مەملەكەتتىك «دەنساۋلىق» باعدارلاماسىنىڭ باستى ماقساتى - حالىق دەنساۋلىعىن نىعايتۋ جانە قورعاۋ. وسى ورايدا ۇزدىك حالىقارالىق تاجىريبەگە سۇيەنسەك، دەنساۋلىق ساقتاۋ جۇيەسىن ودان ءارى دامىتۋدىڭ نەگىزى قوعامدىق دەنساۋلىق ساقتاۋ قىزمەتىن قۇرۋ بولماق. قوعامدىق دەنساۋلىق ساقتاۋدىڭ قىزمەتى مۇددەلى مەملەكەتتىك ورگاندارمەن ءوزارا ءىس-قيمىل نەگىزىندە كەڭەستەر بەرىپ، سالاۋاتتى ءومىر سالتىن ناسيحاتتاۋ جانە تۇرعىنداردى قورشاعان ورتانىڭ ءتۇرلى زياندى فاكتورلارىنان، دۇرىس تاماقتانباۋدان، جۇقپالى دەرتتەردەن ساقتاندىرۋ جانە الدىن الۋ بولىپ تابىلادى. وبلىستىق دەنساۋلىق ساقتاۋ ماماندارى ەسىرتكى، شىلىم سەكىلدى زياندى ادەتتەردەن اۋلاق بولۋ ماقساتىنداعى شارالارىن جۇيەلى جۇرگىزىپ كەلەدى. ايتا كەتسەك، وبلىس بويىنشا ەسىرتكىنى زالالدى تۇتىنۋمەن جانە وعان تاۋەلدىلىكپەن ناركولوگيالىق ەسەپتە 671 ناشاقور تۇرسا، ونىڭ ىشىندە 524ء-ى ديسپانسەرلىك ەسەپكە، 147ء-سى پروفيلاكتيكالىق ەسەپكە تىركەلگەن.
ەسىرتكىنىڭ «اۋىر» جانە «جەڭىل» بولىپ ءبولىنۋى – ونىڭ 1 گرامىنداعى ۋلى زاتتاردىڭ كولەمىنە بايلانىستى ەكەن. الايدا ەسىرتكىنىڭ از مولشەرى دە اعزانى ۋلاندىرادى. ادامنىڭ ويلاۋ قابىلەتى، ەستە ساقتاۋ قابىلەتى بىرتىندەپ كەمىپ، اشۋلانشاق جانە اگرەسسيۆتى بولادى. شەكتەن تىس قورقۋ سەزىمى پايدا بولادى. بەلگىلى ءبىر ۋاقىتتان كەيىن جەڭىل ەسىرتكى قاناعاتتىرماي، ادام ەسىرتكىنىڭ اۋىر تۇرىنە كوشەدى.
-ەسىرتكىمەن كۇرەستى ەڭ الدىمەن مەكتەپ قابىرعاسىنان باستاۋىمىز كەرەك. ەگەر بالا ونىڭ زيانى مەن ازابى تۋرالى حاباردار بولسا جانە ونىڭ دەرتىنىڭ اۋىر ماسەلە ەكەندىگىنە كوزىن جەتكىزە بىلسەك، سوندا عانا بالالارىمىزدى ساقتاندىرا الدىق دەۋىمىزگە بولادى. ارينە، ەسىرتكىنىڭ تارالۋ جولىنا وتە قاتاڭ تىيىم سالۋ مەن جازالاۋ جۇيەسىن قارسى قويۋعا بولادى. ءبىراق، قوعام مۇشەلەرى تۇرعىسىنان سۇرانىس بولعان جاعدايدا، ونى ءتىپتى ءولىم جازاسىمەن دە توسقاۋىلداي المايسىڭ. دەمەك، ەڭ الدىمەن سۇرانىستى ازايتۋىمىز كەرەك. بالانى تەك ۇركىتىپ-قورقىتپاي، ونىڭ سانالى تۇردە ەسىرتكىدەن باس تارتۋىنا جاعداي جاساۋ كەرەك،- دەيدى وبلىستىق سالاۋاتتى ءومىر سالتى ورتالىعىنىڭ مامانى ءمولدىر قۇرماشيەۆا.
گۇلىم اقاپ،
باتىس قازاقستان وبلىسى
پىكىر قالدىرۋ