ءسىزدىڭ ەرمۇرات باپي بولىپ جۇرگەنىڭىزگە ماحامبەت باتىردىڭ، ونىڭ ۇرپاعىنىڭ مىقتىلىعى سەپ بولعان ەكەن عوي... – پالەندەي تالاسىم جوق: باسقا ءبىر ەلدىڭ قىزى بولعاندا، مەن دە بوساڭ بولار ما ەدىم؟.. ءبىراق مەنىڭ دە بابام تەگىن ەمەس، قاراكەرەي قابانبايدىڭ ءبىر بۇتاعىمىن. ايتسە دە ءازىلسىز ايتار بولسام، شىنىندا دا قارلىعاش – مەن ءۇشىن بىرنەشە جەردە كادىمگىدەي توبەلەسكەن قىز. اللاھي شىندىعىم: مەنى رەتسىز قاعىتپاق بولعان ءبىر جىگىتتىڭ ءتۇبىت-تۇبىتىن شىعارىپ، توي ۇستىنەن قۋىپ شىققان كەزى بولعان. سەنبەسەڭ، سوۆەتحان ساكەنوۆ دەگەن دوسىمنان سۇرا: ول قورعاستىڭ باندىسىن سوتتاعان قازاقستانعا ايگىلى سۋديا – ءادىلىن جازباي ايتادى. كەيىننەن وسى وپپوزيسيالىق قىزمەتىم ءۇشىن سوتتى بولعانىمدا، مەنى الىپ كەتۋگە كەلگەن ءبىر توپ پوليسەيگە «بالالارىنىڭ كوزىنشە بەرمەيمىن!» دەپ ەسىكتەن اتتاتپاعان. قياناتقا مويىنسۇنبايتىن ونداي ماحامبەتتىك مىنەز بارشىلىق. ءبىراق جاتاقحاناداعى كوپ قىزدىڭ ىشىندە ۇياڭدىعىمەن، نازىك نازىمەن، دوس-جارانعا جۇرەگىن سۋىرىپ بەرەر ىلتيپاتتىعىمەن ەرەكشە بولىپ كوزىمە تۇسكەن ەدى. مەنەن بەس جاس كىشى بولسا دا، كۇنى بۇگىنگە دەيىن اناۋ-مىناۋ اقىل سۇراپ تۇرام. مەنىڭ تالاي بۇزىقتىعىمدى، ءتۇز كەزگەن تەنتەكتىگىمدى بەتىمە باسقان كۇنى جوق. پەشەنەدەگى جازۋدىڭ قىزىعىن دا، شىجىعىن دا بىرگە كورىپ كەلەمىز. ءبىز التاي ايماعىنىڭ 42 گرادۋستىق ايازىندا ۇيلەندىك. بۇگىندە مارقۇم بولعان قازاقتىڭ بەلگىلى اقىنى نۇرلان ماۋكەن ۇلى تويعا كەلە جاتقان 20 ستۋدەنتتى جاڭعىزتوبە ستانساسىنان ارنايى اۆتوبۋسپەن كۇتىپ الىپ، جەلتوقساننىڭ ساقىلداعان ايازىندا جەتى كۇن توي جاساعان ەدىك. سول سۋىققا كونتراست بولعانداي، جىپ-جىلى جانۇيامىز بار. قارلىعاش – تەلەجۋرناليست، «اپورت-پروداكشن» كومپانياسىنىڭ پروديۋسەرى. كەزىندەگى «حابار-جەر»، رەسپۋبليكالىق تەلەارنالارداعى بۇگىنگى «اس-ارقاۋ»، «اگروبيزنەس»، «ادەبيەت الەمى» باعدارلامالارىن قارلىعاشتىڭ شىعارماشىلىق توبى جاسايدى. ۇلكەن قىزىم ايگەرىم دە – تەلەجۋرناليست، تەلەكورەرمەندەر ونى «جۇلدىزدار ءمازىرى» دەگەن باعدارلامادان كورىپ ءجۇر. باتىربەك دەگەن باتىر تۇلعالى كۇيەۋبالام بار. ەكىنشى قىزىم سالتانات تايۆاننىڭ قارجى جانە بانك ىستەرى ۋنيۆەرسيتەتىن بىتىرگەن. ءقازىر گولليۆۋدتىڭ ءبىر كينوكومپانياسىندا «ماركو پولو» دەگەن كوپسەريالى ءفيلمنىڭ تۇسىرىلىمىندە ءجۇر. كىشى قىزىم ۇلدانا – ستۋدەنت، بولاشاق تۋريزم مامانى. بۇيىرتقان باقىتىم – بالالارىم: قۇداي ارعى-بەرگى بەرگەنىن كەندە قىلماعان اداممىن. – ال وسكەمەننەن الماتىعا جاساعان «سەكىرىستىڭ» سىرىن ايتاسىز با؟ – وندا پالەندەي سىر جوق: شەراعاڭنىڭ شاقىرۋىمەن «سوسياليستىك قازاقستان» گازەتىنە كەلگەن بۇيىرتقان جولدى دا باقىت سانايمىن. شەراعاڭ مەن ونىڭ ورىنباسارى ەرجۇمان سمايىل مەنى «سق»-دا جاريالانعان ءبىر عانا ماقالام ءۇشىن وسكەمەننەن شاقىرتىپ الدى. ءقازىر ول ماقالانىڭ اتاۋىن ۇمىتىپ قالىپپىن: ەسىمدەگىسى – شقو-داعى ۇلان اۋپارتكومىنىڭ ءبىرىنشى حاتشىسى قوجامجاروۆ دەگەندى قاق ماڭدايدان پەرگەن ەدىم. سول جاريالانىم «سك»-دا قارالىپ، كەيىننەن سول ءبىرىنشى حاتشىنى ورنىنان الىپ تاستادى. 1992 جىلدىڭ كۇزىندە شەراعاڭ رەسپۋبليكالىق تەلەراديو كورپوراسياسىنا پرەزيدەنت بولىپ اۋىسقاندا، بەلگىلى ادەبيەتشى-سىنشى ءامىرحان مەڭدەكە (بۇگىندە «جاس الاش» گازەتى باس رەداكتورىنىڭ ورىنباسارى) ەكەۋمىزدى وزىمەن ەرتە كەتتى. ءامىرحان قازاق راديوسىنىڭ ديرەكتورى بولدى، مەن «تايقازان» اتتى كوممەرسيالىق باعدارلاما اشىپ، تىڭدارمان قاۋىمعا ءارى جارنامالىق، ءارى ەكونوميكالىق اعارتۋشىلىق قىزمەت كورسەتتىم. سوندا ءوزىمىز شىققان «سق»-دا ەرجۇمان اعانىڭ «بىزدەن كەتكەن بىرەۋ – «ۆولۆا»، ەكەۋ – «ۆولگا» ءمىندى» دەگەن رەپليكاسى شىققان ەدى. مازمۇنى مەن دەرەگى دانەكۇستەۋ بولسا دا، سول جاريالانىمنىڭ تاقىرىبى كەرەمەت ەدى، سودان ەسىمدە قالىپتى. كەيىننەن قىزمەتكە «كوماندامەن كەلۋ» دەگەن تالتىرەك ءتارتىپ قالىپتاسقان كەزدە، «قازاقستان» رترك» اق-نا پرەزيدەنت بولىپ كەلگەن ءلايلا بەكەتوۆانىڭ كومانداسى شەراعاڭنىڭ شەكپەنىنەن شىققان بىزدەردى سىرىپ تاستادى دا، مەن ەكى-ۇش اي جۇمىسسىز قالدىم. ءسويتىپ جۇرگەن كەزدە ق ر مينيسترلەر كابينەتىندە باسپا ءسوز قىزمەتىن قۇرىپ جاتقان، بۇگىندە بەلگىلى ساياساتكەر ءامىرجان قوسانوۆ حابارلاسىپ، پرەمەر-مينيستردىڭ كەلىسىمىمەن قىزمەتكە شاقىردى. جاسىراتىنى جوق، كوپشىلىك ارىپتەستەرىم بىلەدى، ءامىرجان ەكەۋمىز نەمەرەلەس ءاپالى-سىڭلىلى قىزدارعا ۇيلەنگەن باجامىز. ءبىراق باجالىقتان بۇرىن ءبىر اقيقاتتى مويىنداۋ كەرەك: