باتىس قازاقستان  وبلىستىق  سالاۋاتتى  ءومىر  سالتىن قالىپتاستىرۋ  ورتالىعىنىڭ  دارىگەرى دانيا  ىسقاقوۆانىڭ ايتۋىنشا،  دەرت كوكتەم، جاز ايلارىندا كوبىرەك قوزادى ەكەن. سەبەبى بۇل مەزگىلدەردە كۇن ىسىعان سوڭ تاعامدار تەز بۇزىلىپ، دەرتتىڭ تۇرعىندار اراسىندا ءجيى تارالۋىنا ىقپال ەتۋدە.

جەدەل  ىشەك ينفەكسيالارى – بۇل باكتەريالار مەن  ۆيرۋستاردان پايدا بولىپ، بالالار مەن ەرەسەك ادامداردا ىشەك قىزمەتىنىڭ بۇزىلۋىمەن (ديارەيا) قاتار اعزانىڭ ۋلانۋىمەن  سيپاتتالاتىن جۇقپالى دەرت. وبلىستىق دەنساۋلىق ساقتاۋ سالاسىنىڭ ماماندارى  اتالمىش ىندەتتىڭ الدىن الۋ ءۇشىن ءتۇسىندىرۋ جۇمىستارىن جۇيەلى جۇرگىزىپ كەلەدى.  

وتكىر ىشەك اۋرۋلارى ادام اعزاسىنا اۋرۋ قوزدىرعىشتارىنىڭ تاماق، لاس سۋ، جۋىلماعان ىدىس جانە باسقا دا تۇرمىستىق زاتتار ارقىلى ءتۇسۋى ناتيجەسىندە پايدا بولادى.   دەرتتىڭ اسا ءقاۋىپتىسى دە  تاماق ارقىلى جۇعۋ جاعدايىندا. ال تۇرمىستىق جاناسۋ - جاس بالالاردىڭ، وقۋشىلاردىڭ وتكىر جۇقپالى ىشەك دەرتىمەن  ناۋقاستانۋىنىڭ  باستى سەبەبى بولماق. ماماننىڭ پىكىرىنشە، جۇقپالى ىشەك اۋرۋلارىمەن اۋىرماۋ ءۇشىن كەزدەيسوق ساۋدا ورىندارىنان تاعام ونىمدەرىن، ىستىق سۋسىندار ساتىپ الماعان ءجون. بازاردان  ءسۇت تاعامدارى مەن كوكونىستەردى الاردا ساقتىقپەن قاراپ، مەرزىمى وتكەن تاعامدى مۇلدەم تۇتىنباۋ قاجەت. سونداي-اق اس دايىنداۋ، ىدىس جۋۋ جانە اۋىز سۋ ءۇشىن اشىق سۋ كوزدەرىنەن، ارىقتاردان سۋدى پايدالانباعان ءلازىم. ونىڭ ايتۋىنشا، جۇقپالى ىشەك اۋرۋلارىنىڭ بىرنەشە ءتۇرى بولادى ەكەن. ولاردىڭ تۇرلەرىنە بايلانىستى كلينيكالىق بەلگىلەرى دە ءار قيلى. الايدا اۋرۋدىڭ  جەدەل باستالۋى، دەنە قىزۋىنىڭ كوتەرىلۋى، قۇسۋ، ءىش ءوتۋ، مازاسىزدانۋ، باس اۋرۋى، ءىشتىڭ، سونىڭ ىشىندە كىندىك اينالاسىنىڭ اۋىق-اۋىق ءبۇرىپ اۋرۋى – جۇقپالى ىشەك اۋرۋىنىڭ باستى بەلگىسى بولماق. ديارەيا مەن قۇسۋدىڭ سالدارىنان اعزا قۇرعاقشىلىققا ۇشىراپ، اسىرەسە سابيلەردىڭ ومىرىنە ءقاۋىپ ءتونۋى مۇمكىن.   سوندىقتان جۇقپالى جەدەل ىشەك اۋرۋىنىڭ العاشقى بەلگىلەرى باستالىسىمەن، دارىگەرگە قارالىپ، اۋرۋ اسقىنۋىنىڭ الدىن العان ءجون. 

 گۇلىم اقاپ،

باتىس قازاقستان وبلىسى