وقيعا اۆستراليالىق جىگىتتىڭ ءبىرىنشى كۋرستا وقىپ جۇرگەن كەزىندە بولعان. ودان ءبىر جىل بۇرىن اتا-اناسى قايتىس بولدى، جاقسى كورەتىن يتىنەن ايىرىلدى. ءبىر اپتانىڭ ىشىندە ەكى مارتە كولىك اپاتىنا ۇشىرادى. ورىن العان جاعدايلاردىڭ ءبارى جىگىتكە كوپ نارسەنى تۇسىنۋگە سەپتىگىن تيگىزدى. جىگىت وز-وزىنە سۇراقتار قويا باستايدى. ءومىردىڭ ءمانى نە؟ ومىرگە كەلگەندەگى ماقساتىم نە؟ تاڭەرتەڭ نە ءۇشىن تۇرامىن؟ نە ءۇشىن ءومىر ءسۇرىپ ءجۇرمىن؟ وسىلايشا، ءومىردىڭ ءمانى تۋرالى ويلانۋعا كوشەدى، فيلوسوفيالىق، ادەبي، سونداي-اق ءدىني كىتاپتاردى وقۋدى باستايدى. ءدىني كىتاپتار وقىپ ءجۇرىپ، حريستيان ءدىنى جايىندا ەستىپ-بىلەدى، سول ءدىندى قابىلدايدى.
الايدا، ءار ءتۇرلى تۇسىنىكتەرگە سەنەتىن حريستياندىقتار جىگىتتىڭ كوڭىلىنە كۇدىك ۇيالاتادى. بۋددا ءدىنى جايىندا زەرتتەپ كورەدى. جانى جوق مۇسىندەرگە تابىناتىن بۋددالىقتارعا قاراپ جىگىتتىڭ جانى تاعى راحات تاپپايدى.
ەندى نە ىستەر ەكەم دەپ جۇرگەندە دوستارىنان يسلام ءدىنى جايىندا ەستيدى. الايدا، ات تونىن الا قاشادى. يسلام دەگەندە كوز الدىنا تەرروريستەر، جاۋىزدار، ادام ولتىرگىشتەر ەلەستەگەن. ءبىراق سوندا دا دىندەردى زەرتتەپ جۇرگەندىكتەن مۇسىلمان قاۋىم قۇلشىلىق قىلاتىن ليۆاننىڭ مەشىتىنە كىرەدى.
مۇسىلمان زاڭدارىنان حابارى جوق جىگىت مەشىت ىشىنە اياق كيىمىمەن كىرىپ كەتەدى، ناماز وقىپ وتىرعاندىردىڭ الدىن كەسىپ، ساجدەگە جىعىلعانداردى اتتاپ وتەدى. ءسويتىپ، سول مەشىتتىڭ ىشىندە ءبىر ۇزىن ساقالدى اداممەن تانىسادى. سول ساتتەن باستاپ ءومىرى وزگەرەدى. تەرروريست، جاۋىز دەپ ويلاپ جۇرگەن ليۆاندىق مۇسىلماندار جىگىتكە جىلى شىراي تانىتىپ، جاقسى قارسى الادى. توقاش پەن ءشايعا ابدەن تويدىرادى. بۇل جاعدايدان سوڭ جىگىت مەشىتكە كەلۋىن جيىلەتەدى. شايمەن توقاش جەگەن ۇناپ قالعان بولۋ كەرەك.
سونداي ءبىر كۇنى، ءوزىن مازالاپ جۇرگەن سۇراقتى مۇسىلماندارعا دا قويىپ كوردى. ءدىن قىزمەتكەرلەرى ەش ىركىلمەستەن قولىنا قۇران كىتابىن ۇسىندى. بارلىق سۇراقتاردىڭ جاۋابىن سول كىتاپتان تاباتىنىن ايتتى. جىگىت سۇراق قويا بەردى، ءدىن قىزمەتكەرلەرى جاۋاپ بەرۋدەن ەش شارشامادى. جىگىت قويعان سۇراقتاردىڭ جاۋاپتارى قۇراندا بولدى. قۇراندى وقىپ ءجۇرىپ، جىگىت ادامداردىڭ ءوز ويلارىن سۇرادى. الايدا، ولار قۇراننىڭ ءسوزى تۇرعاندا ءبىزدىڭ ويىمىزدى نە قىلماقسىڭ دەدى. ءسويتىپ، قۇراندى وقي باستايدى.
ءبىر ۋاقىتتا جىگىت تىلسىم كۇشتى سەزىنگىسى كەلەدى. جازدىڭ ءبىر كەشىندە اينالاسىنا قاراپ تۇرىپ، تابيعاتتىڭ عاجاپ كورىنىسىن كوزى شالادى. بۇرىن سوڭدى بايقاماعانداي. ءبارى كوزىنە تاڭعاجايىپ دۇنيەدەي كورىندى. يسلامعا اياق باسۋىنا جاقىن قالدى. تەك ءبىر نارسە جەتپەدى. عاجاپ كورىنىس ەمەس، ءبىر تىلسىم كۇشتىڭ بولعانىن قالادى. نايزاعاي جارق ەتسە، قۇس ۇشىپ وتسە... ءبىراق كۇتكەن بەلگىسى بولمادى.
ءۇنجىرعاسى تۇسكەن جىگىت قولىنا قۇراندى الىپ، ءارى قاراي وقي باستايدى. عاجاپ! بار بەلگى قۇراندا جازىلعان. «سەندەر ءۇشىن ءتۇندى، كۇندىزدى جاراتتىم، ءارى اي، جۇلدىزدار دا ونىڭ امىرىنە باعىنىشتى. شىن مانىندە ويلانعان قاۋىم ءۇشىن البەتتە بەلگىلەر بار».
ءيا، راسىندا، اينالانىڭ ءبارى ادام ءۇشىن بەلگى، دالەل، ءبارىن اللا جاراتقان. بۇعان كوزى جەتكەن ول يسلامدى قابىلداۋعا شەشەدى.
ءبىر كۇنى مەشىتكە بارسا، مەشىت ىشىندە مىڭعا جۋىق ادام ءجۇر. رامازان ايى ەكەن. ناماز بىتكەن سوڭ ادامداردىڭ ءبارى ءبىر-بىرىن قۇشاقتاپ، رامازانمەن قۇتتىقتاي باستادى. وندايدى بۇرىن كورمەگەندىكتەن تاڭدانىسىن جاسىرمادى. يسلامنىڭ قاي جاعىنان دا ەڭ كەرەمەت ءدىن ەكەنىنە كوزى جەتتى.
يسلامعا دەيىن مۇلدەم باسقاشا بولعان جىگىتتىڭ قازىرگى تۇرىنەن نۇر توگىلىپ تۇرعانداي.
پىكىر قالدىرۋ