كۇنى كەشە مەملەكەت باسشىسى ن.ءا. نازاربايەۆتىڭ «بولاشاققا باعدار: رۋحاني جاڭعىرۋ» اتتى «ەگەمەن قازاقستان» گازەتىندە جاريالانعان ماقالاسى ءمانى مەن مازمۇنى، ماڭىزى مەن ماعىناسى قوسا ءورىلىپ، وزىندىك ومىرشەڭدىگىن كورسەتكەن كولەمدى تۋىندى بولعانى ءسوزسىز. تاريحتىڭ تولقىندارىن تارازىلاۋدان باستالىپ، ۇلت بولمىسىن بارىنشا باعامداۋمەن بايلانىسىپ، مەملەكەتتىك اتقارۋى ءتيىس مىندەتتەرىن مەجەلەپ بەرگەن ماقالا ءبىزدىڭ دە تەبىرەنۋىمىزگە تۇرتكى بولدى.

قوعامعا قوزعاۋ سالعان ەلباسى ۇلتتى ۇيىستىرۋعا، كەشەگىمىزدى سارالاپ، كەلەشەگىمىزدى كەمەلدەندىرۋگە ۇندەپ، «ۇلتتىق كودتى» ساقتاپ قالۋدىڭ سان الۋان باعىتىن بايىپتايتىن تاماشا تۋىندىسىن تارتۋ ەتتى.

ماقالانىڭ «ءححى عاسىرداعى ۇلتتىق سانا» دەپ اتالعان العاشقى تاراۋىندا نۇرسۇلتان ءابىش ۇلى جاڭا عاسىردىڭ تالاپتارىنا توتەپ بەرۋ ءۇشىن ەكونوميكامىزدىڭ ءال-اۋقاتىن ارتتىرىپ قانا قويماي، سانانى جاڭعىرتۋدىڭ بىرنەشە ەرەكشەلىگىن العا تارتتى. دالىرەك ايتقاندا، ۇلتتىق قۇندىلىقتارىمىزدى ۇلىقتاپ، سالتىمىزدى ساقتاپ، داستۇرلەرىمىزدى دارىپتەپ، رۋحاني بايلىقتارىمىزدى اباتتاندىرۋعا شاقىردى. جەرشىلدىك سەكىلدى جاھاندىق جاڭعىرۋدىڭ تالاپتارىمەن جاناسپايتىن جاعىمسىز ادەتتەردەن ارىلىپ، ىسىراپشىلدىقتى ىسىرىپ، ىقىلىم زاماننان قالىپتاسقان ىمىراگەرشىلىكتى ىدىراتپاۋدىڭ ىڭعايىن ەگەمەن ەلگە ەركىن تىلمەن تاعى ءبىر مارتە جەتكىزدى.

بۇدان بولەك، جاستاردى تاۋلىك سايىن تۇرلەنگەن تەحنوگوليالىق ءداۋىردىڭ قارقىنىنان قايمىقپاي، ءبىلىم كەڭىستىگىندە مەملەكەت ۇسىنعان مۇمكىندىكتەردەن قۇر قالماي، باسەكەگە قابىلەتتىلىكتى ارتتىرۋعا قاۋقارلى بولۋىن دا اتاپ ءوتتى. بۇل – ەلباسىنىڭ وسيەتىن وسكەلەڭ ۇرپاققا ونەگە ەتۋىنىڭ ولشەۋسىز ۇلگىسى دەگەن ءسوز.

مەملەكەت باسشىسى مۇنىمەن قوسا عاسىرلار قويناۋىندا قالىپ، جىلدار وتە ساياسي سەبەپتەرمەن دە سەرگەلدەڭگە تۇسكەن «قازاق ءالىپبيىنىڭ»  تاعدىرىن دا نازاردان تىس قالدىرعان جوق. ەلباسى بۇل ماسەلەنى بىرنەشە جىلدان بەرى كوتەرىپ كەلە جاتقانىن بىلەمىز. دەسەك تە، ماقالادان لاتىن قارپىنە كوشەتىن كەزدىڭ كەلگەنىن وقىعانىمىزدا قاتتى قۋاندىق. ءتىپتى، بيىلعى جىلدان باستاپ قازاق ءالىپبيىنىڭ جاڭا گرافيكاداعى ءبىرىڭعاي ستاندارتتى نۇسقاسىن قابىلداۋ كەرەكتىگى ايتىلىپ، ۇكىمەتتىڭ ىسكە كىرىسەتىنىن دە تىلگە تيەك ەتىلىپتى. ناتيجەسىندە 2025 جىلعا قاراي لاتىن الىپبيىنە تولىقتاي كوشۋ جوسپارى دا جاريالانعان. وسىنداي قۇپتارلىق ءىستى جاسوتاندىقتارمەن قوسا ءبىزدىڭ بارشا زامانداستارىمىز، قاتارلاستارىمىز، جالپى جاستار قاۋىمى قولدايدى دەپ ويلايمىز.

