دجەين ورۆيس. «تەرەزە»
ريتانىڭ جان تۇرشىگەرلىك قازاسىنان سوڭ...
سودان بەرى كارتەر تەرەزە الدىندا وتىر. ەشقانداي تەلەديدار، وقۋ، حات الماسۋسىز. ونىڭ ءومىرى – پەردە ارتىنان نە كورىنسە – سول.
كىم تاماق اكەلەدى، ەسەپشوتتى كىم تولەيدى – وعان ءبارىبىر. بارىنە تۇكىرگەنى بار جانە بولمەسىن تاستاپ كەتپەيدى. ونىڭ ءومىرى – جۇگىرگەن دەنە شىنىقتىرۋشىلار، جىل مەزگىلىنىڭ اۋىسۋى، ءجۇرىپ-تۇرعان اۆتوبۋستار مەن ريتانىڭ ەلەسى. كارتەر ۇزىكپەن قاپتالعان پالاتا ىشىندە تەرەزە جوقتىعىن تۇسىنبەيدى.
لاريسا كەركلەند. «ءسوز سالۋ»
جۇلدىزدى ءتۇن. ۋاقىتى كەلگەن ءسات. شام جارىعىمەن كەشكى اس. موپ-موماقان يتاليالىق مەيرامحانا. توگىلە تۇسكەن كىشكەنە قارا كويلەك. تاڭعاجايىپ شاش ۇلگىسى، جارقىراعان كوزدەر جانە وعان جالعاس كۇمىس كۇلكى. ەكى جىل بىرگەمىز. عاجايىپ ۋاقىت! شىنايى ماحاببات، ەڭ جاقسى دوسىم... باسقا ەشكىم جوق. شامپان! قولىمدى دا، جۇرەگىمدى دە ۇسىنىپ تۇرمىن. ءبىر تىزەرلەپ. ادامدار قاراۋدا؟ وندا تۇرعان نە بار، قاراي بەرسىن! كوزدىڭ جاۋىن العان گاۋھار جۇزىك. القىزىل بەت، عاجايىپ جىميۋ. قالايشا، جوق؟!
چارلز ەنرايت. «ەلەس»
ورىن العان جايتتان سوڭ بىردەن ايەلىمە قايعىلى حاباردى جەتكىزگىم كەلىپ ۇيگە اسىقتىم. ءبىراق، ول مەنى تىپتەن تىڭداپ وتىرماعان كورىندى. ول مەنىڭ بار-جوعىمدى دا ەلەمەدى. مەنىڭ ارت جاعىما كوز تاستادى دا، وزىنە شاراپ قۇيىپ الدى. تەلەديدار قوستى. وسى ۋاقىتتا تەلەفون قوڭىراۋى شىلدىر ەتە قالدى. جاقىنداپ بارىپ، تەلەفون تۇتقاسىن الدى. مەن ونىڭ قاباعى قالاي شىتىلىپ بارا جاتقانىن كوردىم. ول اششى جىلاپ جىبەردى.
ەندريۋ ە. حانت. «العىس»
جاقىندا عانا قايىرىمدىلىق قورىنان كەلگەن ءجۇن ودەيالو يىعىنان جايلى قۇشاقتاپ، جايماشۋاق سەزىمگە بولەدى. ال قوقىس جاشىگىنەن بۇگىن تاۋىپ العان باتەڭكەلەر مۇلدەم اياقتى قىسپاۋدا. كوشە وتتارى باستان وتكەن بارشا قاراڭعى تۇنەكتەن سوڭ جانعا جايلى جىلۋ سىيلاپ تۇر...
اعاش وتىرعىشتاردىڭ بەلى شارشاپ-شالدىققان ارقاسىنا سونشالىقتى تانىس بولىپ كورىندى. "راقمەت ساعان، ءتاڭىرىم، – ويلاندى ول، – ءومىر نەتكەن تاماشا!"
برايان نيۋەلل. «ءىبىلىستىڭ قالاۋى»
ىرگەسىن اۋلاق سالعان ىبىلىسكە ەكى بالا قاراپ تۇرىپ قالدى. گيپنوزدى كوزدەردىڭ جارقىلى باستارىن ءالى تۇمانداتىپ تۇر.
– تىڭدا، ول سەنەن نە قالادى؟
– مەنىڭ جانىمدى. ال سەنەن؟
– تەلەفون-اۆتوماتقا مايدا تيىن-تەبەن سۇرادى. تەز ارادا حابارلاسۋى كەرەك ەكەن.
