الەم بويىنشا ءمۇيىزتۇمسىقتار جويىلىپ كەتۋدىڭ الدىندا تۇرعاندا، ءۇندىستاننىڭ ۇلتتىق «كازيرانگا» ساياباعى اتالمىش جانۋاردى كوبەيتە الدى. ول ءۇشىن اڭشىلاردى اتۋعا زاڭ بويىنشا رۇقسات بەرىلگەن. ساياباقتا 50-گە جۋىق ادام كوز جۇمعان ەكەن. الايدا، ونىڭ بارلىعى براكونەر ەمەس بولىپ شىققان.

ءۇندىستان ءمۇيىزتۇمسىقتارىنىڭ كولەمى افريكاداعىلارمەن سالىستىرعاندا كىشكەنتاي. سوندىقتان بروكونەرلەر وعان كوپ ۋاقىتقا دەيىن نازار اۋدارماعان. الايدا اق، قارا ءمۇيىزتۇمسىقتىلار جويىلىپ كەتكەننەن كەيىن، «كازيرانگا» ساياباعىنداعى جانۋاردى نازارعا العان.

كوپتەگەن ادامداردا ءمۇيىزتۇمسىقتىنىڭ ءمۇيىزى راك پەن ەرەكتيلدى ديسفۋنكسيانى ەمدەي الادى دەگەن قاتە سەنىم بار دەيدى ساراپشىلار. وسىعان بايلانىستى وعان دەگەن سۇرانىس كوپ جانە ءمۇيىز وتە قىمبات تۇرادى. 100 گراممى 6000 دوللارعا باعالانادى.

ساياباق قىزمەتكەرلەرىنە براكونەرلەردى اتۋعا رۇقسات بەرىلگەننەن كەيىن ءمۇيىزتۇمسىقتىلاردىڭ سانى ارتقان. الايدا ساياباققا جاقىن ماڭدا تۇراتىن حالىق زارداپ شەگە باستادى. قاراپايىم ادامدار ءجيى قاتەلىكپەن وققا ۇشاتىن بولعان.

ونىڭ ىشىندە 7 جاستاعى اساك ورانگتا بار. ونىڭ اياعىنان اتىپ جىبەرگەن. اساك ەندى ەشقاشان بۇرىنعىداي جۇرە المايدى. ازىرشە اعاسى ونى كوتەرىپ ءجۇر.  ساياباق باسشىلىعى وتەماقى رەتىندە 3000 دوللار بەرگەن.

تۇرعىندار ساياباق قىزمەتكەرلەرى ءوز قىزمەتىن اسىرا پايدالانادى دەپ شاعىمدانادى. ءبىراق ولاردىڭ بۇل شاعىمىنا قۇلاق اساتىن ەشكىم بولماي وتىر.