الاش قاناتتاي ازاماتىنىڭ بارىنا ريزا. "قامشىدا" ونلايىن كونفەرەنسيادا بولعان ءۇش كۇندە قالىڭ وقىرمان سونى كورسەتتى. قاراپايىم جۇرت كوكەيلەرىندە جۇرگەن سۇراقتارىن ىرىككەن جوق. پورتالىمىزدىڭ كريليسا نۇسقاسى مەن توتە جازۋ بەتىندە قانات يسالم تۋرالى اقپاراتقا جالپى مىڭنان استام وقىرمان كوز جۇگىرتىپ، كوڭىل اۋداردى.
قازاق نامىسىنىڭ "قامشىگەرىنە" الداعى كۇنەدەردە الار اسۋى بيىك بولسىن دەگەن تىلەك ايتامىز!
Aرمان: اسسالاۋماعالەيكۋم، قانات. قازاق ەلى سىزگە ءارقاشان تىلەكتەس. دەگەنمەن، اقش-قا كەتەتىنىڭىز راس پا؟
- ءيا، اللا قالاسا جاقىندا كەتەمىن. نەگىزى «Astana Arlans» كومانداسىمەن ءبىر جىلعا عانا كەلىسىم-شارت جاسالعان. سوندىقتان بىلتىر ءازىربايجاندا وتكەن الەم چەمپيوناتىنا «Astana Arlans» قۇراما كومانداسىنىڭ مۇشەسى رەتىندە باراتىن بولعانمىن. چەمپيوناتتىڭ وتۋىنە ءبىر اپتا قالعان كەزدە قاتىسپايتىندىعىمدى بىلگەننەن كەيىن، كوماندادان كەتۋ ويدا بولدى. دەگەنمەن، جىگىتتەردىڭ وتىنىشىمەن قازىرگە دەيىن ءجۇردىم. ەندىگى جەردە كاسىپقوي بوكستان امەركيكادا دايىندالامىن. نەگىزى 2008 جىلدان بەرى ۇسىنىستار كوپ تۇسكەن. ءقازىر ءتيىستى قۇجاتتارىمدى دايىنداۋ ۇستىندەمىن. كەزىندە مارات مازىمبايەۆ دايىندالعان ماياميگە شامامەن ءبىر جىلعا بارماقپىن.
بۇلدىرگە: قانات باۋىرىم، جەڭىس تىلەيمىن! «ارلانداردىڭ» سوڭعى جەڭىلىسىنىڭ سىرى نە دە؟
– نەگىزى كومانداداعى ادام قاتەنى وزگەدەن ەمەس، وزىنەن ىزدەۋى كەرەك. ءبىز كەيدە انانى انانداي، مىنانى مىناداي دەپ باعالاماق بولامىز. بۇل جەردە بارلىعىمىزدىڭ جىبەرگەن قاتەلىگىمىز بەن كەمشىلىگىمىز بولدى. باستىعىمىزدان باستاپ جاتتىقتىرۋشىعا دەيىن، ودان قالسا بوكسشىلارعا دەيىن ءبىراز كەمشىلىكتەر جىبەردىك. نەگىزى مەنىڭ ويىمشا جاتتىقتىرۋشىلار مەن باسشىلار بوكسشىلارعا باسا نازار اۋدارۋى ءتيىس ەدى. تۇپتەپ كەلگەندە، استانا ارلاندارىندا مىقتى، كاسىبي دەڭگەيى جوعارى سپورتشىلار كوپ بولعانىمەن، ولاردىڭ بابىن جاتتىقتىرۋشىلار كەلىستىرە المادى.