...
– كەتتىك، تاماقتانعىڭ كەلىپ تۇر ما؟
– ءيا، ءبىراق مەنىڭ قالتامدا كوك تيىن قالمادى عوي.
– ەشتەڭە ەتپەيدى. مەندە جەتەرلىك.
الان ە. مايەر. «قىرسىق»
مەڭدەتكەن اۋىر دەرتپەن بىرگە كوزىمدى اشتىم. كوزىمدى اشىپ ەدىم، كەرەۋەت قاسىنان مەدبيكەنى كوردىم.
– فۋدجيما مىرزا، – دەدى ماعان قاراپ، – ءسىزدىڭ جولىڭىز بولدى. ەكى كۇن بۇرىنعى حيروسيمانى بومبالاۋ كەزىندە امان قالدىڭىز. ەندى ءسىز ءقازىر اۋرۋحاناداسىز. ەندى سىزگە ەش ءقاۋىپ جوق.
السىزدىكتەن ال-دارمەنىم قۇرىپ جاتىپ، سۇراپ ۇلگەردىم:
– مەن قايدامىن؟
– ناگاساكيدەسىز، – دەپ ول ءتىل قاتتى.
دجەي ريپ. «تاعدىر»
ءبارىن باسقالاي شەشۋ ءۇشىن بىزدە ءبىر عانا جول قالعان بولاتىن. ايتپەگەن جاعدايدا ءومىرىمىز شىرماۋىق تۇستەس ءبىر تورعا شىرمالىپ، بارلىق راقاتتان قۇر قالاتىن ەدىك.
جەرەبەگە سەنىپ تاپسىردىق: بۇركىت - وندا ءبىز ۇيلەنەمىز، شىك - وندا ءبىز ماڭگىلىك ايىرىلىسامىز. مانەت تاستالدى. جەر ۇستىندە اينالىپ، تولعانىپ بارىپ توقتاي قالدى. بۇركىت. ەكەۋمىز ەش تۇسىنبەي قاراپ قالدىق. ارتىنشا، ءبىر ۋاقىتتا ءبىر ءسوزدى ايتىپپىز:" مۇمكىن، تاعى ءبىر مارتە؟"
روبەرت تومپكينس. «شىندىقتى ىزدەۋ جولىندا»
اقىرى وسى ءبىر تىپ-تىنىش، وڭاشا جاتقان ەلدى-مەكەندە ونىڭ ساپارى اياقتالدى. ەسكى ءۇيدىڭ ەسىك الدىندا وت جاعىپ شىندىق وتىر. ول ومىرىندە مۇنان اسقان كارى ءارى ۇسقىنسىز ايەل بالاسىن كورگەن ەمەس.
– ءسىز – شىندىق؟
بەت-اۋزى اجىمدەنىپ كەتكەن كارى قاقپاس سالتاناتتى تۇردە باس يزەدى.
– ايتساڭىزشى، مەن الەمگە نەنى جەتكىزۋىم كەرەك؟ قانداي حابار الىپ بارايىن؟
كەمپىر وتقا تۇكىردى دە ءتىل قاتتى:
– ولارعا مەنىڭ ادەمى ءارى جاس ەكەنىمدى ايتا بار!
اۆگۋست سالەمي. «زاماناۋي مەديسينا»
كوزدى شاعىلىستىرعان فار شامى، ەستەن تاندىرعان ساي-سۇيەكتىڭ سىقىرى، سۇيەكتەن وتكەن سىزات، شەگىنە جەتكەن جان قيناۋ، ازاپ، سودان كەيىنگى جىپ-جىلى، ءتان ەلىتكەن تازا كوك ساۋلە. دجون ءوزىن مۇنشاما باقىتتى، جاپ-جاس، ەركىن سەزىنىپ كورگەن ەمەس. ساۋلەلى شۇعىلاعا جاقىنداي ءتۇستى. دەرت پەن قاراڭعىلىق ەرتەلى-كەش قايتا ورالدى. دجون جايمەن بولسا دا، ۇلكەن كۇشپەن ءىسىنىپ كەتكەن كوزىن اشتى. بينتتەر، ءتۇسىنىپ بولماس ترۋبكالار، گيپستەر. ەكى اياق بۇرىن-سوڭدى جوق بولعانداي. جىلامسىراعان جارى.
– سەن امان قالدىڭ، قىمباتتىم!
دەرەككوز: massaget.kz
