بۇگىن ۇكىمەتتىڭ باسپا ءسوز ورتالىعىنداعى بريفينگ بارىسىندا ق ر ءبىلىم جانە عىلىم ۆيسە-مينيسترى بيبىگۇل اسىلوۆا «نۇرلى جول» ينفراقۇرىلىمدى دامىتۋدىڭ مەملەكەتتىك باعدارلاماسىن ىسكە اسىرۋ بارىسى تۋرالى مالىمدەدى. بۇل تۋرالى Qamshy.kz اقپارات اگەنتتىگى پرەمەر-مينيستردىڭ باسپا ءسوز قىزمەتىنە سىلتەمە جاساپ حابارلايدى.

بيبىگۇل اسىلوۆا «نۇرلى جول» مەملەكەتتىك باعدارلاماسىن ىسكە اسىرۋ بارىسىندا «ءبىلىم بەرۋ سالاسىنىڭ ينفراقۇرىلىمىن دامىتۋ» باعىتى بويىنشا بيىل ۇلتتىق قوردان بارلىعى 71،7 ملرد. تەڭگە بولىنگەنىن حابارلادى، ولاردىڭ ىشىندە: 26،5 ملرد.تگ 2016 جىلى باستالعان 53 مەكتەپتىڭ قۇرىلىسىن اياقتاۋعا، 45،2 ملرد. تگ جاڭا 56 مەكتەپتىڭ قۇرىلىسىنا بولىنگەن.

«1 تامىزداعى جاعداي بويىنشا اكىمدىكتەرگە 41 156 ملن. تەڭگە اۋدارىلعان، ولاردىڭ 38 606 ملن. تەڭگەسى نەمەسە 94%-ى يگەرىلگەن.

ۆيسە-مينيستردىڭ ايتۋىنشا، 1 تامىزداعى جاعداي بويىنشا 7 مەكتەپ پايدالانۋعا بەرىلگەن، الماتى، جامبىل، قاراعاندى وبلىستارىندا 1 مەكتەپتەن، وقو-دا 4 مەكتەپ جانە ماڭعىستاۋ وبلىسىنىڭ جاڭاوزەن قالاسىندا 320 ورىنعا ارنالعان بالاباقشا پايدالانۋعا بەرىلدى. 2017 جىلدىڭ سوڭىنا دەيىن 80 مەكتەپتى وتكىزۋ جوسپارلانعان.

«بۇگىندە ۇلتتىق ءبىلىم بەرۋ دەرەكتەر بازاسى بويىنشا ەلىمىزدە 64 اپاتتى مەكتەپ پەن ءۇش اۋىسىمدا وقىتاتىن 127 مەكتەپ بار. ولاردىڭ قاتارىنان 41 اپاتتى مەكتەپ پەن ءۇش اۋىسىمدا وقىتاتىن 62 مەكتەپ 2015 جىلدان قالعان جانە تاعى 23 اپاتتى مەكتەپ پەن ءۇش اۋىسىمدا وقىتاتىن 65 مەكتەپ انىقتالدى»، –  دەدى بيبىگۇل اسىلوۆا.

2017-2018 جىلداردىڭ قورىتىندىسى بويىنشا اپاتتى مەكتەپتەردىڭ ورنىنا 51 مەكتەپ پايدالانۋعا بەرىلەدى جانە 90 مەكتەپ ءۇش اۋىسىمدى ءبىلىم بەرۋدى جويادى، ولاردىڭ ىشىندە 116 مەكتەپ ۇلتتىق قور ەسەبىنەن تۇرعىزىلادى.