نۇرعالي نۇرتاي: اسسالاۋماعالەيكۇم! قانات اعا! تۋعان جەرىڭىزدەگى قازاق قانداستارىمىزدىڭ اراسىنان ءالى سىزدەي تالانتتار كوپ شىعاتىنى انىق! ۇكىلەگەن ءۇمىتى ءسىز بولىپ جۇرگەن قىتايلار ءسىز اتا مەكەنىڭىزگە تارتىپ وتىرعاندا ارتتاعى قانداس باۋىرلارىڭىزدى دوداعا شىعارۋدى توقتاتىپتى دەپ ەستىدىك، ءسىز ەلگە كەلمەي تۇرىپ-اق قازاقتىڭ ماقتانىشىنا اينالاعان ازاماتسىز، اتا مەكەنگە ورالۋىڭىز ءبىراز باۋىرلارىڭىزدىڭ باعىن بايلاپ كەتكەن جوق پا؟
– بۇل جەردە بىرەۋدىڭ ءومىرى بىرەۋگە بايلانىپ قالعان ەشتەڭەسى جوق. ءبارى ءبىر اللانىڭ قولىندا. «كەلەم» دەگەن جىگىتتەردىڭ ءبىرازىن ەلگە اكەلۋگە اتسالىسىپ جاتىرمىز. كىتايدىڭ سپارتاكياداسىنا قاتىسىپ، سودان سوڭ كەلەم دەۋشىلەردە بار. بىرەۋدىڭ جولىن بىرەۋ ەشقاشان كەسە المايدى. سوندىقتان مۇنداي پىكىرمەن كەلىسە المايمىن. بالكىم، كەيبىرەۋلەرى ءبىر ەكى جارىسقا از بارعان شىعار. سول ءۇشىن جولى جابىلدى دەۋ قاتە.
KazakhBoy: قانات، سەنىڭ لوندون وليمپياداسىنا قاتىسا الماي قالۋىڭدا قانداي دا ءبىر سىرلار بار ما؟ وعان جۇڭگو ەلىنىڭ اسەرى بولدى ما، جوق الدە ءبىزدىڭ ءوز قازاعىمىز با؟
– لوندونعا بارا الماي قالۋىما تىكەلەي جۇڭگو ۇكىمەتىنە سەبەپشى بولدى. قازاقستانداعى جانكۇيەرلەرىم بارلىعى دەرلىك ءبىر كىسىدەي اتسالىستى. ەلباسىمىزعا عانا بارمادىق. قالعان لاۋازىمدى تۇلعالار وتىنىشتەرىن جازىپ، قولدارىن قويعاندارىن ءوز كوزىممەن كوردىم. ءقىتايدىڭ ىشىندە وزدەرىنىڭ زاڭى بار. «قىتايدىڭ قۇراماسىندا بولعاندارعا، وليمپياداعا قاتىسقاندارعا شەتەلگە شىعۋعا بولمايدى» دەپ قىزىل ءموردى تارس ەتكىزىپ باسقان. قىتايدىڭ 2012 جىلعى لوندون وليمپياداسىنا دايىنداعان سپورتشىلارىنىڭ ءبىرى مەن ەدىم. ءقازىر جۇڭگو قاتتى قوبالجۋلى. 2008 جىلى وليمپياداعا 10 بوكسشى جولداما السا، بيىل 6 سپورتشى عانا زورعا يەلەندى. سول التاۋىنىڭ ىشىندە بىرەۋى جۇلدە السا الادى، الماسا ولدا جوق.
ءبىرقازاق: قۇرمەتتى قانات ءيسلام ۇلى، تاريحي وتانعا ءبىر جولاتا كوشىپ بارۋدى قاي كەزدەن باستاپ ويعا الدىڭىز، قانداي بوگەتتەر بولدى؟ قازاق بوكسىنىڭ قازىرگى دەڭگەيى قانداي، بولاشاققا قانداي دايىندىقتار كەرەك؟ ءقازىر وتباسىڭىز تۋرالى، كەلىن تۋرالى ايتا كەتەسىڭ بە ؟
– ون ءبىر جاسىمنان باستاپ، ۇرىمجىدە ءجۇردىم. قازاقستاننىڭ بار ەكەنىن ەستيمىز، وتانىمىز بار ەكەنىن بىلەمىز. قازاقستانعا كەتۋ ويدا بولدى. دەگەنمەن، كوپ ۇلتتىڭ اسەرى مە، ەرەكشە نامىسشىل بولادى ەكەنسىڭ. ءوز ۇلتىمنىڭ جاعدايىن ويلاپ، قىتايداعى مارتەبەسىن كوتەرىپ كەتكىم كەلدى. 2004 جىلى قازاقستانعا كەتپەكشى بولعانمىن. ءبىراق، ءدال سول كەزدە جۇڭگو كۇراماسىندا ەدىم. كەتسەڭ «قاشقىن» اتاناتىنىڭ ءسوزسىز ەدى. باس-اياقسىز، ەل جۇرتتى ۋلاتىپ-شۋلاتىپ تاستاپ كەتۋ جىگىتتىككە جاتپايتىن نارسە. ال 2009 جىلى ۇستازىمنىڭ تىلەگىن جەرگە تاستاي المادىم. 2010 جىلدىڭ باسىنان ءتيىستى قۇجاتتاردى دايىنداپ، قازاقستانعا كەلدىم. بوگەتتەردىڭ بولۋى قالىپتى جاعداي.
