بۇگىن باتىسقازاقستاندىق دەلەگاسيامەن بىرگە ەتنواۋىلداعى قولونەر شەبەرلەرىنىڭ تۋىندىلارى مەن مۋزەي جادىگەرلەرىن كورگەن وبلىس اكىمى التاي كولگىنوۆ كورمەلەر جۇمىسىنا وڭ باعاسىن بەردى. دەلەگاتتارعا قولونەر شەبەرى تولەپبەرگەن سارمانبەكوۆ زەرگەرلىك بۇيىمدارىن كورسەتسە، ەربولات مۇساعالييەۆ بىلعارىدان جاسالعان اياق كيىمدەر مەن بەلبەۋلەردى نازارعا ۇسىندى. كورمەدە اسىلان سارىبايەۆ ويۋمەن ادىپتەلگەن اعاش تۇعىرعا اسەم دومبىرالاردى ورناتىپتى. بۇعان دەيىن حابارلاعانىمىزداي، ەتنواۋىلدا قوستاناي وبلىسىنان كەلگەن شەبەرلەردىڭ بۇيىمدارى دا قوڭسىلاس تىگىلگەن كيىز ۇيلەر ىشىندەگى كورمەگە قويىلعان.

«جاڭا تەحنولوگيامەن اعاشتان جانە تەرى مەن جۇننەن وڭدەلگەن ۇلتتىق بۇيىمدارىمىزدى اكەلدىك. باتىسقازاقستاندىق ارىپتەستەردىڭ كەراميكالىق ىدىستارى مەن اسەم ورنەكتەلگەن كادەسىيلارى، اشەكەي تاستارى كوڭىلىمىزدەن شىقتى. «ەكسپو - 2017» كورمەسىنە بايلانىستى  شەبەرلەر جارمەڭكەسىن ىنتىماقتاسا وتكىزىپ جاتىرمىز»، – دەدى وبلىس باسشىسى التاي كولگىنوۆكە قوستانايلىق سۋرەتشى-بەزەندىرۋشى ارنا اڭقاۋوۆ.

ءبىزدىڭ وبلىستىڭ دەلەگاسياسى كەيىن وبلىستىق تاريحي-ولكەتانۋ مۋزەيى ۇسىنعان ەكسپوزيسيالىق بۇيىمدارىن تاماشالادى. مۋزەي ديرەكتورى ميربولات ەرسايەۆ ءوڭىردىڭ تاريحي جادىگەرلەرىنە ۇلىبريتانيا، يتاليا، رەسەي، ۆەنگريا، جۇڭگو، بەلگيا ەلدەرىنىڭ تۋريستەرى قىزىعۋشىلىق تانىتقانىن  ايتتى. ونىڭ قاتارىندا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (OSCE) استاناداعى باعدارلامالار ءوفيسىنىڭ باسشىسى، ەلشى دەرد سابو دا وڭ باعاسىن بەرگەن.

– ەلباسىمىز رۋحاني جاڭعىرۋ تاريحىمىزدان باستاۋ الاتىنىن ايتقانى ءمالىم. ياعني، مەملەكەت باسشىسى «ۇلتتىق مادەني ساقتالماسا، ەشقانداي جاڭعىرۋ بولمايتىنىن» اتاپ ءوتتى. سوندىقتان ۇلتتىق ناقىشتا بەزەندىرىلگەن قولونەر تۋىندىلارى مەن ولكە تاريحىنان تەرەڭ سىر شەرتەتىن مۋزەي ەكسپوزيسيالارىن رۋحاني-مادەني قۇندىلىق رەتىندە قاستەرلەۋگە  ءتيىسپىز،  – دەدى شارا بارىسىندا وبلىس اكىمى التاي كولگىنوۆ.