«قارلىق» جازدىم قاتىرىپ،

قالام ۇشىن باتىرىپ.

وسى جازعان قارلىقتى

ورىندارسىڭ اسىرىپ...

ءبىر شوكولود، ەكى جەمىس شىرىنى نەمەسە تەاترعا، كينوعا بيلەت...

نەگىزگى ءماتىن وسى بولاتىن. نە قالاساڭىزدا قاعازعا جازىپ، «قارلىق» تالاپ ەتكەن ادامىڭىزعا بىلدىرمەي جانقالتاسىنا نەمەسە سۋمكاسىنا، ايتەۋىر سول كۇنى كوزىنە تۇسەتىن ءبىر ىڭعايلى ورىنعا قوياسىز. بۇل قىتايداعى قازاق جاستارىنىڭ ورتاسىنا كەڭ تارالعان «سالتتىڭ» ءبىرى.

«قارلىق» – العاشقى قار جاۋعان كۇنى سىيلاس دوسىڭىزعا نەمەسە سۇيگەن جىگىتىڭىزگە، ءتاۋىر كورەتىن اعاڭىزعا، ايتەۋىر ەتجاقىن ادامىڭىعا ايتاتىن ادەمى ءوتىنىش حاتتىڭ ءتۇرى. ونىڭ مىناداي ەرەكشەلىكتەرى بار:

«قارلىق» جازعان تىلكىمدەي قاعازىڭىزدى قارسى جاق  وڭاشا قالعاندا نەمەسە سىزدەن الىستاعاندا قاپەرىنە ىلىگەتىندەي ەتىپ، جاسىرىپ بەرۋىڭىز كەرەك. «جاسىردىم» ەكەن دەپ قاتتى قالتارىسقا سالساڭىز مۇلدەم كوزگە تۇسپەي قالۋى دا عاجاپ ەمەس. وندا ءوتىنىشىڭىز ورىندالماي قالادى. سەبەبى «قارلىقتىڭ» مەرىزمى – سول العاشقى قار جاۋعان ءبىر كۇن.

«قارلىقتى» قىزىقتى، تارتىمدى ەتىپ جازۋ وزىڭىزگە بايلانىستى. ءتىپتى سوزىنە يلاندىرا الماي جۇرگەن سۇيگەن قىزىنان سول كۇنى «ماقۇلدىق» الاتىن پىسىق جىگىتتەردە بار. ويتكەنى «قارلىقتى» ورىنداۋ – ءوز الدىنا «سەرت». ۇرىسىپ قالعان دوسىمەن دە العاشقى قاردى قاتار باسىپ، ارقا-جارقا بولىپ جاتاتىندار دا جوق ەمەس.

ەڭ باستىسى – بۇل ەرىكتى «ويىن». قالاساڭىز جازاسىز... قالاساڭىز ورىندايسىز. قاتىپ قالعان ەشقانداي ءتارتىپ جوق. ايتپاقشى، كەيىنگى كەزدەرى «قارلىقتى» SMS پەن نەمەسە اگەنت ارقىلى جازاتىندار دا شىقتى. اسىلى، حاتپەن جازىلعانى قىزىق شىعار...

سۋرەت عالامتوردان الىندى