قوعام قايراتكەرى، اقىن مۇحتار شاحانوۆ قازىرگى تاڭداعى ناۋرىزدى قالاي تويلاپ جۇرگەنىمىز تۋرالى ءوز ويىن ايتتى. بۇل تۋرالى «قامشى» پورتالى Sputniknews.kz سىلتەمە جاساي وتىرىپ حابارلايدى.

كەڭەس كەزەڭىندە اتا-بابا داستۇرىمەن ساباقتاسقان ۇلتتىق مەيرام ناۋرىزدى تويلاۋعا تىيىم سالىندى. تەك اراعا 62 جىل سالىپ قانا 1988 جىلى ناۋرىز مەيرامى قازاققا قايتا ورالعان ەدى. ۇلىستىڭ ۇلى كۇنىن قايتا تىرىلتۋگە مۇحتار شاحانوۆ باستاعان ءبىر توپ ۇلت زيالىلارى تەر توكتى. ال ولاردىڭ باستاماسىنا سول كەزدە مينيسترلەر كەڭەسىنە ءتوراعالىق ەتكەن قازىرگى مەملەكەت باسشىسى نۇرسۇلتان نازاربايەۆ پەن قازاق حالقىنىڭ ۇلتتىق مادەنيەتى، انا ءتىلى، ءداستۇرى مەن ادەت-عۇرپىنىڭ جاڭارۋىنا ۇلەس قوسقان مەملەكەت قايراتكەرى وزبەكالى جانىبەكوۆ قولداۋ كورسەتتى. 

1988 جىلى مۇحاتر شاحانوۆ ناۋرىز مەرەكەسىن قايتا ءتىرىلتۋدى سۇراپ، كولبينگە حات جازادى.

الايدا، كولبين ناۋرىزدى تويلاي المايتىنىمىزدى ايتقان. وعان مۇحتار شاحانوۆ كولبيننىڭ الدىنا بارىپ ناۋرىز مەرەكەسىن تۇركى جۇرتى ءۇش مىڭ جىلدان بەرى تويلاپ كەلە جاتقانىن، سونداي-اق مەيرام ادامزاتتى تازالىققا، ادامشىلدىققا باۋليتىنىن تۇسىندىرگەن. مۇحاتر شاحانوۆتىڭ سوزدەرى كولبينگە اسەر ەتكەن بولۋى كەرەك، گورباچيەۆتى قالاي دا كوندىرىپ، ناۋرىز مەرەكەسىن ءدۇيىم جۇرت بولىپ تويلايتىنىمىزدى ايتتى.  

ءسويتىپ، 1988 جىلى قازاقتىڭ وشكەنى جانىپ، ناۋرىز مەيرامى تۇڭعىش رەت الماتىنىڭ ماكسيم گوركيي اتىنداعى ورتالىق ساياباعىندا كەڭ اۋقىمدا تويلانادى. ۇلىستىڭ ۇلى كۇنىن تويلاۋعا ءجۇز مىڭنان استام حالىق جينالعان. وسى جىلى ۇلتتىق مەيرامىن ساعىنعان حالىق ناۋرىزدى قىركۇيەك ايىنىڭ ورتاسىنا دەيىن تويلاعان.  

 «ناۋرىز مەرەكەسىن الماتىدا ۇلكەن دەڭگەيدە وتكىزدىك. ۇلتتىق كيىم كيگەن ادامداردى كوشەمەن جۇرگىزدىك. ءتىپتى تۇيەلەرمەن جۇرگىزدىك. جيىرما-وتىز تۇيە الدىردىق. ۇلتتىق ويىندار وينالدى، ۇلتتىق سالت-داستۇرلەر پاش ەتىلدى. وسىلايشا، ۇلكەن دەڭگەيدە مەرەكە بولدى. ىلە-شالا ەلدەگى ءوندىرىس ورىندارى، مەكتەپتەر، جوعارعى وقۋ ورىندارى، ءتىپتى اۋرۋحانالارعا دەيىن تويلادى. مىنە، كەڭەس وداعىنىڭ قىلىشىنان قان تامىپ تۇرعان كۇننىڭ وزىندە ناۋرىز مەرەكەسىن وسىلاي بۇكىلحالىقتىق دەڭگەيدە تويلاۋعا مۇمكىندىك الىپ بەرىپ ەدىم»، — دەدى ول. 

كەلەسى جىلى ناۋرىز مەيرامىن وزبەكستان، قىرعىزستان، ازەربايجان، تاجىكستان، تۇرىكمەنستان رەسپۋبليكالارى مەن رەسەيدىڭ قۇرامىنداعى تۇركىتىلدەس ۇلتتار مەملەكەتتىك دەڭگەيدە تويلاعان. 

 ۇلت جاناشىرىنىڭ ايتۋىنشا، وسىنداي قيىنشىلىقتارمەن قازاققا ورالعان ناۋرىز مەيرامى بۇگىندە، تاۋەلسىز كۇنى، وكىنىشكە قاراي، ءوز دەڭگەيىندە اتاپ وتىلمەي كەلەدى. بۇل جاعدايعا باسقاشا كوزقاراسپەن قاراپ، ناۋرىز مەرەكەسىن ادام مەن ادامدى، ۇلت پەن ۇلتتى جاقىنداستىراتىن رۋحاني كۇش، رۋحاني پاراسات دەڭگەيىندە تويلاۋ قاجەت. 

«ءقازىر تەك قانا كونسەرت قويادى، انشىلەر بىرىنەن سوڭ ءبىرى جەڭىل اندەردى ايتادى. سونىمەن ناۋرىز ءبىتتى. سوندىقتان ناۋرىزعا ءبىز باسقاشا كوزبەن، باسقاشا نيەتپەن قاراۋىمىز كەرەك. بولاشاقتا بيلىكتەگى ادامداردى كوندىرۋىمىز كەرەك،  ۇلكەن دەڭگەيدە وتكىزۋ ءبىزدىڭ ەلدىك، ۇلتتىق سالتىمىز بولۋى قاجەت. ناۋرىزدا ءبىزدىڭ ەلدىك، ۇلتتىق مۇددەلەرىمىز، ءسالت-داستۇرىمىز، سالت-سانامىز العا شىعۋى ءتيىس. وسى قاسيەتتەر العا شىعۋى كەرەك»، — دەيدى قوعام قايراتكەرى.