بۇگىندە الەمدە سەكسۋالدىق زورلىق-زومبىلىقتىڭ قۇربانى بولعان ادامنىڭ سانىندا شەك جوق. كەي ادامدار باسىنان وتكەن قايعىلى جاعدايىن حالىقپەن، قوعاممەن ءبولىسۋدى ءجون كورەدى. الايدا كوبى ايتۋدان قىمسىنادى، جاسىرادى، سونىڭ سالدارىنان جالعىزدىقتا كۇن كەشەدى، پسيحولوگيالىق اۋىتقۋلارعا تاپ بولادى. الەمدىك ماسەلەگە اينالعان سەكسۋالدىق الىمساقتىقتان قۇتىلۋدىڭ جولى بۇگىنگە دەيىن تابىلماي كەلەدى. الايدا ونىڭ قۇربانى بولعان ادامداردىڭ ومىردەن تۇڭىلۋىنە بولمايتىنىن تۇسىندىرەتىن امالدار بار.
مەن ايتۋدان قورىقپايمىن...
امەريكالىق اكتريسا اليسسا ميلانو كەز كەلگەن ادام ءوزىنىڭ باسىنان وتكەن قايعىلى وقيعاسىمەن ءبولىسۋ ءۇشىن تۆيتتەر الەۋمەتتىك جەلىسىندە #MeToo (#مەندە) حەشتەگى ارقىلى فلەشموب جاريالادى. فلەشموب اقش پەن ۇلىبريتانيادا كەڭىنەن تارالدى.
بۇگىندە باتىستىڭ الەۋمەتتىك جەلىسى سەكسۋالدىق الىمساقتىق جايىن جارىسا جازىپ الەك. اڭگىمەنىڭ توركىنى گولليۆۋدتىق پروديۋسەر حارۆي ۆاينشتەينمەن بولعان وقيعادان باستالعان. بۇعان دەيىن پروديۋسەرگە بىرنەشە تانىمال اكتريسالاردى قورلادى دەگەن ايىپ تاعىلعان. ولاردىڭ قاتارىندا اندجەلينا دجولي مەن گۆينەت پەلتروۋ دا بار.
قورلعانعان قىزداردى قولداۋ ماقساتىندا اكتريسا اليسسا ميلانو اتالمىش فلەشموبتى باستادى. اكتريسانىڭ يدەياسى گولليۆۋدتان وزگە دە ايماقتارعا كەڭىنەن تاراپ، سەكسۋالدىق زورلىقتىڭ قۇربانى بولعان ايەلدەردىڭ ءوز قيىندىقتارى جايىندا #MeToo حەشتەگىن پايدالانۋ ارقىلى اشىق ايتۋىنا مۇمكىندىك تۋدى.
«ەگەر سىزگە سەكسۋالدىق كۇش كورسەتكەن بوسلا، #MeToo حەشتەگىن جاۋاپ رەتىندە جازىڭىز. قورلىق كورگەن قىزدار مەن ايەلدەردىڭ ءبارى جازاتىن بوسلا، الەمدىك ماسەلەنى كوتەرىپ، شەشىمىن تابۋعا بولادى»، - دەپ جازدى اليسسا ءوزىنىڭ تۆيتتەردەردەگى پاراقشاسىنا.
ونىڭ جازباسىنا 35 مىڭنان اسا ايەل جاۋاپ جازدى. اليسسانىڭ ءوزى زورلىقشىنىڭ قۇربانى بولعان ەدى.
كەيبىر ايەلدەر حەشتەگتىڭ استىنا كىشىگىرىم وقيعالارىن جازىپ جاتتى. ەڭ باستىسى ءار ايەل وزدەرىنىڭ جالعىز ەمەس ەكەندىگىن ءتۇسىندى.
«ول كەزدە مەنىڭ جاسىم 7-دە بولعان. باسقا ەشتەڭە ايتا المايمىن».
«مەن 8-دە ەدىم. بۇگىندە ءبىر ەركەكتىڭ قۇربانى بولماعان نەمەسە قورقىتپاعان ايەلدى تانىمايمىن».
«كوشەدە جالعىز ءوزى كەتىپ بارا جاتقان، بويى ۇرەيگە تولى قىزعا قارا دا، ءبارى جاقسى بولاتىنىن ءتۇسىندىر، جانىندا بول، قولدا».
