11 شىلدە كۇنى ساتپايەۆ قالاسىنىڭ اكىمدىگىندە توبەلەس بولدى، دەپ جازادى Qamshy.kz اقپارات اگەنتتىگى.

الەۋمەتتىك جەلىدە ساتپايەۆ قالاسىنىڭ اكىمدىگىندە بولعان توبەلەستىڭ ۆيدەوسى تارالدى. ۆيدەودا ءتىلشى بەرىك جاعىپاروۆ پەن ايەل ادامنىڭ جانجالداسىپ جاتقانىن بايقايمىز. جاعدايدىڭ ناقتى سەبەبىن ءبىلۋ ءۇشىن Qamshy.kz ءجۋرناليسى بەرىك جاعىپاروۆتىڭ وزىنە حابارلاسىپ، ءىستىڭ ءمان-جايىن انىقتادى.

ساتپايەۆ قالاسىنىڭ ءتىلشىسى ارىپتەستەرىمەن اكىمدىكتىڭ ورىنباسارى ايگۇل تولەنديناعا قوعامدىق ماسەلە جايىندا ايتۋ ءۇشىن بارعان. وزىنە كەرەكتى اقپاراتتى الىپ، قايتىپ بارا جاتقاندا بولمەگە بەيتانىس ايەل كىرىپ كەلىپ، بەرىك جاعىپاروۆقا تيەسىلى ۆيدەوكامەرانى تارتىپ الادى. ايەل باسقا بولمەگە قاشىپ بارا جاتقان ۋاقىتتا ونى ۇستاپ ۇلگەرگەن. ءتىلشىنىڭ ايتۋىنشا، ايەل ادام الگى ۆيدەوكامەرانى تەرەزەدەن لاقتىرىپ جىبەرمەك بولعان كورىنەدى. بەرىك جاعىپاروۆ وزىنە تيەسىلى دۇنيەنى قالاي دا قايتارماق بولعان، ءسويتىپ وقيعانىڭ سوڭى جانجالعا ۇلاستى. جاعىپاروۆتىڭ ايتۋىنشا، ول ۆيدەوكامەرا بولماسا، اتالمىش وقيعاعا بايلانىستى ءوزىنىڭ كىناسىزدىگىن دالەلدەي الماعان بولار ەدى.

كەيىن انىقتالعانداي ەر اداممەن توبەلەسكەن ايەل الەۋمەتتىك جۇمىس جونىندەگى جەتەكشى مامان بولىپ شىقتى. ءوزىنىڭ جاراقات الۋىنا بايلانىستى ءتىلشىنىڭ ۇستىنەن ارىز تۇسىرمەك نيەتتە ەكەن. الايدا بەرىك جاعىپاروۆ كۇش قولدانباعانىن ايتادى.

بۇل تۋراسىندا اقپاراتتى بەرىك جاعىپاروۆ ءوزىنىڭ فەيسبۋكتەگى پاراقشاسىنا ۆيدەولارىمەن قوسى ءبولىستى. اكىمدىككە بارعانداعى ماقساتىن دا جازىپ ءوتتى: قالادا تۇنگى 23:00-دەن كەيىن اراق ساتۋعا تىيىم سالىنعان. الايدا، ءدال اكىمدىككە ءتيىپ تۇرعان دۇكەننىڭ وزىندە ءتۇن ورتاسىندا الكوگولدىك سۋسىندار ەركىن ساتىلاتىن كورىنەدى.

تىلشىلەر ءدال وسى سۇراقتىڭ جاۋابىن الۋ ءۇشىن، اكىمدىكتىڭ وسى ماسەلە جونىندە حاباردار بولعان-بولماعانىن، ءارى شارالار قولدانۋىن تالاپ ەتۋ ءۇشىن كەلگەن. جانجال وسى اڭگىمەدەن كەيىن باستالدى.

ءتىلشىمىز ساتپايەۆ قالاسىنىڭ اكىمدىگىنە دە حابارلاسىپ كوردى. الايدا، ولار رەسمي اقپارات دايىنداپ جاتقانىن ايتىپ، ءبىراز ۋاقىتتان سوڭ جاريا بولاتىنىن ءمالىم ەتتى.

شولۋشى: گۇلىم جاقان