كەيبىر ادامدار ءوزى ومىرىندە بولعان كەز كەلگەن وقيعانى ەسىنە تۇسىرە الادى. ءسىزدىڭ ويىڭىزشا بۇل جاقسى قاسيەت پە جانە مۇنداي ادامدار قالاي ءومىر سۇرەدى ەكەن؟

بۇل تۋرالى BBC اگەنتتىگى جازادى.

«مەن ومىرگە كەلگەنىمە 1 اپتا بولعاندا، مەنى قىزىل ورامالعا وراپ جاتقىزعانى ەسىمدە»-دەيدى رەببەككا شەرروك.

مەنى انام قولعا العان كەزدە بىردەن سەزەتىنمىن، قالاي ەكەنىن بىلمەيمىن، ءبىراق ول مەن ءۇشىن ەڭ قىمبات ادام بولاتىن.

كوپ ادامدار وز-وزدەرىن شامامەن 4 جاسىنان باستاپ تاني باستايدى، ياعني وسىنداي جاستا ادەتتە ادامعا ەس كىرەدى. سوندىقتان شەرروكتىڭ اڭگىمەسى ونىڭ شىنايى جادىسىنا بايلانىستى ەمەس، ءجاي عانا فانتازياسى مەن قيالىنانا تۋىنداعان دەپ ويلاپ قالۋىڭىز مۇمكىن.

الايدا 27 جاستاعى اۆتسراليا تۇرعىنى رەبەككا شەرروكتىڭ جادىسى ەرەكشە قالىپتاسقان. دارىگەرلەر وعان «گيپەرتەميزيالىق سيندروم» دەگەن دياگنوز قويعان. بۇل دەگەنىمىز - اۆتوبيوگرافيالىق جادى.

مۇنداي سيندروم كەزىندە ادام ءوزىنىڭ ومىرىندە بولعان جايتتارعا بايلانىستى ناقتى اقپاراتتى ەسىندە ساقتاي الادى، ەسىنە تۇسىرە الادى.

ولار ەش قيىندىقسىز ناقتى ءبىر ۋاقىت ارالىعىندا نە ىستەگەنىن، قانداي كيىمدە بولعانىن، قاي جەردە بولعانىن ەسىنە تۇسىرە الادى. سونىمەن بىرگە، قوعامدىق ومىردەگى جاڭالىقتار مەن ءوزىنىڭ ومىرىندەگى وقيعالاردى ۆيدەوماگنيتافون ءتارىزدى جاڭعىرتىپ بەرە الادى.

شەرروك بالا كەزىندە بارلىق ادامدار مۇنداي قاسيەتكە يە دەپ ەسەپتەگەن. ءبىر كۇنى وعان اتا-اناسى حابارلاسىپ تەلەديداردان گيپەرتيميزيالىق سيندروممەن اۋىراتىن ادامدار تۋرالى باعدارلاما بولىپ جاتقانىن ايتادى. وسىدان كەيىن شەرروك عالىمدارعا حابارلاسىپ، 2013 جىلى وعان ءدال وسى دياگنوزدى قويعان.

بۇل سيندروم 2000-جىلداردىڭ باسىندا اشىلعان. ازىرگە بۇكىل الەمدە بۇل سيندروممەن اۋىراتىن 60 ادام بار.

عالىمداردىڭ پىكىرىنشە، مۇنداي ادامداردىڭ ميىنداعى ۇزاق جادى پروسەسىن رەتتەيتىن بولشەگى باسقالارعا قاراعاندا ۇلكەنىرەك جانە زاتتاردى ەستە ساقتاۋعا جاۋاپ بەرەتىن مي بولىگى دە جاقسى دامىعان.

الايدا، شەرروك دەپرەسسيا مەن الاڭداۋشىلىقتان زارداپ شەگەدى. ونىڭ «تىلسىم» جادى ونى ابىگەرگە سالادى. ۇيىقتاي المايتىن كەزدەرى دە ءجيى ورىن الادى. مىسالى، شەرروك بالا كەزىندەگى ءبىر ەستەلىگى ەسىنە تۇسەتىن بولسا نەمەسە وسىدان 3 جىل بۇرىن بولعان وقيعا ەسىنە تۇسسە، ءدال سول جاعدايدى باسىنان بىرەنشە رەت وتكىزگەندەي اسەردە بولادى. ياعني، مۇنداي جاعداي قاتتى شارشاتىپ، شاتاستىرادى.

شەرروك ءوزىنىڭ تۇستەرىن باسقارا الادى. سوندىقتان قورقىنىشتى تۇستەر ونى مازالامايدى.

قازىرگى كەزدە ول ەكى عىلىمي-زەرتتەۋشىلىك تاجىريبەلەرگە قاتىسىپ جاتىر.

ءومىرىنىڭ قىزىقتى، ناقتى ەستەلىكتەرىن ەسىنە ءتۇسىرىپ، جادىندا ساقتاي العانمەن، ونىڭ جادىندا جوق ءبىر عانا جاعداي، ەستەلىك بار- ول ونىڭ دۇنيەگە كەلگەن ءساتى.

«بۇل مەنىڭ جادىمدا جوق جالعىز عانا كۇن. ەسىمدە جوق جالعىز تۋعان كۇنىم»-دەيدى ول.

كەيدە ونىڭ جادى مەن ساناسى قايتالانا بەرەتىن پلاستينكا ءتارىزدى پروسەستى باستان كەشىرسە دە،  شەرروك ەشتەڭە وزگەرتكىسى كەلمەيتىنىن ايتادى.

«مەنىڭ ءاۋتيزمىم وزگەرىستەردى قالامايدى. بارلىعى وسىلاي قالا بەرسە كەن دەيمىن. تەك عانا وسى قاسيەتپەن ءومىر ءسۇرۋدىڭ تاىلدەرىن تاپقىم كەلەدى». «وسى رەبەككاعا ۇيرەنىپ قالدىم، وسىنداي قالىپتا قالا بەرەيىن»-دەيدى.