قازاقستاندا مەملەكەت باسشىسىنىڭ تاپسىرماسىمەن «ۋاقىپ» كورپوراتيۆتى قايىرىمدىلىق قورى قۇرىلدى. قور ءارتۇرلى الەۋمەتتىك جوبالاردى قولداۋدى جۇزەگە اسىرادى. بۇل تۋرالى قازاقستان رەسپۋبليكاسى ۇكىمەتىنىڭ وتىرىسىندا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ايتتى دەپ حابارلايدى قامشى اقپاراتتىق اگەنتتىگى.
ءمينيستردىڭ ايتۋىنشا، «ۋاقىپ» قورى قازاقستان رەسپۋبليكاسى پرەزيدەنتىنىڭ تاپسىرماسىمەن قۇرىلدى. ونىڭ قىزمەتى كوممەرسيالىق ەمەس قايىرىمدىلىق ۇيىم رەتىندە الەۋمەتتىك جوبالاردى قارجىلاندىرۋعا، ءبىلىم-اعارتۋشىلىق شارالاردى جۇرگىزۋگە، سونىمەن قاتار، ءدىني بىرلەستىك قىزمەتكەرلەرلەرى جۇمىسىنىڭ تيىمدىلىگىن كوتەرۋ جانە ءدىني مەكەمەلەردىڭ قىزمەتىن قولداۋعا باعىتتالادى. «ۋاقىپ» قورىنىڭ پرەزيدەنتى بولىپ قايرات ايتباي سايلاندى.
قوردىڭ قۇرىلتايشىلارى ق ر ءدىن ىستەرى جانە ازاماتتىق قوعام مينيسترلىگىنىڭ حالىقارالىق دىندەر جانە مادەنيەتتەر ورتالىعى جانە ءدىن ماسەلەلەرى جونىندە تالداۋ جانە عىلىمي-زەرتتەۋ ورتالىعى بولىپ تابىلادى.
قامقورشىلار كەڭەس قۇرامىنا ق ر ءدىن ىستەرى جانە ازاماتتىق قوعام ءمينيسترى، پارلامەنت دەپۋتاتتارى، جوعارى مۋفتيي، «ءدىنتانۋشىلار كونگرەسىنىڭ» ءتوراعاسى، قارجى مينيسترلىگىنىڭ، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ، «اتامەكەن» كاسىپكەرلەر پالاتاسىنىڭ، «استانا» حالىقارالىق قارجى ورتالىعىنىڭ وكىلدەرى جانە بەلگىلى قوعام قايراتكەرلەرى ەندى.
قامقورشىلىق كەڭەستىڭ ءتوراعاسى ءدىن سالاسىنداعى ۋاكىلەتتى ورگاننىڭ ءبىرىنشى باسشىسى بولىپ سانالادى.
ايتا كەتەيىك، قامقورشىلىق كەڭەس قۇرامى قور جۇمىسىنىڭ اشىقتىعىن جانە قارجىنىڭ ماقساتتى جۇمسالۋىن قامتاماسىز ەتەدى. قوردى قۇرۋ بارىسىندا كاتار، كۋۆەيت، يوردانيا، ەگيپەت، يندونەزيا، تۇركيا، بەلگيا، رەسەي سياقتى ەلدەردىڭ تاجىريبەلەرى جان-جاقتى زەرتتەلدى.
قوردىڭ الدىندا تۇرعان مىندەتتەردىڭ ماڭىزدىلىعى مەن وزەكتىلىگىن ەسكەرە وتىرىپ، ق ر ءدىن ىستەرى جانە ازاماتتىق قوعام ءمينيسترى اتالعان جوبانى جان-جاقتى قولداۋعا شاقىردى.
«ۋاقىپ» قورىنىڭ قىزمەتى كەلەسى مىندەتتەردى شەشۋگە باعىتتالعان:
- ەلدەگى بەيبىتشىلىك پەن تۇراقتىلىقتى قامتاماسىز ەتۋگە ۇلەس قوسۋ؛
- تۇرعىنداردىڭ الەۋمەتتىك از قامتىلعان توبى مەن مۇمكىندىگى شەكتەۋلى ازاماتتارعا كومەك كورسەتۋ؛
- بالالار مەن جاستاردىڭ فيزيكالىق جانە ينتەللەكتۋالدىق دامۋىن قولداۋ؛
- ءدىني راديكاليزم مەن ەكسترەميزمنىڭ الدىن-الۋ؛
- مامانداردىڭ بىلىكتىلىگىن كوتەرۋ جانە شالعايدا ورنالاسقان ءدىني بىرلەستىكتەردىڭ الەۋمەتتىك ماسەلەلەرىن شەشۋ.
وسى اتالعان مىندەتتەردى شەشۋگە ساۋاپتى ءىس جاساۋعا نيەت بىلدىرگەن ەلدىڭ بارلىق ازاماتتارى، قازاقستاننىڭ كوممەرسيالىق جانە كوممەرسيالىق ەمەس ۇيىمدارى، سونداي-اق، شەتەلدىك جانە حالىقارالىق ۇيىمدار شاقىرىلادى.
«ۋاقىپ» قورىنىڭ وكىلدەرى ازاماتتار قايىرىمدىلىق قولداۋدى قارجىلاي، جىلجىمالى جانە جىلجىمايتىن مۇلىك تۇرىندە كورسەتە الاتىندىعىن اتادى.
