ەلىمىزدەگى دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىندا مەديسينالىق-دەموگرافيالىق احۋالعا وقىس جاعدايلاردان، جاراقاتتار مەن ۋلانۋلاردان جانە جول-كولىك وقيعالارىنان بولاتىن ءولىم-جىتىم تۋرالى ماسەلە كوتەرىلگەن بولاتىن. وسى ورايدا وبلىستىق كوپبەيىندى بالالار اۋرۋحاناسىنىڭ دارىگەر-تراۆماتولوگى بولات الىبايەۆتىڭ ايتۋىنشا، بالالار اراسىندا تۇرمىستىق جاراقات – ەڭ ءبىرىنشى ورىندا ەكەن.
-سودان كەيىن كوشەدەگى، مەكتەپتەگى، جول-كولىك جاراقاتتارى ورىن الادى. كوبىنە قاراۋسىز قالعان بالالار تۇرمىستىق ءار ءتۇرلى جاراقاتقا ۇشىرايدى. اتاپ ايتار بولساق، كۇيىك، ۋلانۋ، بيىكتىكتەن قۇلاۋ، ءار ءتۇرلى سىنىقتارمەن بالالار دارىگەر كومەگىنە جۇگىنەدى. وبلىستىق كوپبەيىندى بالالار اۋرۋحاناسىنا بىرنەشە بالا جاراقات الىپ تۇسەدى. سونىڭ ىشىندە اۋرۋحانادا 700-800-دەي بالا ءار ءتۇرلى جاراقاتتارىنا بايلانىستى ستاسيونارلىق ەم قابىلدايدى. وكىنىشكە وراي، جىل سايىن بالالاردىڭ جاراقات الۋ كورسەتكىشى ءوسىپ كەلەدى. سالىستىرمالى تۇردە قاراعاندا، بەس جاسقا دەيىنگى بالالار بالاباقشادا، لاگەردە بولعاندا ۇيدەگى بالاعا قاراعاندا از جاراقات الادى. ويتكەنى ولار تاربيەشىلەردىڭ قاتاڭ باقىلاۋىندا. سودان سوڭ حيميالىق كۇيىكتەرمەن دە بالالار اۋرۋحاناعا ءتۇسىپ جاتادى. سابيلەردىڭ مارگانسوۆكا، سىركە سۋىن ءىشىپ قويۋى، وكىنىشكە وراي، ورىن الىپ تۇراتىن جاعدايلار. بۇل دا اتا-انانىڭ سالعىرتتىعى،- دەيدى بولات الىبايەۆ.
ال دەنساۋلىق ساقتاۋ باسقارماسىنىڭ باسپا ءسوز قىزمەتىنە سۇيەنسەك، وبلىستا سوڭعى جەتى ايدا 3083 ءولىم-جىتىم تىركەلسە، ونىڭ 202ء-سى جاراقاتتار مەن ۋلانۋلاردان، 100ء-ى وز-وزىنە قول جۇمساۋدان، 32ء-سى جول-كولىك وقيعالارىنان، 31ء-ى ۇسىكتەن، 16-سى گازدان ۋلانسا، 27ء-سى سۋعا باتىپ كەتكەن. سونداي-اق وبلىستا جازاتايىم جاعدايلار ناتيجەسىندە جامباس جانە تىزە بۋىندارىن ەندوپروتەزدەۋ، ارتروسكوپيالىق وتالار جانە ومىرتقا جاراقاتى كەزىندە، تامىر حيرۋرگياسىندا رەكونسترۋكتيۆتى سەكىلدى جىلىنا 500-دەن استام جوعارىمامانداندىرىلعان وتالار جاسالىنادى.
گۇلىم اقاپ،
باتىس قازاقستان وبلىسى
پىكىر قالدىرۋ