عالامتوردا، انىعىن ايتقاندا "ۆكونتاكتە" الەۋمەتتىك جەلىسىندە كەڭىنەن تارالىپ جاتقان  بۇل سۋرەت ەشكىمدى بەيجاي قالدىرماسى انىق دەپ حابارلايدى "قامشى" پورتالى. ارنايى مامان بولماساق تا فوتوشوپ ەمەس، كادىمگى سۋرەت سەكىلدى دەپ ايتا الامىز. ينستراگرام جەلىسىنە كىرىپ فوتودا كورسەتىلگەن اككاۋنتتى دا ىزدەپ كوردىك. "Shaxnoz_92" دەپ تىركەلگەن ۇلتى وزبەك ەكى ازاماتشانى تاپتىق. ەكەۋىنىڭ دە ەمشەكتەگى بالاسى بار. بالا ەمىزىپ وتىرعان فوتونى ينستاگرامعا سالعانى ءۇشىن كۇيەۋى تىلگىلەپ تاستاعان دەگەن اقپاراتتىڭ الايدا راس-وتىرىگىن انىقتاي المادىق. ەڭ وكىنىشتىسى، جاماندىق اتاۋلىسىنا ەتىمىز ۇيرەنگەنى سونشالىقتى بۇل جاڭالىقتىڭ شىندىق بولىپ شىعۋى عاجاپ ەمەس. سەبەبى بۇعان دەيىن وسى سياقتى سوراقى دۇنيەلەردى كوزىمىزبەن كورىپ، قۇلاعىمىزبەن ەستىپ ءجۇرمىز. ايتا كەتەرلىگى، كەيبىرەۋلەر بالانى قوعامدىق ورىندا ەمىزۋگە ۇيالادى، بازبىرەۋلەر بۇعان قارسى. ءاربىر ءىس-قيمىلدى، وتىرعانىڭدى-تۇرعانىڭدى ينستراگرامعا سالا بەرۋ زاماناۋي قوعامدىق دەرت ەكەندىگى تۇسىنىكتى. ءبىزدىڭ ايتقىمىز كەلەتىنى – قوعامدىق ورىندا قارنى اشقان بالاعا ومىراۋ ءسۇتىن بەرۋدە تۇرعان ەش ابەستىك جوق. قايتا بۇل قوعامدى ىزگىلەندىرۋگە، مەيىرىمدى بولۋعا اسەر ەتەدى.