وتكەن جۇمادا ساۋد ارابياسىنىڭ كورولى سالمان مەن تاتارستان پرەزيدەنتى رۋستام ميننيحانوۆتىڭ رەسمي كەزدەسۋى ءوتتى، دەپ جازادى Qamshy.kz اقپارات اگەنتتىگى. بۇل تۋرالى تاتارستان ءمۇفتيى كامىل حازرات ساميگۋللين ينستاگرامداعى پاراقشاسىنا جاريالادى.

ءوز كەزەگىندە مونارح رەسپۋبليكاعا قىزىعۋشىلىق تانىتىپ، اقپاندا ميننيحانوۆتىڭ  ساۋد ارابياسىنا كەلگەن ءساتىن ەسكە الدى. سول ساتتەگى كەزدەسۋدىڭ ناتيجەسىندە، رەسەيگە كەلۋ تۋرالى كەلىسىمگە قول قويىلعان. سالمان رەسەي مەن ساۋد ارابياسى كورولدىگىنىڭ اراسىنداعى قارىم-قاتىناستىڭ جاڭا پاراقشاسى اشىلعانىن ايتتى.

كۇن تارتىبىندە ءدىني ەكستەرميزم مەن حالىقارالىق تەرروريزم ماسەلەلەرى تۇردى.

تاتارستان پرەزيدەنتى ساۋديا مونارحىن ەلدىڭ ءدىني اياسىمەن تانىستىرىپ، رەسەيدەگى يسلام ءدىنىنىڭ دامۋ ماسەلەسىن ءسوز ەتتى. مۇسىلماندىق ينفراقۇرىلىم مەن بولگار يسلام اكادەمياسىنىڭ جايىن ءسوز ەتتى.

سونداي-اق «رەسەي – يسلام الەمى» وتىرىسىنىڭ الداعى جىلى ساۋد ارابياسىندا وتەتىنى كەزدەسۋ بارىسىنداعى باستى تاقىرىپتاردىڭ ءبىرى سانالدى. كورول اتالمىش ۇسىنىستى قۋانا قابىلداپ، كەلىسىمىن بەردى.