مەنىڭشە، قازاق بوكسىنا ۇلكەن وزگەرىستەر ەنگىزۋ قاجەت. كوپتەگەن جاتتىقتىرۋشىلار كەڭەس داۋىرىندەگى قاتىپ قالعان قاعيدانى ۇستانادى. نەگىزى بۇل دۇرىس ەمەس. سپورت دەگەن مەديسينا سياقتى كۇندە دامىپ جاتىر. ەسكى قاعيدا مەن جاڭا ادىس-تاسىلدەر قاراما-قايشى كەلۋدە. وزگە ەلدەردەن تاجىريبە جيناقتاپ، ۇيرەنۋىمىز كەرەك. قۇر ايقايمەن ەشتەڭە ونبەيدى. سپورت مەديسيناسىن دامىتقانىمىز ءجون. جاستارىمىزدى شەتەلگە وقۋعا جىبەرىپ، شەبەرلىكتەرىن شىڭداۋعا ءتيىسپىز. سپورت مەديسيناسى دامىسا عانا، جاقسى كورسەتكىشتەرگە قول جەتكىزەمىز.
قۇدايعا شۇكىر، قازاقستانعا كەلىپ شاڭىراق كوتەردىك. مانسۇر دەگەن ۇلىم بار. كەلىننىڭ ەسىمىن ايتپاي-اق قويايىن.
كوزايا: اسسالاۋماعالەيكۋم، قانات اعا! ەستۋىمشە ءسىزدى لوندون وليمپياداسىنا قاتىسا المايتىن بولدى دەيدى. سوندا حالقارالىق دەنە-تاربيە ورىندارىنا پارا بەرىپ بولسا دا قاتىسۋىڭىزعا بولمادى ما؟
– ول جەردە پارا دەگەن اڭگىمە جۇرمەيدى. تۇگەل دەرلىك ساياسات دەر ەدىم. باسقالار تاس ساناسا، قىتايلار قۇم سانايدى. ولاردىڭ جۇرگىزەتىن يدەولوگياسى وتە كۇشتى. جۇڭگو قۇراماسىندا جۇرگەن كەزدە: «سەندەر تەك ەل ءۇشىن قىزمەت ەتۋلەرىڭ كەرەك. باعىپ-قاعىپ، تاربيەلەپ، وسىردىك. سوندىقتان سەندەردە ءبىرىنشى ورىندا تۇرمىس ەمەس، مەملەكەت تۇرۋى ءتيىس» دەيتىن. ەگەر مەن لوندونعا بارار بولسام، ونداعى كوپتەگەن لاۋازىمدى تۇلعالار ورىننان كەتەر ەدى. سوندىقتان جول بەرگەن جوق.
قازاق بوكسىندا پارا بەرەدى دەگەن اڭگىمەنى كوپ ەستيمىز. بۇل راس پا؟
– ەگەر اڭگىمەنىڭ جەتەگىنە كەتە بەرەر بولساڭ، شىندىقتان اداسىپ قالاسىڭ. ءوز باسىم بىرەۋدىڭ پارا بەرىپ جاتقانىن كورگەن ەمەسپىن.
قازاق: قانات سەن استانا ارلاندارى قۇرامىنا كىرگەندە ساعان قازاق ەلى ۇلكەن ءۇمىت ارتىپ ەدى. ءبىراق شىنى كەرەك جىرعاتپادىڭ. نە بولدى باپ كەلىسپەدى ما؟
– سىلتاۋ ايتساڭ، ايتار نارسە وتە كوپ. نەگىزى ادام ءوزىنىڭ كەمشىلىكتەرىن مويىنداۋ كەرەك. قانشا ۋاقىت بويى جاقسى ناتيجە كورسەتكەنىممەن، وزگە تۇگىل ءوزىمدى-وزىم ءالى كۇنگە تولىق تاني الماي جاتىرمىن. ءازىربايجانداعى چەمپيوناتقا دايىندالۋ بارىسىندا «Astana Arlans» كومانداسىنىڭ ءبىراز جاتتىعۋىنان قالىپ قويدىم. كىنا ىزدەۋ كەرەك بولسا وزىمنەن عانا ىزدەيمىن. اللا بۇيىرتسا، الدا ءالى دە جارىستار بولادى. سول جارىستاردا ءوزىمدى دالەلدەيمىن.
