تۇماندى البيون ەلىندە تۇرىپ جاتقان قازاقتار ۇلتتىق مەيرامداردىڭ ەشبىرىن قالت جىبەرمەيدى. شەتتە جۇرسە دە، ولار ۇلتىمىزدىڭ رۋحاني مادەنيەتىن ساقتاپ، حالقىمىزدىڭ ادەت-عۇرىپتارىن ءبىر ساتكە دە ۇمىتپاق ەمەس.
ارينە، ۇلىبريتانيادا ءبىلىم الىپ جاتقان قازاقستاندىق ستۋدەنت تيمۋر ابدىرەشتىڭ ايتۋىنشا، ۇلتتىق مەيرامداردىڭ ىشىندە ناۋرىز مەرەكەسىنىڭ شوقتىعى بيىك. تۋعان جەردەن جىراقتا جۇرگەن قازاقتار ۇلىستىڭ ۇلى كۇنىن ەرەكشە ىستىق ىقىلاسپەن اتاپ وتەدى.
«مەن وقيتىن Newcastle قالاسىندا Newcastle Kazakh Society اتتى ۇيىم بار. وسى قالاداعى بۇكىل قازاق ستۋدەنتتەرىنىڭ باسىن بىرىكتىرىپ وتىر. جالپى، بۇل جەردە ستۋدەنتتەر وتە ۇيىمشىل ءارى بىرلىگى جاراسقان. ناۋرىز مەرەكەسىنە ءبىر كىسىدەي جۇمىلىپ، دايىندالادى. ۇلىستىڭ ۇلى كۇنى ءبارى جينالىپ، مەيرامدى ۋ-شۋ بولىپ اتاپ وتەدى. بىرەۋى كوجە، ەكىنشىسى پالاۋ، قالعاندارى باۋىرساق ءپىسىرىپ اكەلەدى. كوجە ءىشىپ ءارى ءدامدى باۋىرساقتان اۋىز تيگەن ستۋدەنت ءبىر ساتكە تۋعان جەرىنە ساپار شەككەندەي بولادى. سىرتتا جۇرگەن قازاق جاستارىنا ناۋرىز مەرەكەسى وسىنداي باس قوسۋلارمەن ەستە قالادى»، — دەيدى Newcastle University ستۋدەنتى.
ونىڭ ايتۋىنشا، Newcastle Kazakh Society مۇنىمەن شەكتەلمەيدى. 2014 جىلى ناۋرىز ەرەكشە فورماتتا تويلانىپتى. «Into Newcastle University عيماراتىنىڭ قابىرعاسىندا ناۋرىز مەيرامىنا وراي قازاقستانعا ارنالعان تانىستىرۋ كورمەسى ءوتتى. ۇلتتىق كيىم كيگەن قىز-جىگىتتەر بي بيلەپ، ءان شىرقادى. ايتا كەتۋ كەرەك، باسقا ەلدىڭ ستۋدەنتتەرى بۇل شاراعا ەرەكشە قىزىعۋشىلىق تانىتىپ، قازاق حالقىنىڭ مادەنيەتى، ۇلتتىق كيىمى جانە سالت ءداستۇرى تۋرالى سۇراقتارىن اياعان جوق»، — دەپ اڭگىمەلەدى تيمۋر.
البەتتە، ۇلىستىڭ ۇلى كۇنىن ناۋرىز كوجەسىز تويلاۋ مۇمكىن ەمەس. ناۋرىز كوجە مولشىلىقتىڭ جورالعىسى رەتىندە ناۋرىزدا مىندەتتى تۇردە ازىرلەنەدى. شەتتە جۇرگەن قازاق ستۋدەنتتەرى دە بۇل ءداستۇردى بۇزبايدى ەكەن.
«ناۋرىز كوجەنى ۇيدە قالاعان ادام ءپىسىرىپ اكەلەدى. بۇل جاقتا ارنايى مۇسىلمانداردىڭ دۇكەندەرى بار. سول جەردەن ايران، ارپا جانە باسقا داندەردى تابۋعا بولادى»، — دەيدى قازاقستاندىق ستۋدەنت. تيمۋر ابدىرەش اڭگىمەلەگەندەي، ءاز-ناۋرىزعا وراي مەركەلىك شارالار بريتانيانىڭ تۇكپىر-تۇكپىرىندە ۇيىمداستىرىلادى. قازاق ستۋدەنتتەرىنىڭ قاۋىمداستىقتارى ءار قالادا بار. اسىرەسە، لوندوندا ناۋرىز مەيرامى كەڭىنەن تويلانادى.
«بىلتىر بريتانيانىڭ استاناسىندا ءداستۇرلى ناۋرىز فەستيۆالى ءوتىپ، وعان ورتا ازيا ەلدەرىنىڭ وكىلدەرى قاتىستى. ءسويتىپ، لوندونداعى ناۋرىز جەتىنشى رەت تويلاندى. وزبەك، تاجىك، قىرعىز، ءازىربايجان جانە قازاقتار بىرگە ۇلىستىڭ ۇلى كۇنىن تويلادى. كيىز ۇيلەر تىگىلىپ، ۇلتتىق تاعامدار دايىندالدى. بۇل فەستيۆالگە ارالدىڭ تۇكپىر-تۇكپىرىنەن ءبىر-بىرىن كوپتەن كورمەگەن ستۋدەنتتەر جينالىپ، ءتوس تاعىستىرىپ جاتتى. شەتەلدە جۇرسە دە حالىقتى بىرىكتىرەتىن ناۋرىز مەيرامى وسىمەن كۇدىرەتتى ەمەس پە؟!»، — دەپ ءتۇيدى ءسوزىن تيمۋر.
دەرەككوز: sputniknews.kz