ماقالاداعى تاعى ءبىر باعدار – «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىنىڭ قولعا الىنۋى. بۇل  – الەمدەگى ەڭ تاڭداۋلى 100 وقۋلىقتى ءارتۇرلى تىلدەردەن قازاق تىلىنە اۋدارىلۋى دەگەن ءسوز. كەيدە ستۋدەنتتەر قاۋىمىمەن كەزدەسكەنىمىزدە مەملەكەتتىك تىلدەردەگى وقۋلىقتار سانىنىڭ ازدىعىن العا تارتۋشى ەدى. مىنە، ەندى ولاردىڭ دا ارماندارى ورىندالار كۇننىڭ الىس ەمەستىگىن اڭعاردىق.

ءپاتريوتيزمنىڭ پاراساتتىلىعىن پايىمدايتىن «تۋعان جەر» باعدارلاماسىنىڭ قولعا الىناتىنىن ايتقان پرەزيدەنت ادامزات بالاسى ءۇشىن قاستەرلى ۇعىم سانالاتىن «تۋعان جەردىڭ» قادىر-قاسيەتىن سارالاي ءوتىپتى. بۇل باعدارلاما ءوز كەزەگىندە ەلىمىزدىڭ ءاربىر ايماعىندا وتكەننەن سىر شەرتەتىن كونە عيماراتتار مەن تاريحي ەسكەرتكىشتەردى، مادەني نىسانداردى قالپىنا كەلتىرۋدى، وڭىرلەردە ولكەتانۋ، ەكولوگيالىق تازارتۋ جۇمىستارىن جۇرگىزۋدى، اۋىل ايماقتى اباتتاندىرۋدى كوزدەيدى. كاسىپكەرلەر دە، زيالى قاۋىم وكىلدەرى دە،                    شەندى-شەكپەندىلەر دە، جاستار دا تۋعان جەرلەرىنە قامقورلىق تانىتىپ، جاناشىرلىقتىڭ جاڭاشا ۇلگىسىن كورسەتۋلەرى قاجەت ەكەنىن ۇسىنعان كوشباسشىمىزدىڭ باستاماسى قولداۋسىز قالماۋى قاجەت دەپ سانايمىز.

سونىمەن قاتار، ەلباسىنىڭ تاۋەلسىزدىك جىلدارىندا ءوز اقىلىمەن، ەڭبەگىمەن، بىلىمىمەن، دارىنىمەن وزا شاپقان ازاماتتاردىڭ «قازاقستانداعى  100 جاڭا ەسىم» جوباسىن جۇزەگە اسىرۋ يدەياسىمەن دە تانىسىپ شىقتىق. جاسامپازدىقتىڭ جارقىن جىلدارىندا جاقسىلىقتىڭ جانىنان تابىلعان جانداردىڭ بۇل جيناعى جاستارعا دا ۇلگىلى جوبا بولارى اقيقات.

دانا حالقىمىزدىڭ «ءوز ەرىن ءوز پەرزەنتى ەسكەرمەسە، ەل قايدان السىن تاۋىپ كەمەڭگەردى؟» دەگەن قاناتتى ءسوزى كورەگەندىلىكتىڭ كوش باسىنداعى ەلباسىمىز نۇرسۇلتان ءابىش ۇلى نازاربايەۆتاي تاۋ تۇلعاعا ارنالىپ ايتىلعانداي دەپ ءسوزىمىزدى تۇيدىك.

دانيار سۇندەتبايەۆ

«نۇر وتان» پارتياسى جانىنداعى

«جاس وتان» جاستار قاناتىنىڭ ءتوراعاسى