نۇرسۇلتان نازاربايەۆ شىعىس قازاقستاندىقتارمەن كەزدەسۋ بارىسىندا ءوزى جاقسى كورەتىن وڭىرگە ءجيى كەلەتىنىن اتاپ ءوتىپ، ماحاببات تۋرالى ەجەلگى ءۇندى اڭىزىن ايتىپ بەردى، دەپ حابارلايدى Qamshy.kz اقپارات اگەنتتىگى قازاقپارات مالىمەتىنە سۇيەنىپ.

ايتا كەتكەن ءجون، تۇرعىندارمەن كەزدەسۋ كەزىندە ماحاببات تاقىرىبى كۇتپەگەن جەردەن قوزعالدى. پرەزيدەنتتىڭ: «قالدارىڭىز قالاي؟» دەگەن سۇراعىنا قازاقستان-امەريكا ەركىن ۋنيۆەرسيتەتىنىڭ پرورەكتورى مارينا كيكينا: «ءسىزدى اسىعا كۇتتىك، قوبالجىپ تۇرعانىمىزدى جاسىرمايمىن، سىزبەن كەزدەسكەنىمىزگە وتە قۋانىشتىمىز»، - دەپ اعىنان جارىلدى. «سيرەك جولىققان سايىن، ماحابباتىمىز ساقتالا تۇسەدى»، - دەپ كۇلدى پرەزيدەنت، ەلىمىزدىڭ شىعىسىنا ءجيى ساپارلايتىنىن اتاپ ءوتىپ، وسيەت اڭگىمە ايتىپ بەردى. «جاس جۇبايلار ۇيلەنگەن تويىنان كەيىن كولدىڭ جاعاسىندا تۇرۋعا كەلەدى جانە قاراما-قارسى جاعالاۋدا قونىستانۋدى ءجون كورەدى.

جاس كەلىنشەك: «ەلەستەتىپ كورشى، ساياباقتا سەرۋەندەپ ءجۇرىپ، كەزدەسىپ قالامىز جانە سەنى ءبىر شىناياق ءشاي ىشۋگە شاقىرا الامىن. ەگەر سەن ونى قالاماساڭ - ءوز ەركىڭ. قايىقتا ءجۇزىپ كەلە جاتىپ، قايىعىمىز ءتۇيىسىپ قالادى جانە قوناققا بارۋ ءۇشىن جاعالاۋلاردىڭ بىرىنە ايالدايمىز. وسىلايشا، ءبىز بىر-بىرىمىزگە دەگەن ىنتىزارلىقتى ساقتاي الامىز». ەرى ويلانا كەلە، بۇل ۇسىنىسقا كەلىسىم بەرمەيدى. جىلدار ءوتىپ، ماحابباتتىڭ ىنتىزارلىعى باسەڭدەدى. ويتكەنى ول تاڭداۋ جاساعاندا قاتەلەستى»، - دەدى نۇرسۇلتان نازاربايەۆ.