ورتالىق ازيانىڭ ەۋرازيا قورى (واەق) قازاقستان رەسپۋبليكاسىنداعى ەۋروپالىق وداق وكىلدىگىنىڭ قولداۋىمەن «قازاقستانداعى وسال توپتارعا زاڭگەرلىك كومەك كورسەتۋ جۇيەسىن جەتىلدىرۋ» اتتى جاڭا جوبانى ىسكە قوستى دەپ حابارلايدى qamshy.kz. جوبا ماقساتى وسال توپتاردىڭ قۇقىقتارىن قورعاۋدىڭ تاجىريبەسى مەن مەحانيزمدەرىن جەتىلدىرۋ، سونىڭ ىشىندە ولاردىڭ قىلمىستىق جانە ازاماتتىق ادىلەتتىلىككە تارتىلعان جاعدايلاردا مەملەكەت كەپىلدىك بەرگەن زاڭگەرلىك كومەگىنىڭ ساپاسى مەن قولجەتىمدىلىگىن جاقسارتۋ بولىپ تابىلادى.

گرانت سوماسى 311 192 ەۆرو. جوبا قازاقستاننىڭ جەتى ايماعىن قامتيدى: الماتى، وڭتۇستىك قازاقستان، جامبىل، قاراعاندى، پاۆلودار، شىعىس قازاقستان، باتىس قازاقستان وبلىستارى. جوبا ۇزاقتىعى 24 اي (قانتار 2017 – جەلتوقسان 2018).

جوبا واەق-نىڭ قازاقستانداعى ادام قۇقىقتارىن، سونىڭ ىشىندە حالىقتىڭ وسال توپتارىنىڭ قۇقىقتارىن قورعاۋ بويىنشا جوبا توپتامالارىنىڭ جالعاسى بولىپ تابىلادى. اتالعان جوبا مەملەكەت كەپىلدىك بەرگەن زاڭگەرلىك كومەگىن كورسەتۋدىڭ وسى كۇنگى جاعدايى بويىنشا اۋقىمدى زەرتتەۋ جۇرگىزۋدى، سونداي-اق، وسى سالاداعى زاڭنامانى باقىلاۋ مەن سارالاۋ ءىسىن قامتيدى. بۇعان قوسا، گرۋزياعا جوسپارلانعان تانىمدىق ءىس-ساپار بارىسىندا قازاقستاندىق دەلەگاسيا بۇل ەلدىڭ وسال توپتارعا كەپىلدەنگەن زاڭ كومەگىن قامتاماسىز ەتۋدەگى وڭ تاجىريبەسىن ەگجەي-تەگجەيلى تۇردە تانىپ-بىلۋگە مۇمكىندىك الادى.

اتالعان جوبانىڭ بولجامدى ناتيجەلەرى قاتارىندا وسال توپتاردىڭ مەملەكەت كەپىلدىك بەرگەن زاڭ كومەگىنە قول جەتكىزۋدەگى نەگىزگى كەدەرگىلەردى ايقىنداۋ، زاڭنامانى جەتىلدىرۋ بويىنشا ۇسىنىمداردى جاساپ شىعارۋ، ناقتى ۇسىنىمداردى قازاقستان رەسپۋبليكاسىنىڭ قولدانىستاعى زاڭناماسىنا ەنگىزۋ، سونداي-اق، وسال توپتارعا زاڭ كومەگىن كورسەتۋ دەڭگەيىن كوتەرۋ كوزدەلەدى.

جوبا «تالدىقورعان قۇقىقتىق ورتالىعى» قق-مەن سەرىكتەستىكتە، سونداي-اق سىرتقى ساراپشى، قورعاۋشى ايمان وماروۆامەن ىنتىماقتاستىقتا جۇزەگە اسىرىلاتىن بولادى. «بۇل جوبانىڭ ماڭىزى اسا جوعارى، سەبەبى ونىڭ ماقساتى ازاماتتاردىڭ، اسىرەسە وسال توپتاردىڭ زاڭگەرلىك كومەككە تەڭ قول جەتكىزۋىن قامتاماسىز ەتۋ. بۇل مىندەتتى اتقارۋ ءۇشىن، ءبىز، ەڭ الدىمەن، ەلىمىزدەگى قورعاۋشىلاردىڭ احۋالىن جاقسارتۋىمىز كەرەك، وعان قوسا، وسى سالاداعى الدىڭعى قاتارلى حالىقارالىق تاجىريبەنى ۇيرەنۋ ارقىلى ءتيىمدى تەگىن زاڭ كومەگىنىڭ مەحانيزمىن قۇرۋىمىز قاجەت»، - دەپ اتاپ ءوتتى ۆيكتور تەن، جوبا سەرىكتەسى جانە «تالدىقورعان قۇقىقتىق ورتالىعى» قق-نىڭ ديرەكتورى.