حاديشا بوكەيەۆا اتىنداعى قازاق دراما تەاترىندا باتىس قازاقستان وبلىستىق كلينيكالىق اۋرۋحانانىڭ 150 جىلدىعى سالتاناتتى تۇردە اتالىپ ءوتىلدى.
مەرەكەلىك كەشكە اتالمىش مەكەمەنىڭ ارداگەرلەرى مەن قىزمەتكەرلەرى قاتىستى. شارا اۋرۋحانانىڭ تاريحى، بۇگىنگى جەتىستىكتەرى مەن سالا ارداگەرلەرىنىڭ ەستەلىكتەرىنەن قۇرالعان بەينەفيلمدى تاماشالاۋدان باستالدى.
- سوناۋ 1867 جىلى قۇرىلعان التى كەرەۋەتتىك ستاسيونار بۇگىندە 150 جىلدىق تاريحى بار، ۋاقىت تالابىنا ساي ىرگەلى مەكەمەگە اينالىپ وتىر. ەلباسىمىزدىڭ «بولاشاققا باعدار: رۋحاني جاڭعىرۋ» اتتى ماقالاسىندا جازىلعانداي، بۇقارالىق سانانى وزگەرتۋ ءۇشىن قوعام ءوزىنىڭ تاريحىنا ءمان بەرىپ، ونى دارىپتەپ، ايتۋلى وقيعالاردى ءبىلىپ وتىرۋى كەرەك. بۇگىنگى تاڭدا وبلىستىق كلينيكالىق اۋرۋحانا كەڭەسشى ەمحاناسى بار، شۇعىل كومەك كورسەتە الاتىن، وبلىستىڭ بارلىق تۇرعىندارىنا قولجەتىمدى، ناۋقاستاردى دارى-دارمەكپەن تەگىن قامتاماسىز ەتە الاتىن ەڭ ءىرى اۋرۋحانالاردىڭ ءبىرى. قازىرگى ۋاقىت تالابىنا ساي دەنساۋلىق ساقتاۋ سالاسىنا كوپتەگەن وزگەرىستەر مەن رەفورمالار ەنگىزىلۋدە، - دەدى باتىس قازاقستان وبلىسى اكىمىنىڭ ءبىرىنشى ورىنباسارى ارمان وتەعۇلوۆ قۇتتىقتاۋ سوزىندە. سونداي-اق ول «دەنساۋلىق» مەملەكەتتىك باعدارلاماسى اياسىندا وڭىردە اتقارىلىپ جاتىرعان ءبىرقاتار ىستەرگە، جەتىستىكتەرگە توقتالىپ ءوتتى. شارا بارىسىندا ارمان كارىم ۇلى حيرۋرگ-دارىگەر ەربول ەسەيەۆ پەن دارىگەر-ەپيدەميولوگ دينارا ءماجيتوۆاعا وبلىس اكىمىنىڭ «العىس حاتىن» تابىس ەتتى. وسى ورايدا ايتا كەتسەك، جالپى وبلىستىق دەنساۋلىق ساقتاۋ باسقارماسىنىڭ جۇمىسى نەگىزگى دەموگرافيالىق كورسەتكىشتەردىڭ جاقسارۋىمەن، وقىتۋ-كلينيكالىق ورتالىعىنىڭ قۇرىلۋىمەن، قالالىق جەدەل-جاردەم ستانسياسى بازاسىندا «سيمۋلياسيالىق ورتالىعىنىڭ» اشىلۋىمەن، وبلىس بويىنشا وڭالتۋ ەمىنىڭ دامۋىمەن، مەديسينالىق ۇيىمداردىڭ مەديسينالىق اقپاراتتىق جۇيەگە 100% قوسىلۋىمەن ەرەكشەلەنىپ كەلەدى. ال بيىل وبلىس بويىنشا 19 مەديسينالىق نىسان كۇردەلى جوندەۋدەن وتكەن ەدى.
سالتاناتتى شارا بارىسىندا وبلىستىق دەنساۋلىق ساقتاۋ باسقارماسى، قالا اكىمدىگى جانە اتالمىش اۋرۋحانا باسشىلىعى تاراپىنان مەديسينا سالاسىنىڭ بىرنەشە قىزمەتكەرى مەرەكەلىك توسبەلگى، سىي-سياپاتپەن ماراپاتتالدى. كەش ءوڭىر ونەرپازدارىنىڭ كونسەرتتىك باعدارلاماسىمەن ءورىلدى.
گۇلىم اقاپ،
باتىس قازاقستان وبلىسى
پىكىر قالدىرۋ