كازىعۇرت: اسسالاۋماعالەيكۋم، قانات اعا! قىتايداعى قانداستارىڭىزدىڭ جوعىن جوقتاعان كەزدەرىڭىز بولدى ما؟ جالپى، ورالماندار ماسەلەسىندە شەتتەگى كەشە ءوزىڭدى وسىرگەن ەلدىڭ مۇڭ-مۇقتاجىن اتاجۇرتقا ايتا الدىڭ با؟
– مەن ساياساتتا جۇرگەن جوقپىن. ءبىراق سپورت سالاسىندا جۇرگەن قازاقستانعا كەلگىسى كەلەتىن ازاماتتاردىڭ وتانىمىزعا ورالۋىنا ىقپال ەتسەم، اكەلە السام، سونىڭ ءوزى ۇلتىما تيتتەي دە بولسا تيگىزگەن پايدام. بولاشاقتا ومىرلىك جۇمىسىمنىڭ ءبىرى وسى بولار دەپ ويلايمىن. وكىنىشكە وراي، ورالمان دەگەندى قازاق جۇرتشىلىعى باسقا ۇلت رەتىندە قابىلداپ جاتىر. جاقسى كورەتىندەر دە، جاقتىرا بەرمەيتىندەر دە بار. قۇلدىق ساناسى باسىم كەيبىر ادامداردا ءوزىن-وزى جەك كورۋ، جان جاعىنا جالتاقتاۋ، باسقاعا ەلىكتەۋ سىندى سەزىمدەر بولادى. دەگەنمەن بىزدەر «ءوزىڭدى-وزىڭ جاتتاي سىيلا، جات جانىنا ءتۇڭىلسىن» دەگەن قاعيدانى ۇستانۋىمىز كەرەك. نەگىزى تەگى اسىل ازاماتتار قانداستارىن دۇرىس قابىلدايدى، «ارام قاندىلار» تەرىس قابىلدايدى دەپ تۇسىنەمىن. ال تۇپتەپ كەلگەندە ءبىر-بىرىمىزدى قور ساناۋ قازاقتى ماسقارالاۋمەن بىردەي.
تاتاتۋڭعا: اسسالاۋماگالەيكۋم، بوكستان باسقا قانداي ونەرگە قىرىڭىز بار؟
– بوكستان باسقا ونەرگە قىرىم بار دەپ ايتۋ قيىنداۋ. اۋىل شارۋاشىلىعىن سونىڭ ىشىندە مال شارۋاشىلىعىن جاقسى كورەمىن.
تولە: «ارلاندار» ساپىندا ونەر كورسەتتىڭىز، كەيدە تورەشىلەر جاعىنان ادىلەتسىزدىككە ۇشىراعان كەزدەرىڭىز بولدى. بۇل ارينە اركەز بولاتىن جاعداي. دەيتۇرعانمەن مەن بايقاسام ءسىز كوبىندە قارسىلاسىڭىزدى نوكاۋتپەن جەڭۋگە كۋلشىناسىز. ءبىراق قارسىلاسىڭىز ءادىسقوي نەمەسە مىقتى بولعاندا بۇل ءادىس كەرىسىنشە ءونىم بەرۋى مۇمكىن. بۇل تۋرالى نە دەيسىز؟
– اركىمنىڭ تەحنيكاسى ءارتۇرلى. قارسىلاستارىمدى ءارقاشاندا سىيلايمىن، باسسالىپ نوكاۋتقا تۇسىرەم دەپ ويلامايمىن. رينگتە سپورت، كۇش سىناسۋ سياقتى عانا ۇعىم بولادى. رينگتەگى جىگىتتەر بارلىعى ءبىر-بىر قويدىڭ قالجاسىن جەگەن جىگىتتەر. «انانى بىلاي قىلام، مىنانى بۇيتەم» دەگەنگە كەلە بەرمەيدى. سپورتتىڭ اتى سپورت.
