كۇيەۋى ونى قىز تۋا بەرگەنى ءۇشىن تاستاپ كەتكەن. ال اقىر اياعىندا بۇل وزىنە جاقسى بولعان جوق.

جۇرەك شىمىرلاتار بۇل وقيعانىڭ نەمەن اياقتالعانىن بىلگىڭىز كەلسە، Qamshy.kz اقپارات اگەنتتىگى  ۇسىنعان ءجازيرا بەگالىنىڭ فەيسبۋكتەگى كەلەسى جازباسىن وقىڭىز.

- بەرىكپەن ستۋدەنت كەزدە تانىستىم. سوڭعى كۋرستا وتاۋ قۇردىق. ەكەۋمىزدى وتباسىلىق ومىردەگى قيىنشىلىقتار ەرتە ەسەيىتتى. پاتەر جالدادىق. ءسابيلى بولدىق. تۇڭعىش قىزىمىز دۇنيەگە كەلدى. بەرىك پەرزەنتحاناعا كەلگەن سايىن مەن جاقسى كورەتىن گۇلدەردى قۇشاقتاپ كەلەدى. دارىگەرلەر تىيىم سالسا دا، ول تەرەزەدەن ءبىر قۇشاق گۇلدى كورسەتىپ، جىميىپ كۇلگەنىمە قۋانادى. كەيىن قالادان پاتەر ساتىپ الدىق. ونىڭ قىزمەتتە جولى بولدى. مەن ءتورت قىز تۋدىم. بەرىك قاباق شىتىپ، رەنجىگەنىن ەشقاشان سەزدىرگەن ەمەس. بالكىم، باقىتتان باسىم اينالىپ ءجۇرىپ، بايقاماعان شىعارمىن.

كەيىنگى كەزدەرى ونىڭ جۇمىستان كەش كەلۋى جيىلەدى. بۇرىنعىداي ەمەس قىزدارى الدىنان جۇگىرىپ شىقسا اسا قۋانبايدى. ءۇي شارۋاسىنا دا سەلسوق. ونىڭ وزگەرگەنىن كورمەۋ، سەزبەۋ مۇمكىن ەمەس ەدى. ءبىز 13 جىلدا ءبىر-بىرىمىزدى ءسوزسىز تۇسىنەتىن ەدىك. 13 جىلدان كەيىن ول ءبىزدى تاستاپ كەتتى. ءارى باسپانامىزدى ساتىپ، ءوزىنىڭ ۇلەسىن ءبولىپ الدى. قىزمەتتەس كەلىنشەك ۇل تۋىپ، تۇياق جالعاستىراتىن مۇراگەر ءۇشىن بارىنەن باس تارتقانىن ايتقاندا ونىڭ ءاربىر ءسوزى جۇرەگىمدى تىلگىلەپ جاتتى. ول قىز تۋعانىم ءۇشىن كىنا تاقتى. سۇيىكتىمنىڭ سوزدەرى سۇيەكتەن ءوتتى. ماشيناسىنا مۇلكىن تيەپ، ءۇيدى ساتىپ، اقشانىڭ تەڭ جارتىسىن ءبولىپ، قالتاسىنا سالىپ، كەتىپ قالدى.

4 بالامدى باعىپ-قاعۋ ءۇشىن كۇندىز-تۇنى جۇمىس ىستەدىم. ۋاقىت مەنىڭ جاستىعىمدى ۇرلاپ جاتتى. بالالارىما دەگەن ماحابباتىم قيىندىقتارعا مويىمايتىنداي كۇش-قۋات بەردى. ال بەرىك سول كەتكەننەن ءبىر كەلمەدى. اكەسىن ساعىنىپ، كەنجە قىزىم تالاي تابالدىرىقتا ۇيىقتادى.

تەك 30 جىلدان كەيىن بەرىك ءۇيدى تاۋىپ كەلىپتى. جۇدەگەن. ۇلى تۇرمەدە ەكى رەت جازاسىن وتەپ، بالاسىن اراشالاۋ ءۇشىن اباقتىدا ءوزى ءۇش جىل وتىرىپتى. بوستاندىققا شىققاندا ەسىرتكىنىڭ قۇلىنا اينالعان ۇلى دۇنيە -مۇلكىن ساتىپ جىبەرگەن. ايەلى دە باسقا ەركەكپەن ازاماتتىق نەكەدە تۇرىپ جاتىرمىن دەپ، ماڭايىنا جولاتپاپتى. باراتىن جەر تاپپاعان بولار. سودان بۇرىنعى دوستارىنان سۇراستىرىپ ءبىزدى تاپقان ەكەن. كەشىردىم. ءبىر بولمەنى بەردىم. ونىڭ ۇيدە جۇرگەنى ماعان دا سوققى بولسا دا نەمەرەلەرىمنىڭ اتاسى، قىزدارىمنىڭ اكەسى دەپ، ىشتەي تىندىم. بارىنە كوندىم.

ءبىر شاڭىراقتا تۇرساق تا ەكەۋمىز سويلەسپەيتىنبىز. ول جۇزىمە تىك قاراعان ەمەس. ءبىر ايدان كەيىن ۇلى ەسىرتكىدەن ۋلانىپ، قايتىس بولدى. قانشا ۋاقىت وتكەنى ەسىمدە جوق.

بىردە ول ەكى-ۇش كۇن ۇيگە قونبادى. كەيىن بىرەۋلەر ۇلكەن الماتى وزەنىنىڭ جاعاسىنان تاۋىپ، پوليسياعا حابارلاعان ەكەن." ءمايىتحانادان الىپ كەتىڭىزدەر"، - دەگەن حاباردى ەستىگەندە ەسەڭگىرەپ قالدىم. ساراپتاما جاساعاندار جۇرەك تالماسىنان كوز جۇمعان دەدى. ول تابىتتىڭ ىشىندە كىشكەنتاي بولىپ كەتكەندەي كورىندى كوزىمە. قىزدارىم، كۇيەۋ بالالارىم جەرلەدى.

ول ءبىر كۇرسىنىپ، نەمەرە ۇلىن جەتەكتەپ، اۆتوبۋستان ءتۇسىپ قالدى. بالقيا دەگەن كىسىنىڭ اڭگىمەسىنەن كەيىن قىز تۋعانى ءۇشىن وتباسىن ويران ەتكەن اكەلەر جايلى وقيعالار ويىما ورالدى. دەگەنمەن ماعان ايەلىن، قىزدارىن مۇراگەر تۋىلماعانى ءۇشىن تاستاپ كەتكەن ەركەكتەردى ءتۇسىنۋ قيىن ەكەن.