ايدوس پەن اقەركە قىز بەن جىگىت بولىپ جۇرگەندەرىنە ءبىراز جىل بولدى. ەكەۋى جايلى تانىستارى كورگەن سايىن  «جاراسىمدى جۇپ»، «قوس عاشىق» دەگەن سوزدەرمەن ولاردىڭ سەزىمىن ودان ءارى ۇشتاستىراتىن.

        اقەركە بيىل 18 جاسقا تولاتىن بويجەتكەن. بولاشاق ماماندىعى حورەوگراف. ءۇيى وقيتىن جەرىنەن الىس بولعاندىقتان، جاتاقحاناعا ورنالاسقان. اتا-اناسى كوز الدىندا ەمەس، ءبىر سوزبەن ايتقاندا ءوز ءومىرى ءوز قولىندا. ال، ايدوس بولسا جوعارعى وقۋ ورنىن ءتاماماداعان ءمۇعالىم. جاسى جيىرما ءتورت شاماسىنداعى سەرى جىگىت پاتەر جالداپ تۇرادى. اقەركە بىردە جاتاقحانانى تۇنەسە بىردە ايدوستىڭ پاتەرىن پانالايدى. ەكەۋى ەرلى-زايىپتى وتباسى رەتىندە ءومىر ءسۇردى. باسىندا وزدەرىنىڭ قانداي قاتەلىككە بوي الدىرىپ جۇرگەندەرىن سەزبەدى. ولار ءۇشىن ءاربىر تاڭ قۋانىشپەن اتتى. بىر-بىرىنە دەگەن سەزىم ودان ءارى ءورشىدى. ەكەۋى ءۇشىن بۇل كۇندەر ماڭگى جاسايتىنداي كورىندى...

      بىردە اقەركە ساباق ۇستىندە باسى اينالىپ، جەدەل جاردەممەن اۋداندىق اۋرۋحاناعا جەتكىزىلەدى. دارىگەر اياعىنىڭ اۋىر ەكەنىن، جاقىندا نارەستەلى بولاتىنىن ايتتى. ومىرىندە ەستىمەگەن جاڭالىققا بويجەتكەن نە جىلارىن، نە كۇلەرىن بىلمەي سىرەسىپ قالادى. بۇل جاڭالىق ايدوستىڭ مىنەزىن وزگەرتىپ جىبەرەدى. جاۋاپكەرشىلىك، ىستەگەن ءىسىن موينىمەن كوتەرگىسى كەلمەگەندىكتەن اقەركەنى قالالىق اۋرۋحاناعا جەتكىزەدى.

       «ءالى ەكەۋىمىز جاسپىز. باسىمىزدا باسپانادا جوق. سەن وقۋىڭدى بىتىرگەن جوقسىڭ. اتا- انامىزعا دا ايتقان ۇيات. ودانشا بالانى الدىرايىق» دەگەن وي تاستايدى ايدوس اقىلگويسىپ اقەركەگە. سودان ەكى ويلى اقەركە ۋزي-گە تۇسەدى. «بالانىڭ جۇرەك سوعىسى جاقسى، قوزعالۋى، دامۋى قالىپتى. نارەستەنىڭ جىنىسى – ۇل. مەرزىمى 18 اپتا. جاساندى تۇسىك جاساۋعا كەلمەيدى. ءوزمىزدىڭ دارىلەرىمىز بار. بوسانۋ ناتيجەسى ارقىلى بالاڭىزدى الامىز. ىستەيتىن جۇمىسىمەن الاتىن دارىلەردى ەسەپتەگەندە 45 مىڭ تەڭگە قاراجات كەتەتىنىن» دارىگەر ەكى جاسقا جەتكىزدى. ايدوس تەزدەتىپ بالادان قۇتىلۋدى ويلاۋ بارىسىندا، دوستارىنان اقشا سۇراپ دارىگەرگە ۇسىنادى.

        ءسويتىپ، ساپ-ساۋ بالانى 45 مىڭ تەڭگە ارقىلى بۇل دۇنيەدەن جوق قىلادى. اقەركەنىڭ بويىندا ەشقانداي اقاۋ بولماعاندىقتان، اۋرۋحانادان شىعارادى. قولىندا جۇرەك سوعىسى جوق نارەستە، ەستەن كەتپەيتىن قاتەلىك، قولىنان تۇك كەلمەيتىن قورقاق ايدوسپەن كولىككە وتىرىپ، زيرات باسىنا جول تارتتى.  بۇل وقيعادان كەيىن اقەركە مەن ايدوس ەكەۋىنىڭ ارالارى سۋىپ كەتتى.

      ايدوس جاۋاپكەرشىلىكتى سەزىنە المايتىن، دۇنيەنى ويلاتىن جىگىتتەر قاتارىنان تابىلدى. وسىنداي ەر ادامدار قوعامنىڭ بۇزىلۋىنا ۇلكەن ۇلەس قوسۋدا. قانشا قاتەلىكتى جىبەرسە دە، ۇياتتى بولعان قىزدىڭ بولاشاعىندا قايتادان انا بولۋ باقىتى جازىلا ما، بەلگىسىز...

ارداگۇل اسكەربەك