الماتى وبلىسىنىڭ ءۇشارال قالاسىندا جاڭا اۋەجايدىڭ قۇرىلىسى اياقتالۋعا جاقىن دەپ حابارلايدى qamshy.kz. بۇل تۋرالى الاكول اۋدانى ءتۋريزمىنىڭ الەۋەتى تۋرالى ايتىلعان بريفينگتە اۋدان اكىمى الىبەك جاقانبايەۆ مالىمدەدى. اۋدان باسشىسى قۇرىلىسجۇمىستارىنىڭ 2015 جىلى باستالعانىن، اتالمىش جوبانى جۇزەگە اسىرۋ ءۇشىن بيۋدجەتتەن 896،9 ملن. تەڭگە بولىنگەن بولسا، ونىڭ 21،0 ملن. تەڭگەسى – 2015 جىلى، ال 348،7 ملن. تەڭگەسى بىلتىر يگەرىلگەندىگىن اتاپ ءوتتى. اعىمداعى جىلى قالعان 527،2 ملن. تەڭگە قارجىنى يگەرۋ كوزدەلىپ وتىر.

«اۋەجايدىڭ قۇرىلىسى وسى جىلدىڭ ماۋسىم ايىندا تولىقتاي اياقتالادى دەپ وتىرمىز.سونىمەن قاتار، ءبىزدىڭ ق ر ينۆەستيسيالار جانە دامۋ مينيسترلىگى ازاماتتىق اۆياسيا كوميتەتىنە بەرگەن «استانا – ءۇشارال – استانا»، «الماتى – ءۇشارال - الماتى» باعىتىندا وبلىسارالىق جاڭا اۆيارەيستەر اشۋ جانە ونى رەسپۋبليكالىق بيۋدجەتتەن سۋبسيديالاۋ ماسەلەسىن قاراۋ تۋرالى ءوتىنىشىمىز وڭ ناتيجەگە يە بولدى. سونداي-اق، «جەتىسۋ» اۆياكومپانياسى» اق-مەن بىرىگىپ «تالدىقورعان – ءۇشارال – تالدىقورعان» ىشكى اۆيارەيسىن اشۋ كوزدەلۋدە. بيىل وسى ىشكى اۆيارەيستى سۋبسيديالاۋ ماقساتىندا وبلىستىق بيۋدجەتتەن 15،2 ملن. تەڭگە ءبولىندى»، - دەدى ءا. جاقانبايەۆ.

سونىمەن قاتار، جاڭا اۋەجايدا ۇشۋ-قونۋ جولاعى قايتا جاڭعىرتىلىپ، اۋە قوزعالىستارىن ۇيىمداستىرۋعا ەڭ قاجەتتى دەگەن راديوتەحنيكالىق جانە مەتەورولوگيالىق قۇرال-جابلدىقتار جاڭارتىلعان.  

وسى ورايدا ايتا كەتەيىك، ءۇشارال قالاسىنداعى اۋەجاي ەلباسى نۇرسۇلتان نازاربايەۆتىڭ الماتى وبلىسىنىڭ اكىمى اماندىق باتالوۆقا بەرگەن تىكەلەي تاپسىرماسىمەن جاڭعىرتىلۋدا. ونداعى ماقسات – الەۋەتى جوعارى الاكول كولىنە تۋريستەردى كوپتەپ تارتۋ جانە وتاندىق ءتۋريزمدى دامىتۋ.