقىزادى. 20 ساعات بويى دالادا جەڭىل كيىممەن جاتقان بوبقا سالقىن تيسە دە ەش جەرى ۇسىمەگەن. ءبارى كەلسي ءيتىنىڭ ارقاسى.

نەيروحيرۋرگ حايم كولەننىڭ ايتۋى بويىنشا بوب جالعىز قالعان جاعدايدا مۇنداي عاجايىپ بولماس ەدى.

ءولىم اۋزىنان قالعان بوب بىلاي دەپ سۇحبات بەرىپتى: «مەن تاعدىرىما وسىنداي قۇتقارۋشىلار سىيلاعانىنا ءدان ريزامىن. كەلسي مەنى جىلىتتى، توڭۋىما جول بەرمەدى، جالعىز قالدىرمادى. ءيتىمنىڭ ارقاسىندا ەسىمنەن دە ايىرىلمادىم. ول كومەك كەلگەنشە ۇرۋمەن بولدى. دارىگەر كولەننىڭ ارقاسىندا وز-وزىمە كەلىپ، دەنساۋلىعىم جاقسارا باستادى. ولار مەن ءۇشىن ناعىز قاھارماندار».

اۋدارعان: جازيرا بايدالى