شەتەلدىڭ كوپتەگەن مەملەكەتتەرىنە قاراپ وتىرساڭىز ءوز ەسىمدەرىن حالقىنىڭ ءھام ۇلتىنىڭ ءتولقۇجاتىنداي كورەدى. ياعني، اتى-جوندەرىنە جالعاعان جالعاۋلاردىڭ وزىنەن-اق قاي مەملەكەتتەن كەلگەنىن اڭعارۋعا بولادى. ۇلكەن دۇنيەلەردىڭ وسىنداي كىشكەنتاي قادامداردان باستالاتىنىن تۇسىنگەنىمىز ابزال. ەل بولىپ ەلدىگىمىزدى اسقاقتاتىپ، بىرگە جۇمىلىپ ءىس جاساپ جاتقان دۇنيەلەرىمىز از ەمەس، الايدا ءوز تەگىمىزدەگى «وۆا»، «ەۆا»، «وۆ» سىندى كەدەرگىلەردەن تەزىرەك قۇتىلۋعا ەش اسىقپايتىنىمىز بەلگىلى. الاشوردانىڭ ءبىرتۋار ازاماتى ءاليحان بوكەيحان اتامىز: «قازاقتىڭ ءاتى-جونىن ورىس حالقىنا ەلىكتەپ، «-وۆ، -ەۆ»، – دەپ جازۋ توقتاتىلسىن! بۇدان بىلاي قازاق ازاماتتارى ءوز اتى-جوندەرىن اباي قۇنانباي ۇلى دەگەن سياقتى جازدىرسىن، ءبىز دە احمەت بايتۇرسىن ۇلى، ءاليحان بوكەيحان ۇلى بولايىق!»، – دەپ ۇرانداعان ەدى. بۇل ۇران ءقازىردىڭ وزىندە حالىقتىڭ قۇلاعىندا جاڭعىرىپ تۇرعانداي. سەبەبى، ءبىز تولىقتاي بولسىن ءوز اتى-جونىمىزگە تاعىلعان قارا تاڭبادان ارىلا المادىق. اقيقاتىنا كەلسەك بىزگە ەشكىمدە بوگەت جاساپ جاتقان جوق، جولىمىزدا تۇرىپ العان جوق. كەرىسىنشە، وسىعان بايلانىستى اتا زاڭىمىزدىڭ وزىنە ارنايى باپ قاراستىرىلىپ، رۇقسات ەتىلگەن. ياعني، ءار ازاماتتىڭ ءوز قالاۋىنا قاراي ەرىك بەرىلىپ، ۇلتشىلدىعىنىڭ تارازىسىن ولشەۋگە ارناپ قويعانداي. كوپ ازاماتتاردىڭ ايتاتىن سىلتاۋلارى دا جەتكىلىكتى. ۋاقىت تابا المايدى نەمەسە ءبىر كەدەرگى شىعىپ قالادى، ايتەۋبىر قيىندىقتىڭ توبەسىن كورسەتىپ جاتامىز.
ءسىز ءۇشىن بار بولعانى ءبىر اتى-جونىڭىزگە جالعانعان جالعاۋدىڭ ءوزىنىڭ ۇلكەن قۇدىرەتى بار ەكەنىن سەزە الاسىز با ؟ ەلەستەتىڭىزشى اتى-جونىڭىزدە «ۇلى»، «قىزى» دەپ دارالاپ، قازاقتىڭ عاجاپ ەسىمدەرىنىڭ وزىنە ءنار بەرىپ تۇرادى. قاي ەلدەن ەكەنىڭىزدى ءتۇسىندىرىپ جاتۋدىڭ دا قاجەتى بولمايدى. ءوز ءتىلىڭىزدى كۇرمەلەپ، وزگە ءتىلدىڭ جالعاۋىنىڭ جالاۋىن كوتەرىپ جۇرگەندى ءسىز نامىس سانامايسىز با؟ سانسىز ۋاقىتتىڭ ەنشىسىنە يەلىك ەتىپ جاتقان ەل تاريحىنىڭ پاراقتارىن تاعى ءبىر زەردەلەپ شىقساڭىز، حالىقتىڭ زيالىلارىنىڭ ءوزى وسى ماسەلەنىڭ قانشالىقتى ۇلكەن مانگە يە ەكەنىن ەرتە اڭعارعان. سول سەبەپتەن دە اۋەل باستان-اق دۇرىس جولدىڭ باعىتىن تاڭداپ، ءوز ىستەرى ءۇشىن ەش ۇيالماعان.
تاۋەلسىزدىك العالى وسى ءبىر ماسەلە سانسىز رەت كوتەرىلىپ، تالاي زيالىلاردىڭ جالىندى سوزدەرى جاريالانعان ەدى. كوپتەگەن ازاماتتارىمىز ءوز تەگىنە وزگەرتۋلەر جاساپ، قالىڭ جۇرتشىلىققا ۇلگى بولىپ جاتتى. ءبىراق، بۇعان اسا قاتتى نازار اۋدارمايتىن ادامداردىڭ دا قاتارى كەمي قويمادى.
ءالى كۇنگە دەيىن تەگىندەگى كۇرمەۋدى شەشە الماي ءھام ونى شەشۋگە قۇلشىنىس جاساماي جۇرگەن ازاماتتاردىڭ قاتارىن ءجيى كەزدەستىرىپ جاتامىز. ءبىز وسىنداي ۇساق دۇنيەلەردىڭ كەيىن ۇلكەن مانگە يە بولاتىنىن جانە ادام اتاۋىنا تاعىلعان ايداردىڭ وزىندىك ءبىر كۇش-قۇدىرەتى بار ەكەنىن ۇمىتپاۋ كەرەكپىز.
كوپ ازاماتتارىمى از بولسىن ، كوپ بولسىن ايىپپۇل سالىناتىن بولدى دەپ، زاڭ قابىلدانسا ىلە-شالا باس كوتەرىپ، ءوز قارسىلىقتارىن ءبىلدىرىپ جاتادى. ءتىپتى، سوعان كەزەككە تۇرىپ جاتاتىن ادامداردىڭ اراسىندا ينە شانشار ورىن بولماي قالادى. ال ەندى، ۇلتتىق بولمىسىمىزعا، وزىندىك دارالىعىمىزعا ۇلكەن ءمان بەرەتىن وسى ءبىر وزەكتى تاقىرىپتىڭ اينالاسىندا باس كوتەرەتىن بىرەن-ساراڭ جۇرتتى كورىپ جاتامىز. نەلىكتەن ەرتەرەك قامدانىپ، قازاقتىڭ اتا-تەگىندەگى ءوزىندىڭ «ۇلى»، «قىزى» اتتى دارالىقتى قالىپتاستىرماسقا!
تىلەگەن كوگەرشىن
پىكىر قالدىرۋ