دەنساۋلىق ساقتاۋ سالاسىندا ادامنىڭ اعزا مۇشەسى مەن تىندەرىن اۋىستىرۋ مەديسينانىڭ ءىرى جەتىستىگى بولىپ سانالادى. بۇگىندە الەمنىڭ وزىق مەملەكەتتەرىمەن بىرگە ەلىمىزدە دە مۇشە ترانسپلانتاسياسى ءساتتى جۇرگىزىلىپ كەلەدى.
مۇشە ترانسپلانتاسياسىن قاراپايىم تىلمەن جەتكىزەر بولساق، ءبىر ادامنىڭ مۇشەسىن ەكىنشى ادامعا اۋىستىرۋ دەگەندى بىلدىرەدى. ياعني دونوردىڭ ءوز كەلىسىمىمەن وزگە ادامعا مۇشەسىن بەرۋى. وسى ورايدا ايتا كەتەتىن جايت، جالپى بۇيرەك ترانسپلانتاسياسىنا ءتىرى ادام دونور بولا السا، جۇرەك، باۋىر سياقتى دەنە مۇشەلەرى بەلگىلى ءبىر جاعدايدا كوز جۇمعان ادامنان عانا الىنادى. باتىس قازاقستان وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن كەلىپ تۇسكەن مالىمەت بويىنشا، وبلىستا 31 ناۋقاس بۇيرەگىن الماستىرعان. ونىڭ 26-سىنىڭ وتاسى ەلىمىزدە جاسالسا، بەسەۋى الىس شەتەلدە جاسالعان. ءقازىر ولاردىڭ بارلىعىنىڭ جاعدايى قاناعاتتانارلىق. بۇگىنگى تاڭدا وڭىردە 99 ادام بۇيرەگىن الماستىرۋ ءۇشىن كۇتۋ پاراعىنا تىركەلگەن. وبلىستىق دەنساۋلىق ساقتاۋ باسقارما باسشىسى قانات توسەكبايەۆتىڭ ايتۋىنشا، 2017 جىلدىڭ ءساۋىر ايىندا بۇيرەك الماستىرۋعا ارنالعان كۇتۋ پاراعىنا ەسەپكە قويۋ ءۇشىن وبلىستىق قان ورتالىعى مەن ەكى دياليز ورتالىعىنا، ياعني «نەفروس-ازيا»-عا 79 ادام، «بيوس» -قا 20 ادام قان تاپسىرعان. بۇيرەك الماستىرۋدان كەيىن رەسيپيەنتتەردى ەسەپكە الۋ مساك ۇيىمدارىندا جۇرگىزىلىپ، مۇندا ولارعا يممۋنوسۋپرەسسيۆتىك پرەپاراتتار بەرىلەدى ەكەن. ال نەفرولوگتىڭ كونسۋلتاسياسى تاۋلىك بويى جۇرگىزىلىپ، شۇعىل جاعدايلاردا نەفرولوگيالىق توسەكتەرگە جاتقىزىلادى. سونداي-اق وڭىردە جىلىنا 500-دەن استام كۇردەلى جوعارى مامانداندىرىلعان وتالار جاسالىنۋدا. اتاپ ايتساق، تراۆماتولوگيادا جامباس جانە تىزە بۋىندارىن ەندوپروتەزدەۋ، ارتروسكوپيالىق وتالار، ال نەيروحيرۋرگيادا ومىرتقا جاراقاتى كەزىندە، تامىر حيرۋرگياسىندا جانە كارديولوگيا كۇردەلى وتالار ءساتتى جۇرگىزىلىپ كەلەدى. ەلىمىزدە 2013 جىلدان باستاپ دونورلارى تۋىس بولىپ كەلەتىن ناۋقاستارعا ترانسپلانتاسيا وتاسى جاسالا باستاعان بولاتىن. 2013 جىلى بەسەۋ، 2014 جىلى جەتەۋ، 2015 جىلى التاۋ، 2016 جىلى بەس وتا جاسالسا، ونىڭ بىرەۋىنە تەرىس ناتيجە كورسەتىپ، گەمودياليزگە كەرى قايتارىلعان. ال 2017 جىلدىڭ سەگىز ايىندا بۇيرەك الماستىرىلعان ءتورت ناۋقاستىڭ ەكەۋى ءبۇلدىرشىن ەكەن.
گۇلىم اقاپ،
باتىس قازاقستان وبلىسى
پىكىر قالدىرۋ