ال ادىلەتسىزدىك تۋرالى ايتار بولسام، بوكسقا قادام باسقاننان بەرى ادىلەتسىزدىكتىڭ ءتۇر-تۇرىن كورىپ كەلە جاتىرمىن. «بيتكە وكپەلەپ، تونىڭدى يتكە تاستاما» دەمەكشى، جەڭىسكە نەمەسە جەڭىلىسكە بولا مويىمايمىن. ءبىر جەڭىسپەن اسپانعا ۇشىپ كەتە المايتىنىڭ سەكىلدى، جەڭىلگەنگە دە مويىنسال بولىپ جەرگە كىرىپ كەتپەۋ كەرەك. بۇل جىگىتتىككە سىن. جەڭىلسەڭ جەڭىسكە قاراي ۇمتىل، جەڭسەڭ تاعى دا جەڭۋگە ەڭبەك ەت! جەڭىس پەن جەڭىلىس ءومىردىڭ شىندىعى، زاڭى، تالابى.
استانادان: قانات، بوكستان كەيىنگى باعىت قالاي؟ ويلانىپ جۇرسىڭبە ول تۋرالى؟
– باستى نازارىمدا – ۇلتىمنىڭ تاعدىرى. كەلەشەككە جوسپار قۇرمايمىن. سپورتتان كەتسەم دە، كەلگىسى كەلگەن جىگىتتەردى قولدايمىن.
يمان: ءدىن تالاپتارىن، اللاھتىڭ پارىزدارىن قانشالىقتى ورىنداپ ءجۇرسىڭ؟
– ارعى اتالارىمىز ءدىندار كىسىلەر بولعان. قۇدايعا شۇكىر بەس پارىزدى ورىنداۋعا تىرىسىپ، بەس ۋاقىت نامازىمىزدى وقىپ ءجۇرمىن. نامازعا جىعىلعانىما 4-5 جىلدان استى. اكەم جەتى جاسىنان باستاپ ارابشا وقىعان.
ءبىر قىرسىق: قانات قالتالى اۋلەتتىڭ قىزىن الدى دەپ ەستىدىم، سول راس پا؟ سوسىن، باۋىرجان وسپانوۆ ناقتى قانداي كومەك كورسەتكەنىن بىلگىم كەلەدى؟
– اتاجۇرتىما العاش كەلە سالعاندا جالعىزسىراعانداي بولدىم. سودان ۇيلەنۋگە بەل بۋىپ، «ماعان جار كەرەك» دەپ باۋىرلارىما قولقا سالدىم. باستىسى اتا-اناسى ناماز وقيتىن مۇسىلماندار بولسىن دەگەن تىلەگىمدى ايتتىم. سودان 3-4 قىزبەن كەزدەسۋگە تۋرا كەلدى. اقىرى قازىرگى جارىممەن وتباسىن قۇردىم. ءبىرىنشى رەت كەزدەسكەندە كوڭىلىمە ۇناعاندىقتان، ەكىنشى جولى بىردەن قىزدىڭ اكەسىمەن جولىقتىم. ءۇشىنشى جولى قۇدا جاقتىڭ ماقۇلدىعىن الىپ، ۇيلەندىك.
باۋىرجان وسپانوۆ ماعان عانا ەمەس بۇكىل قازاققا قامقور بولا الاتىن ازامات. ول كىسى قارا باسىنىڭ قامىن ويلاپ جۇرگەندەردىڭ قاتارىنان ەمەس. وتانىن تاستاپ، شەتەلدە قاشىپ جۇرگەندەر بۇل كىسىنىڭ قولىنا سۋ قۇيماق تۇگىلى، اياعىن سۇرتۋگە دە جارامايدى.