ءامىرجان قازاقستاندا بۇرىن-سوڭدى بولماعان باسپا ءسوز قىزمەتىن قۇردى. ماسەلەن، قازىرگى پرەمەردىڭ باسپا ءسوز حاتشىسى كىم ەكەنىن ەل-جۇرت تۇگىلى، اقپارات الاڭىنىڭ ءبىر شەتىندە جۇرگەن مەن بىلمەيمىن. قازاقستاندا ۇلكەن رەفورما جاساعان ۇكىمەتتىڭ باسپا ءسوز قىزمەتىندە ءۇش جىلدان استام ۋاقىت قازاق جاعىنا جەتەكشىلىك ەتتىم. – ول كەزدە پرەمەر-مينيستر اكەجان قاجىگەلدين ەمەس پە ەدى؟ – ءدال ايتتىڭ! قاجىگەلديننىڭ كومانداسىندا بولۋ – مەنىڭ تاعى ءبىر باقىتىم. بولاشاق ازاماتتىق كوزقاراس، قوعامداعى قاتىناستارعا دەگەن بۇلت-شالتسىز ۇستانىم مەنىڭ سانامدا سول جىلدارى قالىپتاستى. ونىڭ ءبارىن مەن اكەجان قاجىگەلديننەن ۇيرەندىم. كەيىننەن ول وپپوزيسياعا كەتىپ، پرەزيدەنتتىككە سايلانۋعا قۇقى بار ازاماتتىعىن بىلدىرگەن كەزدەگى تىم-تىراقاي قۋدالاۋ – اكەجان اعادان قورىققان ادامنىڭ قىلىعى. ونى «ۇرلاپ كەتتى»، «قىلمىس جاسادى»، ءايتتى-بۇيتتى دەگەننىڭ ءبارى – بيلىكتىڭ پروپاگانداسى. بۇگىنگى ەل-جۇرت وقيتىن باپي باسىممەن ايتايىنشى، قازاقستاندا ءدال اكەجانداي پرەمەر بۇرىن-سوڭدى بولعان ەمەس جانە بۇگىنگىلەردىڭ تىراڭ تىرلىكتەرىنە قاراپ، جۋىق جىلدارى بولمايدى دەپ ويلايمىن. كەيىنگى پرەمەرلەر مەن ولاردىڭ كابينەتتەرى – 90-جىلدارى اكەجان جاساپ كەتكەن رەفورمانىڭ قوراسىندا بۇزاۋ باعىپ، اۋلاسىندا ويناپ جۇرگەن بالا-شاعالار. بۇگىن ءبىزدىڭ ەل ەرىكسىزدەن ەۋرازيالىق وداققا كىرەيىن دەپ وتىرعان كەزدە، ءدال اكەجان – قازاقستانعا اۋاداي قاجەت ساياساتكەر. ول – سوڭعى 17 جىلدا الەمدىك دارەجەدە شىڭدالعان، حالىقارالىق قاتىناستاردىڭ ورتاسىندا بۇرق-سارق قايناعان، ورىستىڭ دا وڭ-سولىن جاتقا بىلەتىن ازامات. ونىڭ ەكونوميكالىق ورامى مەن شەشەندىك وي قيسىنى بۇگىنگى كابينەتتە جۇرگەندەردىڭ ءبارىن جالعىز قولىمەن وراپ كەتەدى. بۇل – اسىرا ايتقاندىق ەمەس. وسى ءسوزىمنىڭ دۇرىس-بۇرىستىعىن ءبىلۋ ءۇشىن سەرىكبولسىن ءابدىلدين اعانىڭ، عازيز الدامجاروۆتىڭ، دوسىم ساتپايەۆتىڭ، ءۋاليحان قايساروۆتىڭ بەدەلدى پىكىرىن تىڭداپ كورىڭىز: كەمىندە 90 پايىز اينا-قاتەسىز راستايدى. سويتكەن اكەجان قاجىگەلديندى قارسىلاستارى 1997 جىلى وتستاۆكاعا كەتىردى. تاعى دا كوماندا اۋىستى. ودان كەيىن ول كىسى قازاقستان ونەركاسىپشىلەر جانە كاسىپكەرلەر وداعىنىڭ پرەزيدەنتى بولدى: جارتى جىل سول جەردە بىرگە ىستەدىك. 