«براك يلي برات» كينوسىنىڭ جابىق كورسەتىلىمى بولدى. Qamshy.kz اقپارات اگەنتتىگى ءجۋرناليسى دە جابىق كورسەتىلىمگە قاتىسىپ، وتاندىق ءفيلمدى تاماشالاپ قايتتى.

كومەديا 5 اعاسىنىڭ اسىرا قامقورلىعىنىڭ سالدارىنان تۇرمىس قۇرماي جۇرگەن قىز بەن ونىڭ عاشىعى تۋراسىندا. گاۋحارعا قۇلاي عاشىق بولعان ايدار گاۋحارمەن وتباسىن قۇرۋ ءۇشىن ونىڭ 5 اعاسىنىڭ كوڭىلىنەن شىعۋ ماقساتىندا ءتۇرلى قيىندىقتى باستان وتكەرەدى.

ءفيلمنىڭ رەجيسسەرى ەرنار نۇرعالييەۆ. رەجيسسەر كوبىنە كومەديا جانرىندا تۇسىرەدى. ال ءفيلمنىڭ باس پروديۋسەرى قۇرالاي انۋاربەكوۆا. باستى ءرولدى دە ءوزى سومدادى. اكتريسا بۇعان دەيىن  بىرنەشە فيلمدەردە بوي كورسەتكەن. كورەرمەن ونى اكتريسا رەتىندە جاقسى بىلەدى. ال پروديۋسەر قىزمەتى قۇرالاي ءۇشىن جاڭا تاجىريبە. ونىڭ ايتۋىنشا، ول اتالمىش ماماندىقتى مەڭگەرۋ ماقساتىندا جوو وقىدى. العان ءبىلىمى كادەگە جاراعانىنا قۇرالايدىڭ ءوزى دە ءدان ريزا.

جۋرناليستەردىڭ «پروديۋسەرلىك تالانتىڭىز بار دەپ ەسەپتەيسىز بە؟» دەگەن ساۋالىنا، پروديۋسەرلىك ءبىلىمى بار ەكەنىن ال تالانتىن حالىق باعالايتىنىن ايتادى.

قۇرالايدان بولەك باستى رولدە – داۋرەن سەرعازين، نۇرلان سابۋروۆ، تاۋەكەل ءمۇسلىم، ءابۋناسىر سەرىكوۆ، باۋىرجان قاپتاعاي، مۇرات بيسەنبين وينادى.

اتى اتالعان اكتەرلەردىڭ بارلىعى دەرلىك وتاندىق فيلمدەر مەن تەلە حيكايالاردا ءتۇرلى رولدەردى سومداپ جۇرگەن اكتەرلەر. ال نۇرلان سابۋروۆ  StandUp شوۋىنىڭ رەزيدەنتى.

كومەديا جانرىندا تۇسىرىلگەن فيلمدەگى گاۋحارعا عاشىق ۇشقىش جىگىتتىڭ ءرولىن تاۋەكەل ءمۇسلىم سومدادى. اكتەر كوپ ۋاقىتقا دەيىن اتالمىش رولگە كەلىسپەگەنىن ايتادى. فيلمدەگى وزىنە ۇنەمى ءسۇيسىنىپ جۇرەتىن سىمباتتى جىگىتتىڭ وبرازى حالىق اراسىنداعى تاۋەكەل تۋرالى پىكىرىمەن ۇقساس ەكەنىن جانە كورەرمەننىڭ بۇل پىكىرى فيلمنەن كەيىن بەكي تۇسەدى دەپ قورىققان اكتەر اتالمىش ءرولدى ويناۋدان ءۇزىلدى كەسىلدى باس تارتقان. فيلم رەجيسسەرى ەرنار نۇرعالييەۆتىڭ ءوزى حابارلاسىپ، كەلىسىمىن العان. تاۋەكەلدىڭ ايتۋىنشا، ەرنار ونىڭ ۇناتاتىن رەجيسسەرلەرىنىڭ ءبىرى. ءوز كەزەگىندە رەجيسسەر فيلمدەگى كەربەز جىگىتتىڭ رولىنە تاۋەكەلدەن وزگە اكتەر كەلمەيتىندەي كورىنگەنىن ايتادى.

جابىق كورسەتىلىمنەن كەيىن باسپا ءسوز ءماسليحاتى ءوتتى.