قانات: قانات اللا ۇزاق عۇمىر بەرسىن. جۇدىرىعىڭ قارسىلاسىڭا شويىن بولىپ ءتيسىن. سەن دوداعا كىرگەندە ميلليون قازاقتىڭ ءبىرى رەتىندە تىنىسىمدى الماي،تاقىمىمدى قىسىپ وتىراتىن قازاقتىڭ ءبىرىمىن!!!! ارينە ءوز اقىلىڭ وزىڭە جەتەر جىگىتسىڭ عوي. دەگەنمەن، قولعاپتى شەگەگە ىلەتىن كەز جەتتى دەپ ويلامايسىڭ با؟(كۇشىم ازايدى-اۋ دەپ) ارلاندار ساپىندا بيىل شىنىمەن دە جاقسى ويىن ورنەگىن كورسەتە المادىڭ!!! كاپيتاندىقتان ەرتەرەك باس تارتۋىڭ كەرەك ەدى، امال نە؟! سەنگەنىمىز سەلگە كەتتى…مەنىڭشە وسىنداي ەلگە سىيىڭ تۇرعاندا ۇلكەن سپورتپەن قوش ايتىسقانىم ءجون-اۋ ەپ ويلامايسىڭ با؟
– ماڭدايىما جازىلعان بۇل دا ءبىر تاعدىر. مەن ەرتەڭ جەڭەتىنىمدى نەمەسە جەڭىلەتىندىگىمدى بىلمەيمىن. بىرەر جەڭىلىس ءۇشىن بوكسپەن قوشتاسار بولسام، مەن باستاماي جاتىپ-اق اياقتاپ تاستاپ كەتەر ەدىم. سپورتشىعا سىن كوتەرە الماۋ، جەڭىلىستىڭ اششى ءدامىن كوتەرمەۋ جاراسپايدى. ازىرگە بوكستى تاستامايمىن.
رۋشىل: قاي تۋعانسىن قانات؟
– قازاقپىن.
بەك: اسسالاۋماعالايكۋم، سىزگە اللا مەدەت بەرسىن! شاكىرت تاربيەلەيسىزبە؟
– شاكىرتتەردى ازىرگە اكەلىپ جاتىرمىن. بولاشاقتا تاربيەلەيتىن شىعارمىز. تۋعان اعام جاتتىقتىرۋشى بولعاننان كەيىن كەيبىر بوكسشىلاردى جارىستارعا قاتىستىرىپ جاتىرمىز. جاقىندا عانا ءبىر وقۋشىسى ءۇشىنشى ورىندى يەلەندى.
Zevs: بوكستى تاڭداعانىڭىزعا وكىنگەن كەزىڭىز بولدى ما؟ جەكە وتباسىڭىزدىڭ ومىرىنە ءقاۋىپ تونگەن كەز باسىڭىزدان ءوتتى مە؟ ايتا وتىرساڭىز
– بوكستى تاڭداعانىما وكىنگەن كەزىم بولعان جوق. وتباسىما ءقاۋىپ تونگەن كەز بولمادى. قۇداي ساقتاسىن!
ءدىنشىل: سوڭعى كەزدەرى بوكستا جولىڭىزدىڭ بولماي جۋرۋىنە كايىن جۇرتىڭىزدىڭ كاتىسى بار ما نەمەسە ءدىن جولىن قاتتى ۇستانىپ كەتكەن جوكسىز با؟
–ولاردىڭ مەنىڭ كاسىبىمە ەشقانداي قاتىسى جوق. العا قاراي جەتەلەمەسە، ارتقا تارتپايدى.
كازاقباي:توقال الۋ ويدا بار ما؟ قازاققا ءسىز سياقتى ازاماتتاردان كوپ ۇرپاك كەرەك كوي!
– قازىرگە ونداي وي جوق. كەلىنشەگىم ءوزى ون ۇل تاۋىپ بەرەمىن دەپ وتىر(كۇلىپ).
انار: مەن سىزگە عاشىكپىن، قانات اعا! قازاقتىڭ قانشا قىزىنا جار بولا الام دەپ ويلايسىز؟ شىن ايتام، تۇسىمدە ءجيى كورەم…
- قانشا قىزعا جار بولا الاتىنىمدى بىلمەيمىن. نيەتتەرىڭە راحمەت! اللا رازى بولسىن!
جالپى، مەن ماححاببات دەپ جۇرەر بولسام، بوكستى تاستاپ كەتۋگە تۋرا كەلەدى. ماححابات دەگەن ەكى جاستىڭ بىرى-بىرىنە دەگەن ادال سەزىمى مەن شىن قۇرمەتى جانە سىيلاستىعى. ءبىر جاتتىقتىرۋشىم: «ۇيلەنىپ بولعاننان كەيىن دە جاقسى كورىپ قالادى ەكەنسىڭ» دەۋشى ەدى. ءبىراق، ماحاببات تۇسىنىگىن ەر ازامات جىگىت رەتىندە دۇرىس قابىلداۋ كەرەك. انانى جاقسى كورەدى ەكەم دەپ اناعان، مىنانى سۇيەدى ەكەم دەپ مىناعان جۇگىرۋ دۇرىس ەمەس.
