ءبىر قولىنا فاست-فۋد ءونىمىن الىپ، ەكىنشىسىنە  «كوكا-كولاسى» مەن قىتىرلاق كارتوبىن (چيپسى)  ۇستاپ، كوشەدە قوماعايلانا اۋقاتتانىپ بارا جاتقان جاستاردى ءجيى كەزدەستىرەمىز. الايدا اتالمىش ونىمدەر شامادان تىس ارتىق سالماق قوسۋدىڭ كوزى ەكەنىن ءبىرى بىلسە، ەندى ءبىرى بىلە بەرمەس.

ەلىمىزدەگى  دەنساۋلىق ساقتاۋ سالاسىنا ەنگىزىلگەن «دەنساۋلىق» مەملەكەتتىك باعدارلاماسىنىڭ نەگىزگى ماقساتتارىنىڭ ءبىرى دۇرىس تاماقتانۋ مەن سالاۋاتتى ءومىر سالتىن ۇستانۋدى قالىپتاستىرىپ، سانيتاريالىق جانە دەنە مادەنيەتىن دامىتۋدىڭ نەگىزىندە حالىقتىڭ ءوز دەنساۋلىعى ءۇشىن جاۋاپكەرشىلىگىن ارتتىرۋ  ماسەلەسى بولاتىن.  باتىس قازاقستان وبلىسى دەنساۋلىق ساقتاۋ باسقارما باسشىسى قانات توسەكبايەۆتىڭ مالىمەتىنشە،  وڭىردە شامادان تىس ارتىق سالماق بويىنشا 154 ەرەسەك ادام، 19 ءجاسوسپىرىم، 197 بالا ديسپانسەرلىك ەسەپكە تىركەلگەن. 

-سەمىزدىكتەن ارىلۋدىڭ ءتيىمدى جولى – دۇرىس تۇزىلگەن تاماق راسيونى. ءمۇسىننىڭ ءمىنسىز، دەننىڭ ساۋ بولۋى ءۇشىن كۇندەلىكتى تۇتىناتىن تاعامعا تالعاممەن قاراعان ءجون. قۇرامىندا حولەستەرين، ماي، ءتۇرلى دامدەۋىشتەرى بار تاعامداردى ءجيى قولدانباعان دۇرىس. تاڭەرتەڭ مىندەتتى تۇردە بوتقا نەمەسە ىرىمشىك جەگەن دۇرىس. ال تۇسكى تاعامعا مىندەتتى تۇردە ىستىق تاماق پەن كوكونىس سالاتتارى بولعانى ابزال. جالپى ادام اعزاسىنىڭ تولىققاندى تىنىعۋى ءۇشىن كەشكى اس ءمازىرىنىڭ الاتىن ورنى ەرەكشە. كەشكى ساعات 19:00-دەن كەيىن تاماقتانباعان دۇرىس، ويتكەنى اعزا وسى ۋاقىتتان باستاپ باسەڭدەپ، دەمالۋعا ازىرلەنە باستايدى. ال كەشكى استى كەشىكتىرىپ تۇتىنساڭىز، ءتۇن ورتاسىنا دەيىن اس قورىتۋ ورگاندارى تىنىعۋدىڭ ورنىنا ىشكەن-جەگەندى قورىتۋمەن اينالىسادى دا، تۇتاستاي ءتاندى تىنىقتىرۋدىڭ ورنىنا تۇرالاتادى. سوندىقتان تۇندە ادام مازاسىز كۇي كەشىپ، تاڭەرتەڭ شارشاپ، ەنجار كۇيدە ويانادى. ەڭ دۇرىسى، از-ازدان كۇنىنە بەس رەت تاماقتانعان ءجون. تۇتىناتىن تاعام قۇرامىندا نەعۇرلىم كوكونىس ونىمدەرى، تابيعي سۋ، جەمىس-جيدەكتەر قورىنىڭ مول بولعانى جاقسى،- دەيدى وبلىستىق سالاۋاتتى ءومىر سالتىن قالىپتاستىرۋ ورتالىعىنىڭ مامانى ءمولدىر قۇرماشيەۆا.

وسى ورايدا دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرىنە سۇيەنسەك، الەم حالقىنىڭ 1/5 بولىگى نەمەسە 1،7 ملرد ادام ارتىق سالماقتىلار قاتارىنا جاتقىزىلاتىنىن ايتقان بولاتىن. بۇل توپتارداعى ادامداردىڭ 250 ميلليونى سوزىلمالى سەمىزدىك اۋرۋى مەن وعان قوسارلانا جۇرەتىن كەڭ تارالعان اۋرۋلارعا شالدىققان. سونداي-اق الەمدەگى مەزگىلىنەن بۇرىن بولاتىن ءاربىر ءۇشىنشى ءولىم-جىتىمنىڭ سەبەبى سەمىزدىك پەن ادامنىڭ از قيمىلداۋىنان تۋىندايتىن اۋرۋلارمەن بايلانىستى ەكەندىگى دالەلدەنگەن. 

گۇلىم اقاپ،

باتىس قازاقستان وبلىسى