جۋىردا باتىس قازاقستان وبلىسى بيۋدجەتىنەن 15 ميلليون قارجى ءبولىنىپ،  تەلەمەتريكالىق كارديولوگيالىق كەشەن  ساتىپ الىندى. اتالمىش كەشەننىڭ ارقاسىندا وبلىس تۇرعىندارى وبلىستىق كارديولوگيالىق ورتالىققا  اياقتاي بارماي-اق، ەلەكترلى كارديوگراممالى تەكسەرىستەن  ءوتىپ،  سىرقاتىنا كەڭەس الا الادى. 

جۇرەك سوعىسىن قاشىقتىقتان باقىلايتىن قۇرىلعىنىڭ ماڭىزدى بولىگى وبلىستىق كارديولوگيالىق ورتالىقتا بولسا، باقىلايتىن جاناما اپپاراتتار بارلىق اۋداندىق، وبلىستىق جانە قالالىق اۋرۋحانا مەن جەتى قۇرىلعى قالالىق جەدەل جاردەم ستانسياسىندا ورنالاستىرىلعان.  وبلىستىق كارديولوگيالىق ورتالىقتاعى باستى اپپاراتتى كەزەكشى دارىگەرلەر تاۋلىك بويى قاداعالايدى. بۇل قۇرىلعى كارديولوگ-دارىگەردىڭ باقىلاۋىنسىز-اق جوعارى  دارەجەلى ەكگ تەكسەرىستەن وتكىزەدى. ياعني ناۋقاستىڭ جۇرەك سوعىسىن ارنايى اپپاراتقا ءتۇسىرىپ، ونى عالامتور ارقىلى وبلىستىق كارديولوگيالىق ورتالىققا جونەلتەدى.  

-قالاداعى جانە اۋداندارداعى اۋرۋحانالاردان كۇنىنە 4-5 ەكگ كەلىپ تۇسەدى. ءبىز سوعان قاراپ قورىتىندى جاساپ، دياگنوزىن قويامىز. سونداي-اق،  سالا ماماندارىمەن  ناۋقاستىڭ بولاشاقتا الاتىن ەمى تۋرالى اقىلداسامىز.  ەگەر دارىگەرلەر  ناۋقاستا  ميوكارد ينفاركت بەلگىلەرىن بايقاسا، ونىڭ  شۇعىل تۇردە كارديوورتالىققا جەتۋىن قاداعالايمىز. ەگەر ول جاقىن اۋدانداردا بولسا، جەدەل جاردەم كولىگىمەن، ال الىس اۋداندارداعىلار ساناۆياسيامەن جەتكىزىلەدى،- دەيدى وبلىستىق كارديولوگيالىق ورتالىقتىڭ ينتەنسيۆتى تەراپيا ءبولىم  مەڭگەرۋشىسى  جانايدار دوسقالييەۆ.

          سالا ماماندارى اتالمىش كارديو كەشەندى پايدالانعالى بەرى جۇرەك تالماسى ورىن العان  ناۋقاستارعا دەر كەزىندە كومەك كورسەتىلىپ جاتىرعانىن تىلگە تيەك ەتتى.   سونداي-اق ولار تۇرعىندارعا قان اينالىم جۇيەسىن رەتتەيتىن باستى مۇشە جۇرەككە سالماق سالماۋ قاجەتتىگىن ايتادى. ەگەر جۇرەك-قان تامىر جۇيەسىنە زاقىم كەلسە، ادامنىڭ ميى، كورۋ، ەستۋ مۇشەلەرى، ىشكى ورگاندارىنىڭ قىزمەتى بۇزىلادى ەكەن. سوندىقتان، سالاۋاتتى ءومىر سالتىن ۇستاپ، زياندى ادەتتەردەن اۋلاق بولىپ، كوتەرىڭكى كوڭىل كۇيمەن  ءجۇرۋ ماڭىزدى.

گۇلىم اقاپ

باتىس قازاقستان وبلىسى