ءماجىلىس ءتوراعاسى نۇرلان نىعماتۋلين يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءسامميتى بارىسىندا بوسنيا جانە گەرسەگوۆينا پرەزيدەنتتىگى پرەزيديۋمىنىڭ ءتوراعاسى ب. يزەتبەگوۆيچپەن كەزدەستى، دەپ حابارلايدى Qamshy.kz اقپارات اگەنتتىگى ءماجىلىستىڭ باسپا ءسوز قىزمەتىنە سىلتەمە جاساپ.

ءماجىلىس سپيكەرى ەكى ەل اراسىندا ديپلوماتيالىق قاتىناستىڭ ورناعانىنا 20 جىل تولعان جانە يسلام ىنتىماقتاستىعى ۇيىمىنىڭ ءسامميتى اياسىندا ءوتىپ جاتقان كەزدەسۋدىڭ ماڭىزدىلىعىنا توقتالا كەلىپ، مارتەبەلى مەيماننىڭ بۇل جولعى ساپارى ءوزارا ىنتىماقتاستىقتى تەرەڭدەتۋگە ىقپال ەتەتىنىن اتاپ ءوتتى.  

بوسنيا جانە گەرسەگوۆينا قازاقستاننىڭ بالقان ايماعىنداعى ماڭىزدى ارىپتەسى بولىپ تابىلادى.

ن. نىعماتۋلين قازاقستان پرەزيدەنتى نۇرسۇلتان نازاربايەۆتىڭ تاۋەلسىزدىك العان كۇننەن باستاپ، ازيا ەلدەرىمەن، سونىڭ ىشىندە، يسلام ىنتىماقتاستىق ۇيىمى اياسىندا ىقپالداستىقتى كۇشەيتۋگە ەرەكشە نازار اۋدارىپ كەلە جاتقانىن ايتتى.

21 عاسىرداعى تەحنولوگيالىق جاڭالىقتار، ءبىلىم جانە يننوۆاسيالىق عىلىم جارقىن بولاشاقتىڭ كەپىلى. سول ءۇشىن قازاقستان پرەزيدەنتى اتالعان ءسامميتتى وتكىزۋ تۋرالى باستاما كوتەرگەنىن العا تارتقان ءماجىلىس ءتوراعاسى ماڭىزدى شارا يىۇ مۇشە-مەملەكەتتەردىڭ تامىرلاستىعىن تەرەڭدەتۋگە تىڭ سەرپىن بەرەتىن بولادى دەدى.

ءوز كەزەگىندە ب. يزەتبەگوۆيچ قازاقستاننىڭ تەحنولوگيالىق جوعارى جەتىستىكتەرى قىزىقتىراتىنىن جانە ەكى ەلدەر اراسىنداعى ارىپتەستىكتى نىعايتۋعا اسا مۇددەلى ەكەنىن جەتكىزدى.   

تاراپتار حالىقارالىق جانە پارلامەنتارالىق ىنتىماقتاستىق جايىنا دا باسا كوڭىل ءبولىپ،  زاڭنامالىق تاجىريبە الماسۋ جايىن ءسوز ەتتى.