1998 جىلى اكەجان قاجىگەلدين پرەزيدەنت سايلاۋىنا تۇسەتىندىگىن جاريا ەتكەننەن كەيىن قۋدالاۋ باستالدى، ونى جازىقسىز سوتتى ەتتى، اقىرى شەتەلدە باس ساۋعالاۋعا ءماجبۇر بولدى. وسىدان كەيىن بىرتىندەپ ءبىز دە وپپوزيسياعا اۋىسا باستادىق. – «دات» گازەتى وسى كەزدە اشىلدى ما؟ – ءيا، سول جىلدارى اكەجان قاجىگەلديننىڭ باسشىلىعىمەن «قازاقستاننىڭ رەسپۋبليكالىق حالىقتىق پارتياسى» قۇرىلدى جانە ەلگە بالاما اقپارات بەرەتىن تاۋەلسىز گازەت قاجەت بولدى. العاشقى باس رەداكتورى ءشارىپ قۇراقبايەۆ دەگەن بەلگىلى جۋرناليست بولدى. ءبىز ءامىرجان ەكەۋمىز سىرتتاي باقىلاۋشى بولدىق. گازەتتە حالىقتىق بيلىك، دەموكراتيا، جاريالىلىق تاقىرىپتارىن كوتەرە باستادىق. قوعامداعى كىناراتتاردى جازاتىن ەلىمىزدەگى العاشقى گازەت بولعاندىقتان، تارالىمى كۇرت وسە باستادى. 1998 جىلعى پرەزيدەنتتىك سايلاۋدىڭ قارساڭىندا ول گازەتتى ناقاق جالامەن سوتتاپ، اقىرى جاۋىپ تىندى. گازەتتى قايتا اشۋ ءۇشىن ونى باسقا اتاۋمەن تىركەتۋ كەرەك بولدى. ءبىراق «دات» دەگەن اتىن ساقتاپ قالعىمىز كەلدى. سودان سول بۇرىنعى «دات» دەگەن ماعىنانى بىلدىرەتىن «سولدات» دەگەن گازەت شىعاردىق. ونىڭ العاشقى رەداكتورى بەلگىلى قالامگەر مارات قابانبايەۆ بولدى. جارتى جىلدىڭ ىشىندە ول گازەتتىڭ تارالىمى 48 مىڭعا جەتتى. كەيىننەن بۇل گازەتتى دە سوتتىڭ شەشىمىمەن جاپتى. بۇل ەكى ارادا مەن ەكى رەت سوتتى بولدىم. – سوندا قاماۋدا وتىردىڭىز با؟ – جوق. العاشقى سوتتا شارتتى جازا كەسىلدى، ەكىنشىسىندە – ەكى جىلعا سوتتالدىم، ءبىراق قازاقستان پارلامەنتاريزمىنىڭ 10 جىلدىعىنا وراي بولعان امنيستيامەن مەنى بوساتتى. ايتسە دە بەس جىلعا جۋرناليستىك كاسىپپەن اينالىسۋعا تىيىم سالدى. ەندىگى گازەتتىڭ باس رەداكتورى بولۋ قۇقىعىنان ايىرعان سوڭ، «باس وقىرمان» دەگەن اتاۋ سول جىلدارى شىقتى. كەيىنگى ءۇش-تورت جىلدا «دات»-تىڭ ايدارىمەن «اينا پليۋس»، «جۇما-تايمس» دەگەن گازەتتەر شىعاردىق. ولار دا سوتتىڭ ناقاق شەشىمىمەن جابىلدى. «جۇما-تايمستىڭ» قۇرىلتايشىسى جۇماش كوكبورى اعا قۋدالاۋعا ۇشىراپ، سالىق پەن سوتتىڭ لاڭىنان ەكى-ۇش جىلدا ارەڭ قۇتىلدى. سودان ءبىر كۇنى اتاقتى جازۋشى اعام قابدەش ءجۇمادىلوۆ الدەبىر جيىندا كەزىگە قالىپ: «ءاي، ەرمۇرات، ەندى گازەت