ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياسىندا قازاقستان رەسپۋبليكاسى ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسىنىڭ مىندەتىن اتقارۋشى ەرجان ەرسايىنوۆ، «دارا» قورىنىڭ پرەزيدەنتى ءمادينا باكييەۆا، «بالا وتباسىندا ءومىر ءسۇرۋى ءتيىس» جق جەتەكشىسى شولپان بايبولوۆا، پسيحولوگ جانە بالا اسىراپ الۋشى ەلەنا گەندريكسون، بالا اسىراپ الۋشى مارات قابىلبايەۆ جەتىم بالالاردىڭ ماسەلەسىن تالقىلادى. جيىن بارىسىندا ەرجان ەرسايىنوۆ «قازاقستاندا 27 مىڭ جەتىم جانە اتا-اناسىنىڭ قامقورلىعىنسىز قالعان بالا بار» دەدى. بۇل تۋرالى Qamshy.kz حابارلايدى.
«بۇل ەلىمىز بويىنشا جالپى بالا سانىنىڭ 0،5% قۇرايدى. ونىڭ ىشىندە 21 مىڭ بالا (75%) قازاقستاندىق ازاماتتاردىڭ قامقورلىعىمەن اسىراپ الىنسا، 6 مىڭنان استامى (25%) جەتىم جانە اتا-اناسىنىڭ قامقورلىعىنسىز قالعان بالالارعا ارنالعان 140 مەكەمەدە تاربيەلەنىپ جاتىر. مەملەكەت باسشىسىنىڭ تاپسىرمالارىن ورىنداۋ ماقساتىندا جەتىم بالالاردىڭ قۇقىقتارىن قورعاۋ سالاسىنداعى باسىم باعىتتار ۇيىمنىڭ وتباسىلىق فورمالارىنىڭ تاجىريبەسىن كەڭەيتۋدىڭ قۇقىقتىق تەتىكتەرىن ازىرلەۋگە باعىتتالعان»، - دەدى ەرجان ەرسايىنوۆ.
سونىمەن قاتار ول اتا-اناسىنىڭ قامقورلىعىنسىز قالعان بالالاردىڭ سانىن قىسقارتۋدىڭ وڭ ديناميكاسى بايقالاتىنىن باياندادى.
- ماسەلەن، 2014 جىلى ولاردىڭ سانى 6 مىڭنان اسسا، 2017 جىلدىڭ باسىندا بۇل كورسەتكىش 2 مىڭعا ازايعان. سوڭعى ەكى جىلدىڭ ىشىندە جەتىم بالالارعا ارنالعان مەكەمەلەردىڭ سانى 48-گە قىسقاردى (188-دەن 140 دەيىن). 4 مىڭنان استام بالالار ءۇيىنىڭ تاربيەلەنۋشىلەرى اسىراپ الۋدىڭ (626 بالا)، پاترونات (696 بالا)، قامقورلىققا الۋدىڭ (1145 بالا) جانە ءوز تۋعان اتا-اناسىنا (1862 بالا) قايتارىلۋىنىڭ ارقاسىندا وتباسىن تاپتى. سونىمەن قاتار، سوڭعى 10 جىلدا اتالمىش مەكەمەلەردىڭ تاربيەلەنۋشىلەرىنىڭ جالپى كونتينگەنتى 10000 بالاعا (2007 جىلعى 1 746-دان 2017 جىلى 7236-عا دەيىن) ازايدى. جىل سايىن ەلىمىزدە 900-دەن استام ەرلى-زايىپتى اتا-انا قۇقىعىنان ايىرىلادى، 3 مىڭنان استام ءبۇلدىرشىن بالالار ۇيىنە تۇسەدى، 6 مىڭعا جۋىق بالا بەيىمدەلۋ ورتالىقتارىنا، اتا-اناسىنىڭ قامقورلىعىنسىز قالعان بالالاردىڭ 40% ءبىلىم بەرۋ، دەنساۋلىق ساقتاۋ، الەۋمەتتىك دامۋ ورتالىقتارىنا ورنالاستىرىلادى. اسىراپ الۋدان باس تارتقاننان كەيىن بالانىڭ بالالار ۇيىنە قايتا ورالۋى سياقتى جاعدايلار دا ءجيى ورىن الادى،- دەدى سپيكەر.
پىكىر قالدىرۋ