اسەن: لوندون وليمپياداسىنا قاتىسا الماعانىڭىزعا وكىنەسىز بە؟
– يا، وكىنەمىن. سوناۋ شەت ەلدەن ۇلكەن ماقساتتى كوزدەپ كەلگەندە ارمانىڭا ءبىر قادام جەتپەي قالعاندا قالاي وكىنبەسسىڭ؟!
بالبوتا: «استانا ارلاندىرىنىڭ» بولاشاعى بۇلىڭعىرلاۋ سياقتى. ەندىگى باعىتىڭىز قالاي بولادى؟
– «استانا ارلاندارىنىڭ» بارلىق جاتتىقتىرۋشىلارى جاڭالانۋ كەرەك دەپ ويلايمىن. سوندا عانا وڭ ناتيجە بولاتىن شىعار. ال كوماندادان كەتۋ دەگەن ماسەلە ءبىر جىل بۇرىن شەشىلگەن.
دۇيسەنالى شامەك: ءبىر ۇلتتىڭ وكىلى رەتىندە حالىقارالىق دوداعا ءتۇسۋ قانشالىقتى قيىن؟
– باستىسى كوپ ەڭبەك ەتۋ. سەبەبى ۇلتتىڭ نامىسىن ارقالاۋ وتە قيىن.
قابا قىرانى: قانات باۋىر، امانسىڭ با؟ قايدا جۇرسەڭدە امان بول! مەن ءوزىڭنىڭ تۋعان جەرىڭ قابا اۋدانىنان بولامىن. ءوزىڭدى كىشكەنە كەزىڭنەن كورىپ جۇرەمىن. سوندا قاباعا تۋىسشىلاپ كەلىپ تۇراسىڭ با؟ كەلىپ تۇرۋىڭدى شىن جۇرەكتەن تىلەيمىز.
– يا، بۇيىرتسا بارىپ تۇرامىن. ويتكەنى قابا مەنىڭ تۋعان جەرىم. قازىرگە جۇڭگو ەلى ول جاقتاعى ازاماتتىق تىركەۋىمنەن شىعارا قويعان جوق. ونىڭ ۇستىنە مۇندادا تىنىمسىز تىرلىك. تۋعان جەرگە قايىرىلماي كەتۋ مۇمكىن ەمەس. قۇداي قالاسا، سول جاقتاعى تۋىس-تۋعانداردىڭ جۇزدەرىن كورىپ، ءبىر ءشاي بەرىپ قايتۋ ويىمدا بار.
رىسگۇل: بوكسشىلاردىڭ ىشىندەگى جاقىن دوستارىڭىز كىمدەر؟ قاتارلاستارىڭىز دەگەندەي... كاسىبىڭىزدەگى يدەالىڭىز كىم؟ وقىرمانعا ايتار تىلەگىڭىز!
– مۇحتارحان دىلدابەكوۆ اعامنان باستاپ، قازاقستانداعى ءبىراز جىگىتتەرمەن اعا-باۋىرداي ارالاسامىن. ويتكەنى، ءبىز كوپتەگەن قيىنشلىقتاردى بىرگە وتكىزدىك. جەڭىپ قۋانعاندا، جەڭىلىپ قايعىرعاندا ءبىر-بىرىمىزدىڭ جانىمىزدا بولعانبىز.
مەنىڭ يدەالىم - بەيبىت شۇمەنوۆ. ودان باسقا مىقتى بوكسشىلار بار ەمەس پە دەپ جاتادى. وزگەنىكى بىزگە كەرەك ەمەس. الاش بالاسىن ۇلىقتاپ، ارداق تۇتا الماساق، ءبىزدى ەشكىم سىيلامايتىن بولادى.
باستاپ جاتقان جۇمىستارىڭىزعا ساتتىلىك تىلەيمىن. وقىرمانداردا اڭعارعان بولار، ەشكىم قارا باسىن ويلاپ، سايت اشقان جوق. كوزدەگەن ماقساتىمىز، ويعا العان بيىگىمىز – تەك قانا قازاقتىڭ مۇددەسى. بار قازاقتىڭ قامىن ويلايتىن ۇل-قىزدارىمىز كوبەيسە عانا بايقۋاتتى ەل بولا الامىز.
ازىرلەگەن رىسگۇل رامازانوۆا
پىكىر قالدىرۋ