شىعارساڭ، اتاۋىن «تاسجارعان» قوي. تارباعاتاي تاۋىندا تاسجارعان دەگەن وسىمدىك بار، ءوزىنىڭ ساباعى جۇمساقتاۋ بولسا دا، تاستى تەسىپ وسەدى. كۇلدەن قايتا جارالاتىن فەنيكس قۇسى سياقتى سەنىڭ گازەتتەرىڭە لايىق اتاۋ» دەگەنى. جاڭا گازەتتى ءبىر جاناشىر اعايىننىڭ اتىنا تىركەتتىك. سونداعى «تاسجارعان» گازەتىنىڭ تارالىمى 68 مىڭعا دەيىن جەتتى. مۇنداي تارالىم بۇگىنگى گازەتتەردىڭ تۇسىنە كىرمەيدى. ءبىراق 2009 جىلى رومين مادينوۆ دەگەن دەپۋتات مەنىڭ ار-نامىسىما ءتيدى دەپ، «تاسجارعاندى» سوتقا بەردى. سوتتىڭ سولاقاي شەشىمىمەن بىزگە 50 ملن تەڭگە ايىپپۇل سالىنعان سوڭ، گازەت رەداكسيا­سىن بانكروت دەپ جاريالاۋعا ءماجبۇر بولدىق. ءسويتىپ جۇرگەندە «ازات» پارتياسى مەن «جسدپ» قوسىلىپ، جارماحان تۇياقبايەۆ اعا ماعان ءوزىنىڭ «وبششەستۆەننايا پوزيسيا» گازەتىن شىعارۋدى ۇسىندى. بۇعان دەيىن ول گازەت 5 مىڭ تارالىممەن شىعىپ، ونىڭ ءبىر مىڭعا تولار-تولماس داناسى عانا ساتىلىپ تۇرعان ەكەن. شۇكىرشىلىك، قازىرگى قىلشىلداعان قىمباتشىلىق زامانىندا رەسمي تارالىمىمىز 30 مىڭنان اسادى. ازىرگە عۇمىرى ۇزاعىراق بولىپ تۇرعان، 2009 جىلدان بەرى شىعىپ كەلە جاتقان – وسى گازەت. بۇل ارادا مەن وزىممەن بىرگە 16 جىل بويى «دات» گازەتتەر جوباسىن ۇزدىكسىز شىعارىسىپ كەلە جاتقان باقىتگۇل ماكىمباي قارىنداسىم مەن كەنجەتاي ايتباكييەۆ دەگەن باۋىرىما رازىمىن. كەيىن زامان وزگەرىپ، ءبىزدىڭ كوشەدە دە مەيرام بولىپ جاتقاندا، ناعىز ماراپاتقا لايىق پاتريوتتار – وسى ەكەۋى. – ەرمۇرات اعا، گازەتىڭىزدە جارناما كورىنبەيدى. ونى شىعارۋعا كىمدەر قارجىلاي كومەك جاسايدى؟ – جوعارىدا ايتقان باقىتگۇل مەن ­كەنجەدەن باسقا ەشكىم كومەك جاسامايدى. ال قارجىلىق كومەك جاعىنا كەلسەك، وقىرماننان باسقا وداقتاسىمىز جوق. ءبىز تەك قانا بازار ساتىلىمى ارقىلى كۇن كورەتىن گازەتپىز. جارناما بەرگىسى كەلەتىندەر كوپ، ءبىراق ولار وپپوزيسيالىق گازەتكە جاردەم ەتتىڭدەر دەگەن جەلەۋمەن قۋعىنعا تۇسۋدەن قورقادى. انىعىندا، بۇل – راحات الييەۆتىڭ زامانىنان قالعان ستەرەوتيپ، ايتپەسە بىرلى-ەكىلى جارناما بەرۋشىنى بىقپىرت تيگەندەي ەتكەن ەشكىمدى كورمەدىم. – «دات» گازەتىنىڭ تاريحىنا ۇڭىلگەندە، قانداي جۋرناليستەر ەسىڭىزگە تۇسەدى؟ – ءشارىپ قۇراقبايەۆتىڭ العاشقى رەداكتورلىق قىزمەتى ۇلكەن ەرلىك بولدى. ارينە، ودان كەيىن ءبىرىنشى كەزەكتە مارات قابانبايەۆ ەسكە تۇسەدى. ونىڭ ورىنباسارى عالىمجان مۇقانوۆ دەگەن مىقتى اۋدارماشى-ادەبيەتشى ەدى. بۇگىندە ەكەۋى دە مارقۇم بولدى. نەگىزى «دات»-تا ىستەگەن مىقتىلاردىڭ ءبىرازى ءارتۇرلى جاعدايدا ەرتە قايتىس بولىپ كەتتى. ارعىنعازى مادياروۆ دەگەن ءارى جۋرناليست، ءارى اكىمگەر ازاماتىمىز بولعان، ول دا بۇگىندە ورتامىزدا جوق. اسحات ءشارىپجانوۆ دەگەن وتە ءبىلىمدى، ۇشقىر جۋرناليست بولعان ەدى: ونى ماشينا قاعىپ-مىس ءولتىردى. بۇل ءولىمنىڭ قاساقانا جاسالعانىنا سەنىمدىمىن. – گازەتىڭىزدى ساتىپ الۋعا بيلىك جاقتان ۇسىنىستار تۇسپەدى مە؟ – بولدى. ءبىراق مەن كەلىسپەدىم. گازەتتى ودان ءارى دامىتۋ ماقساتىنداعى ساۋ­دا-ساتتىق بولعاندا، بالكىم، ونداي ىمى­راعا بارۋعا بولار ما ەدى؟.. ال ۇسىنىس جاساۋشىلاردىڭ ماقساتى – گازەتتىڭ ءوڭىن اينالدىرۋ، بيلىكتىڭ ىعىنا جىعىپ بەرۋ. ونداي ىمىراعا ىرىق بەرسەڭ، قالىڭ وقىرماننىڭ ءمۇد­دەسىن ساتىپ كەتكەنىڭ. بۇعان جۇرەك داۋالاۋ ءۇشىن مەن انامنان باسقا ادام بولىپ تۋىپ كەلۋىم كەرەك شىعار. – سىزدەرمەن قاتار وپپوزيسيالىق سارىندا جازاتىن قانداي گازەتتى باسەكەلەس سانايسىز؟ – بىرىنشىدەن، وپپوزيسيانىڭ ءوز ىشىندە ىرىڭ-جىرىڭ باسەكە بولسا، ونداي قوزعا­لىستىڭ قۇرىعانى دەي بەرىڭىز. ەكىنشىدەن، ازىرگە ەكى تىلدە شىعاتىن «دات»-پەن باسەكەلەسۋگە شاماسى جەتەتىن باسىلىم جوق. – قالاي ويلايسىز، جالپى قازاقستاندا وپپوزيسيا بار ما؟ – ءدال ءقازىر ونداي تۇتاسقان ۇيىم جوق. سوتتايتىنىن قاماپ، ولتىرەتىنىن اتىپ، قورقىتاتىنىن قوراعا تىعىپ، ساتىپ الاتىنىن قۋىرشاققا اينالدىرىپ – ءبارىن قۇرتىپ ءبىتتى. ءبىراق كۋحنيادا ءتىسىن قايراپ وتىرعاندار مەن الەۋمەتتىك جەلىدەگى وپپوزيسيانىڭ ەكپىنى كۇن وتكەن سايىن ءوسىپ كەلەدى. – «وبششەستۆەننايا پوزيسيا» گازەتى ەكى تىلدە شىعادى. تەك قازاق تىلىندە شىعارۋ ويىڭىزدا بولمادى ما؟ – بۇل گازەت ماعان دەيىن تەك ورىس تىلىندە شىعاتىن. مەن ونى جارتىلاي قازاقشاعا اينالدىردىم. قازاقتىڭ مۇددەسىن ورىسشا ايتۋ ءۇشىن ونىڭ ەكىنشى جارتىسىن ورىس تىلىندە قالدىردىم. ونىڭ ۇستىنە تازا قازاق تىلىندەگى گازەتتەردىڭ نارىقتا كۇن كورۋى وڭاي ەمەس. گازەتتىڭ ورىس بولىگىن مەن ورىسشام تاسىپ بارا جاتقاننان شىعارىپ وتىرعام جوق: ەلدەگى تىلدىك، نارىقتىق جاعدايدىڭ تالابى سولاي بولىپ تۇر. – ءبىزدىڭ ەل ەۋرازيالىق وداقتىڭ مۇشەلىگىنە ەندى. ال قازىرگى ۋاقىتتا اقش پەن ەۋرووداقتىڭ رەسەيدىڭ سوعىسشىل سايا­ساتىنا قارسى سالعان سانكسيالارى بىزگە اسەر ەتە مە، قالاي ويلايسىز؟ – اسەر ەتپەسە، نۇرسۇلتان نازاربايەۆ قاۋىپسىزدىك كەڭەسىنىڭ وسى ورايداعى جاسىرىن وتىرىسىن وتكىزىپ، ۇكىمەتكە سانكسيالار جاعدايىندا جۇمىس جۇرگىزۋدىڭ نۇسقالارىن جاساۋعا نۇسقاۋ بەرەر مە ەدى؟! سانكسيالىق تىزىمدەگى الدەبىر تاۋاردى ءبىزدىڭ ەلدىڭ ايگىلى جەمقورلارى رەسەيگە قاراي وتكىزىپ جىبەرگەن كۇننىڭ ەرتەڭىندە اقش-تىڭ «سرۋ»-ى ول جاعدايدى وباماعا جەتكىزەدى. ونىڭ ۇستىنە اگرەسسور ەلمەن سايا­سي ۇلگىدەگى وداقتاس بولۋ – سانكسياسىز-اق وڭىپ تۇرعان جاعداي ەمەس قوي. – تاۋەلسىزدىگىمىزگە، مەملەكەتتىگىمىزگە ءقاۋىپ ءتونىپ تۇرعان جوق پا؟ جالپى، سىرتقى كۇشتەردىڭ ىقپالىنان قالاي قورعانامىز؟ – سىرتقى كۇشتەردەن ءبىزدىڭ الاقانداي ەل اسكەردىڭ كۇشىمەن قورعانا المايدى. ءبىزدىڭ بۇكىل اسكەردىڭ سانى مەن قاۋھارى رەسەيدىڭ ءبىر اسكەري وكرۋگىنە، قىتايدىڭ جالعىز عانا ارميالىق كورپۋسىنا توتەپ بەرە المايدى. سوندىقتان ءبىز ءبىرىنشى كەزەكتە مەملەكەتتىگىمىزدى اقپاراتتىق قاۋىپسىزدىكپەن قورعاۋىمىز كەرەك. ول ءۇشىن ەڭ الدىمەن قازاقستانعا حابار تاراتاتىن رەسەيدىڭ بەس بىردەي ساياسي فەدەرالدىق تەلەارناسىنىڭ ءۇنىن ءوشىرۋ كەرەك. – ءسىز كوپ جىلدان بەرى وپپوزيسيادا ءجۇرسىز. وسى ۋاقىتتىڭ ىشىندە تۋىستارىڭىز، دوستارىڭىز سىزبەن ارالاسپاي كەتكەن جاعدايلار بولدى ما؟ جالپى، وپپوزيسياد­ا جۇرگەن ادامدا دوس بولا ما؟ – وپپوزيسيادا عانا ەمەس، كادىمگى ءومىردىڭ وزىندە ۋاقىت وتە كەلە دوستاردىڭ قاتارى بىرتە-بىرتە ەكشەلەدى. ال وپپوزيسيادا ونداي ىرىكتەلۋ بەس ەسە قاتتى قارقىنمەن جۇرەدى دەپ ويلايمىن. ماسەلەن، مەنىڭ سوت ورگانىندا قىزمەت ەتكەن ءبىر دوسىم بولدى. مەن ونىڭ ەكىنشى ۇلىنىڭ وكىل اكەسىمىن. ءبىراق بۇگىندە سوتتىڭ ۇلكەن قىزمەتىندە جۇرگەن سول «دوسىم» مەنى كورگەن جەردە تىم-تىراقاي قاشا جونەلەدى: پالەم جۇعىپ كەتەدى دەپ قورقاتىن بولۋى كەرەك. بۇل ەندى دوستىق ەمەس، ناعىز بەيشارالىق بولسا كەرەك. شىن دوستاردىڭ اراسىندا ساياسات جۇرمەيدى. ال وسى ءجۇرىسىم ءۇشىن مەنەن اينىعان تۋعان-تۋىسىم جوق..

"جۇلدىزدار وتباسى" جۋرنالى