جۇرەك دەرتى - ءتۇرلى اۋرۋلاردىڭ اسقىنۋىنان نەمەسە جۇرەك جانە قان تامىر جۇيەسى قىزمەتى بۇزىلۋى مەن زاقىمدانۋىنان پايدا بولادى.

جۇرەك-قان تامىر اۋرۋلارى ەرەسەك ادامداردى نە مۇگەدەكتىككە شالدىقتىرادى نەمەسە ولىمگە اكەلىپ سوقتىرۋى دا مۇمكىن. وبلىستىق دەنساۋلىق ساقتاۋ باسقارماسىنىڭ باسشىسى قانات توسەكبايەۆتىڭ مالىمەتىنشە، اتالمىش دەرتپەن وڭىردە  بيىل 64613 ناۋقاس ديسپانسەرلىك ەسەپكە تىركەلگەن.  ولارعا وبلىستىق كارديولوگيالىق ورتالىعى مامانداندىرىلعان كارديولوگيالىق جانە جوعارى مامانداندىرىلعان كارديوحيرۋرگيالىق قىزمەت كورسەتىلۋدە. سونداي-اق ونىڭ ايتۋىنشا، وڭىردە ريەۆماتيزم، گيپەرتونيا، جۇرەك اقاۋلارى، جۇرەك دەمىكپەسى، ميوكارد ينفاركتى سەكىلدى جۇرەك اۋرۋلارىنىڭ تۇرلەرى ءجيى كەزدەسەدى ەكەن. 2012 جىلدان باستاپ وبلىس بويىنشا ماتەريالدىق-تەحنيكالىق بازامەن جابدىقتاۋدىڭ جاقسارۋىمەن،  ءجىتى كورونارلىق سيندروم الگوريتمى ەنگىزىلۋىمەن اتالمىش دەرتتەن ءولىم-جىتىم سانى ازايىپ كەلەدى. وبلىستىق كارديولوگيالىق ورتالىقتا اورتو-كورونارلىق شۋنتتاۋ، تۋا بىتكەن جۇرەك اقاۋلارىنا، جۇرە پايدا بولعان جۇرەك اقاۋلارىنا وتا جاساۋ، جۇرەككە ەلەكترو كارديوستيمۋلياتور ورناتۋ وتالارى جاسالىپ كەلەدى. اتالمىش وتالاردى جانايدار قازتۋعانوۆ، رۋسلان ايۋپوۆ، تالعات گۋسمانوۆ، اقىلبەك ەرمۇحانوۆ سەكىلدى بىلىكتى كارديولوگتار جاساۋدا. مامانداردىڭ ايتۋىنشا، ارتىق سالماق ياعني سەمىزدىك، جۇرەك- قان تامىرى اۋرۋلارىنىڭ، قانت ديابەتى جانە باسقا دا كۇردەلى اۋرۋلاردىڭ ءقاۋىپتى فاكتورى بولىپ تابىلادى ەكەن. سونداي-اق جۇرەك-قان تامىرى اۋرۋلارىن قوزدىراتىن تاعى ءبىر سەبەپ - كۇيزەلىس، تورىعۋ جاعدايلارى. ول ادامداردى جاسىنا قاراماي، جۇرەك تالماسىنا ۇشىراتۋى مۇمكىن. جالپى كوڭىل كۇيدىڭ تولقۋى، مازاسىزدانۋى، ادامنىڭ ميى ارقىلى بەرىلەدى. جاعىمسىز ەموسيالار ۆەگەتاتيۆتىك جۇيەنى قوزدىرادى، ودان بارىپ اعزاداعى قان اينالىمىنا، ىشكى ورگاندارعا، ەندوكريندىك بەزدەردىڭ قىزمەتىنە اسەر ەتەدى ەكەن. سونىڭ سالدارىنان اعزاداعى گورمونداردىڭ بالانسى بۇزىلادى. ونىڭ اسەرى جۇرەك سوعىسىنىڭ، ىرعاعىنىڭ بۇزىلۋىنا، قان قىسىمىنىڭ كوتەرىلۋىنە، بۇلشىق ەتتەردىڭ، قان تامىرلارىنىڭ تارتىلۋىنا اپارادى. ميدىڭ قان اينالىمى ناشارلايدى، ميدىڭ كلەتكالارىندا وتتەگى جەتىسپەۋشىلىگى پايدا بولادى. جۇرەكتىڭ، ميدىڭ قان تامىرلارىنىڭ قىسىلۋى ينفاركت، ينسۋلت سياقتى اۋىر جاعدايعا الىپ كەلۋى مۇمكىن، نەمەسە جۇرەكتىڭ يشەميالىق اۋرۋى، گيپەرتونيا، اسقازان جاراسى سەكىلدى سوزىلمالى اۋرۋلارعا ۇشىراتادى. سوندىقتان اق حالاتتى ابزال جانداردىڭ كەڭەسى بويىنشا، جۇرەك دەرتىنىڭ الدىن الۋ ءۇشىن سالاۋاتتى ءومىر سالتى مەن كوڭىل كۇيدى ءبىر قالىپتى 
ۇستانعان ءجون.

گۇلىم اقاپ،

باتىس قازاقستان وبلىسى