ەر ادامدار دا قورلانادى...
ادەتتە، ءبىز «سەكسۋالدىق الىمساقتىق» جايىندا ءسوز قوزعاعاندا بىردەن ويىمىزعا قۇربان بولعان ايەلدەر ورالادى. الايدا ەر ادامدار دا سەكسۋالدىق زورلىقتىڭ قۇربانى بولىپ جاتادى. ولار بۇل جايلى ايتۋعا نامىستانىپ جاتادى. ال نازارلارىعڭىزعا باسىنان وتكەن سۇمدىق جاعدايلاردى حالىقپەن بولىسۋگە بەل بايلاعان باتىل ەر ادامداردىڭ فوتوسىن ۇسىنامىز
«جارالانباعاندار» جوباسى اياسىندا 2011 جىلعى تارالعان سۋرەتتەردىڭ اۆتورى – گرەيس براۋن. جوبا ماقساتى – زورلىق-زومبىلىقتىڭ قۇربانى تەك ايەلدەر عانا ەمەس، ەر ادامدار دا بولادى. گرەيس براۋن ەسىمدى سۋرەتشى ايەل زورلانعان ەر ادامدارمەن سويلەسىپ، كامەرا الدىندا باسىنان وتكەندەرىن قاعازعا جازىپ بەرۋىن ءوتىندى.
«مەنىمەن تايتالاسۋدىڭ قاجەتى جوق. سەن دە قالايسىڭ عوي مۇنى»، - دەدى ول. ول كەزدە مەنىڭ جاسىم 14-تە ەدى، ال ول 40-تا بولعان. «سەن ءۇنىڭدى شىعاراسىڭ، مەن سەنىڭ جانىڭدى شىعارامىن»، - دەدى. جاسىم 22-گە تولعاندا وتباسىما بار جاعدايدى ايتىپ بەردىم. باۋىرلارىمنىڭ دا ءدال وسىنداي جاعدايدى باستارىنان وتكەرگەنىن ءبىلدىم. مەن ءبارىن ايتىپ، كىشكەنە بولسا دا، جەڭىلدەپ قالعان ەدىم. ال ولار ىشىنە ساقتاپ جۇرگەن. سەبەبى ءبىزدى قورلاعان ءبىزدىڭ تۋىس اعامىز ەدى. ول جالعىزدىقتا، قايعىرىپ ومىردەن ءوتتى. ءوز وزىمە كەلىپ، بولعان جاعدايدىڭ ءبارىن ايتقانىم ءۇشىن، ومىرگە قايتادان كەلگەندەي بولدىم. ءتىرى ادام ەكەنىمدى سەزدىم».
«وسىنى ۋايىمدايسىڭ با ەندى؟» - دەدى ول ماعان. مەن ءاردايىم سول ءۇشىن ۋايىمدايتىن بولامىن، ءبىراق ول مەنىڭ مىنەزىمنىڭ كورسەتكىشى ەمەس».
«اينالا مۇلكىگەن تىنىشتىق. ول مەنى قورلاعاندا، جاسىم نەبارى 4-تە ەدى».
«ەندى سەن ەشكىمگە كەرەك ەمەسسىڭ. سەن بۇزىلعانسىڭ»، - دەدى زورلاۋشى».
ءتۇيىن...
جوعارىدا ايتىپ وتكەنىمىزدەي، بۇگىندە زورلىقشىنىڭ قۇربانى بولعان ايلەدەر مەن ەر ادامداردىڭ سانىندا شەك جوق. زورلىقشى جازالانار، وكىنىشتىسى ارەكەتىن جۇزەگە اسىرعان سوڭ عانا. ال زورلىق-زومبىلىققا تاپ بولعان ادامنىڭ جۇرەگىندە قارا داق ماڭگىگە قالىپ قويادى. قوعامنان الشاقتايدى، جالعىزدىقتا كۇن كەشەدى، قايعىسى دا، مۇڭى دا ىشىندە قالادى. قوعام بولىپ اتالمىش ارەكەتتىڭ قۇربانى بولعان ادامداردى قولداساق، ولار ءۇشىن دە جاڭا كۇن تۋار، ومىرگە قايتا ورالار...
