تۇركىستاندىق مۇعالىمدەردى  قالانىڭ وسى جىلى تۇركى الەمىنىڭ مادەني استاناسى بولۋىنا وراي كوشە بويىن سىرلاپ، سۋرەت سالىپ شىعۋعا مىندەتتەگەن. سونداي-اق، اكىم قالاعا ناۋرىز مەرەكەسىنە كەلەتىن تۋريستەردىڭ شىعىنىن مۇعالىمدەردىڭ قالتاسىنان وتەۋدى تالاپ ەتىپ وتىر، دەپ حابارلايدى qamshy.kz  nur.kz-كە سىلتەمە جاساپ.

 جۇمىسىنان ايىرىلىپ قالام با دەگەن قاۋىپپەن ءمۇعالىمنىڭ ءبىرى: "بىزدە ءبارى شىندىقتى اشىپ ايتۋعا قورقادى. مەن ءوزىم ءمۇعالىممىن. جالعىزباستى انامىن. جۇمىسىمنان ايىرىلىپ قالعىم كەلمەيدى. سىزدەرگە ايتايىن دەگەنىم، بيىل تۇركىستان تۇركى حالىقتارىنىڭ مادەني استاناسى اتاندى.

سوعان وراي قالادا جوندەۋ جۇمىستارى  قىزۋ ءجۇرىپ جاتىر. ال سول جۇمىسقا ساباعىن، بالا-شاعاسىن تاستاپ، ەش اقى تولەمەي سىزۋ، سۋرەت، تەحنولوگيا ءپانىنىڭ مۇعالىمدەرى جەگىلۋدە. سۋىق كۇندە ءبىزدى بۇكىل كوشە بويىن سىرلاپ، سۋرەت سالىپ شىعۋعا مىندەتتى. اكىم تاپسىرماسى سولاي.

تاعى ءبىر ماسەلە، تۇركىستاندا وتەتىن ناۋرىز مەرەكەسى ەرەكشە بولماق، وعان تۋريستەر كەلەدى ەكەن. ال سول كەلگەن تۋريستەردى تاعى دا مۇعالىمدەر كۇتىپ الماق. ءار مەكتەپكە 20 تۋريستەن ءبولىپ بەرىپتى. ولاردىڭ جولىنىڭ، تاماعىنىڭ، قوناق ءۇيىنىڭ اقشاسى مۇعالىمدەردىڭ موينىندا.  ءار ءمۇعالىم 3-4 مىڭ تەڭگەدەن بەرۋ كەرەك. ول دا اكىمنىڭ تاپسىرماسى. گازەت-جۋرنالىن بىلاي قويعاندا، ايتا بەرسەڭ كۇندە اقشا جيناۋ. وزبەكستاننان ءانشى كەلىپتى.

بارلىعى وزبەك تىلىندە جازىلعان بيلەتتەر. ونى ءار ءمۇعالىم الۋعا ءتيىس ەكەن. بارعىڭ كەلە مە، كەلمەي مە - سۇرامايدى. باعاسى 1500-2500 تەڭگەدەن. سوندا 60-70 مىڭ تەڭگە ايلىق الاتىن ءمۇعالىمنىڭ اقشاسى نەگە جەتپەك؟!.  بالا-شاعانىڭ ءجۇرىس-تۇرىسى، دۇكەندەگى قارىز، كرەديت، بيلەت،  پاتەر اقى، جولاقىمىز تاعى بار. ءمۇعالىم روبوت پا سوندا، قالاي ويلايسىزدار؟!"، - دەيدى اشىنعان ۇستاز.

مەكەمە مامانىنىڭ ايتۋىنشا، بۇل جاعداي دەمالىس كۇندەرى جالپى قالالىق سەنبىلىك كەزىندە بولعان.

"دەمالىس كۇندەرى قالادا سەنبىلىك ۇيىمداستىرىلادى. وعان مۇعالىمدەر عانا ەمەس، باسقالارى دا قاتىستى"، - دەدى ءابۋتالىپ اسانوۆ.