اقمولا وبلىسىندا الاياقتىق ازايار ەمەس. وڭاي ولجاعا كەنەلگىسى كەلەتىندەر كوبىنە قاريالاردى الداپ سوعادى ەكەن. وسىنداي قىلمىستاردىڭ تاعى ءبىرى 16 ناۋرىز كۇنى ەسىل اۋدانىندا اشكەرە بولدى، دەپ حابارلايدى حابار ارناسىنىڭ جاڭالىقتار قىزمەتى.

ءتارتىپ ساقشىلارىنىڭ ايتۋىنشا، 93 جاستاعى اجەيدىڭ ۇيىنە بەلگىسىز 2 ايەل كەلىپ، وزدەرىن الەۋمەتتىك قىزمەتكەرمىز دەپ تانىستىرىپ: «ەسكى بانكنوتتارىڭىزدى جاڭاسىنا اۋىستىرىپ بەرەمىز»، – دەپ، زەينەتكەردىڭ جىلدار بويى جيناعان 700 مىڭ تەڭگەسىن الىپ كەتكەن.  ءقازىر ەكى كۇدىكتى قاماۋعا الىنىپ، قىلمىستىق ءىس قوزعالدى. اقمولا وبلىسىندا بىلتىر 200-دەن استام الاياقتىق دەرەگى تىركەلسە، بيىل 88 ادام الاياقتاردىڭ قۇربانى بولعان

گۇلنار پينچۋك، وبلىستىق ءىىد باسپا ءسوز حاتشىسى:

- الاياقتىقتىڭ تۇرلەرى وتە كوپ بولىپ تۇر. وزدەرىنىڭ قۇيتىرقى ارەكەتىن ىسكە اسىرۋدى ويلايتىن ولار ءتۇرلى كەيىپكە ەنىپ، قارتتاردى الداپ كەتىپ جاتىر. ءبىز قاريالارمەن ءتۇسىندىرۋ جۇمىستارىن جۇرگىزەمىز. باسپا ءسوز بەتتەرىندە دە بۇل تۋرالى قۇلاعدار ەتتىك. دەگەنمەن نە نارسەگە بولسا دا، سەنگىش كەلەتىن ۇلكەن كىسىلەر الاياقتاردىڭ قۇرىعىنا ءتۇسىپ قالىپ جاتىر.