الماتى وبلىسىنىڭ قاراساي اۋدانىندا سەرىك جاقايموۆ دەگەن ازامات تۇرادى. وتىز التى جاستاعى وسى ازاماتتىڭ بۇگىندە قابىرعاسى قايىسىپ، قايعىعا باتىپ وتىرعان جايى بار. بۇلىنگەن ءتىستى ۋاقتىلى ەمدەتپەۋدىڭ سالدارىنان ايەلى اۋىر ناۋقاسقا شالدىعىپتى.

2013ء-شى جىلى كەلىنشەگى زامي­را جيەمۇراتوۆانىڭ الدىڭعى ءتىس­تەرى ءشىري باستاعان ەكەن. كەيبىرىنىڭ ءتۇبى ىرىڭدەپ كەتكەن. ءبىرىن جۇلدىرتتى، ءبىرىن ەم­دەتتى. ءبىراق تىستەرى بىرىنەن كەيىن ءبىرى ءشىري بەردى. اقىرى اۋزىندا ءتىس قالمادى. كوپ ۇزاماي بەتى ءىسىندى. ءوزى دە السىرەپ، جۇدەپ كەتتى. سوسىن ەم­دەلىپ السىن دەپ ازىن-اۋلاق اقشانى ۇستاتىپ، تاشكەنت­كە جىبەرگەن. ول جاقتا دارىگەرلەر كۇتپەگەن سۇمدىق دياگنوز قويدى: «سول جاق تاڭداي قۋىسىنىڭ قاتەرسىز ىسىگى». ەكى بالانى بوسانعاندا دا زاميرا دۇرىس كۇتىنە الماعان. تىستەن باستالعان اۋرۋعا سول سەبەپ بولدى ما دەپ ويلايدى ەرلى-زايىپتى.

تاشكەنتتە زاميرا جارتى جىل ەمدەلگەن ەكەن. ساۋلەلىك تەراپيا قابىلدادى. بەتى بەرى قاراعان سوڭ، ءبارى قالپىنا كەلدى دەپ ويلاپ ەلگە ورالدى. ءبىراق ءبىر جىلدان كەيىن سول جاق بەتى تاعى دا ءىسىپ، ءوزى السىرەپ، قاتتى جۇدەپ كەتىپتى. سويتسە، كەرىسىنشە اۋرۋى اسقىنىپ كەتكەن ەكەن. قاتەرلى ىسىككە اينالىپتى. سودان باستاپ ايەلدىڭ ءومىرى ابىرجۋ، شاپقىلاۋ: اناليز تاپسىرۋ، دارى-دارمەك الۋ، اۋرۋحاناعا جاتۋ. ءبىراق اۋرۋ بۇل ەمگە كونبەدى. ءسويتىپ 2016-شى جىلدىڭ شىلدە ايىندا وپەراسيا جاساتتى. ونىڭ دا ماشاقاتى مەن شىعىنى كوپ ەكەن. نە كەرەك، كەلىنشەگىنىڭ سول كوزىن، جاعىن، تاڭدايىن الىپ تاستادى. وسىلاي زاميرا ءبىر-اق كۇندە بە­ءتىنىڭ سول جاعى قيسايىپ، دۇرىس ءسوي­لەۋ مەن اس ىشۋگە جاراماي، مۇگەدەك بولىپ قالدى. داۋسى شىقپايدى.

ءبىر عانا ءتىستىڭ كەسىرى زاميرانىڭ بۇكىل ءومىرىنىڭ بۇلىنۋىنە تۇرتكى بولدى. بۇل وقيعا وزگەلەرگە وي سالۋى ءتيىس. بۇلىنگەن ءتىستى ۋاقىتىلى ەمدەتۋ، بوسانعان سوڭ دۇرىس كۇتىنۋ سىندى جايلاردى ەلەمەۋگە بولمايتىنىن دا ايتقىمىز كەلەدى.

دەرەككوز: «زامانا» گازەتى