قازاقتىڭ نەمەسە تاۋەلسىز قازاقستاننىڭ جاڭا جىلى – 22 ناۋىرىز. ەندەشە ءار جىلدىڭ 1 قاڭتارىن الاقايلاپ قارسى الۋ ابىرويسىزدىقتان باسقا تۇك تە اكەلمەيدى. سوندىقتان ول كۇندى ۇمىتايىق. اتىن دا اتامايىق. ۇمىتۋدىڭ باسى – «جاڭا جىل» دەگەن ءسوزدى ناۋرىزعا دەيىن قاپەرىمىزگە الماۋدان باستالسىن! بۇعان ءوزىن تاۋەلسىز ەلدىڭ ءباسپاسوزىمىن دەپ ەسەپتەيتىن گازەت-جۋرنال مەن تەلەارنالار، تاۋەلسىز ەلدىڭ ءسوز ۇستارىمىن دەيتىن كەز كەلگەن  جۋرناليست پەن قالامگەر قۋانا كەلىسەدى دەپ سەنەمىز.

ەلباسى ن.نازاربايەۆتىڭ ءوزى: «تۇپتەپ كەلگەندە ءبىزدىڭ ناعىز جاڭا جىلىمىز وسى ناۋرىز بولۋى قاجەت… تۇبىندە وسى مەرەكەگە كەلۋىمىز كەرەك. بۇل حالقىمىزدىڭ، تاۋەلسىزدىگىمىزدىڭ ەڭ نەگىزگى تامىرىنىڭ ءبىرى بولىپ سانالادى» دەپ ەدى. مەملەكەت باسشىسىنىڭ اۋىزىنان شىققان ءار ءسوزىن قۇرانداي جاتتاپ الاتىن شەنەۋنىكتەردىڭ ءدال وسى «ناۋىرىزعا» نەمەسە ءتىل ماسەلەسىنە، ۇلت مۇددەسىنە قاتىستى اڭگىمەلەرگە كەلگەندە تاس كەرەڭ بولىپ قالاتىنى بەلگىلى جايت. مەيلى ونداي قاعىنان جەرىگەندەردى «تەكسىز» دەيىك، «ماڭگۇرت» دەيىك. ءبارىبىر جۇرەكتەرى تۇمشالانعان. سوندىقتان بار سالماق ەڭ الدىمەن قازاق جۋرناليستەرىنە تۇسەتىنى ايدان انىق.

مۇحتار تايجان اعامىز بۇدان كەيىن ورىس تىلىندە سۇحبات بەرۋدەن باس تارتتى. بۇل ناقتى قادام. قازاق جۋرناليستەرىنە دە سول كەرەك. 1 قاڭتاردى «جاڭا جىل» دەپ ايتقىسى كەلگەندەر ايتسىن، جازعىسى كەلگەندەر جازسىن. ءبىر اپامىز: «ءوزىڭنىڭ كوزىڭ كوك، ءسوزىڭ كوپ ەكەن» دەپ ەدى ورىسشا سويلەگەن بىرەۋگە. سول ايتپاقشى ءسوزدى كوبەيتپەيىك. وزىمىزدەن باستايىق. «قامشى» پورتالى ناۋرىزعا دەيىن ياعني 1 قاڭتاردىڭ الدى ارتىندا «جاڭا جىل» دەگەن ءسوزدى جازۋدان، ايتۋدان باس تارتادى. مەيلى ول «جاڭا جىلعا» قارسى جازىلعان ماقالا بولسا دا...

باستى ماقسات – ەلەمەۋ.

سۋرەت عالامتوردان الىندى