بەلگيالىق ريەلتور قازاقستان ۇكىمەتىنىڭ رەسمي وكىلى ساتىپ العان، قۇنى 65 ميلليون ەۋرو تۇراتىن پاتەردى كورسەتتى. بروكەر يگناس ميۋۆيسسەن Sputnik قازاقستان اگەنتتىگىنە بەرگەن سۇحباتىندا قازاقستاننىڭ اسا تانىمال ءارى باي تۇلعالارىمەن بۇرىن دا جۇمىس ىستەگەنىن ايتىپ بەرگەن، دەپ حابارلايدى Qamshy.kz اقپارات اگەنتتىگى.

"مەن جىلجىمايتىن مۇلىك سالاسىندا جۇمىس ىستەپ جۇرگەنىمە 20 جىل بولدى. باي ادامدارمەن قارىم-قاتىناسىم جاقسى، شىنى كەرەك، ماعان ءبارى سەنەتىندىكتەن، بەدەلىم جامان ەمەس. ءيا، قازاقستاننان بىرنەشە كليەنتىم بولدى. نەگىزىنەن پوستكەڭەستىك كەڭىستىكتە تۇراتىن ادامدارمەن جۇمىس ىستەيمىن. جالپى، قازاقستاندىقتار ەۋروپاعا ءجيى كەلە باستادى"، — دەيدى يگناس ميۋۆيسسەن.

ريەلتوردىڭ سوزىنە سۇيەنسەك، كليەنتتەردىڭ ءبارى بىردەي كىم ەكەنىن جاسىرمايدى، دەگەنمەن قازاقستاننىڭ بيلىك وكىلى پاتەردىڭ بۇرىنعى يەسىمەن قۇپيا تۇردە كەزدەسكەن. ميۋۆيسسەننىڭ ايتۋىنشا، ريەلتور ارقىلى پاتەر ساتىپ العان اداممەن ءقازىر بايلانىسۋ مۇمكىن ەمەس.

"مەنىڭ اتىمدى گۋگلعا جازىپ قاراساڭىز، بۇرىن جۇمىس ىستەگەن ادامداردى كورە الاسىز. ءبىراق كليەنتىمنىڭ اتىن قۇپيا تۇردە قالدىرعىسى كەلگەنىن قۇرمەتتەيمىن. بۇل ونىڭ ءوزى جانە وتباسى ءۇشىن ماڭىزدى. ساتىپ الۋشى مەن ساتۋشى اراسىندا كەزدەسۋدى ءوزىم ۇيىمداستىردىم. بىرنەشە ساعاتقا عانا سوزىلدى"، — دەپ اتاپ ءوتتى ميۋۆيسسەن.

ريەلتوردىڭ ايتۋىنشا، قازاقستاندىق پاتەرمەن بىرگە ءتورت كولىك ساتىپ الىپتى: كۇزەت قىزمەتى ءۇشىن ەكى Mercedes G، جەكە پايدالانۋعا ەكى Maybach تەمىر تۇلپارىن.

"بۇگىندە جۇرتشىلىق اقشاسىن بىردەڭەگە سالىپ، ينۆەستيسياسىن ساقتاۋ  جولدارىن قاراستىرادى. پاريج، جالپى ەۋروپا – بۇل ماقساتتا تاپتىرمايتىن جەر. جىلجىمايتىن مۇلىك كەرەمەت"، — دەپ پىكىرىمەن ءبولىستى ميۋۆيسسەن.

بۇدان بۇرىن حابارلانعانداي، قازاقستان بيلىك وكىلى فرانسيا استاناسىندا پاتەر ساتىپ العان. پاتەردە بەس جاتىن بولمە، SPA جانە تاعى باسقا ارنايى بولمەلەر بار.

ءسان سالتاناتتى ءۇي قالانىڭ باستى ساۋدا كوشەلەرى ورنالاسقان "التىن ءۇشبۇرىش" اۋدانىنداعى اۆەنيۋ مونتەندە، ەليسەي الاڭىنا جاقىن جەردە ورىن تەپكەن. تەرەزەدەن ايگىلى Plaza Athénée بەس جۇلدىزدى قوناق ءۇيى كورىنىپ تۇر.

"بۇرىنعى يەسى بىرنەشە پاتەردى قوسىپ، كەڭەيتكەن. ساتقان ادام ينتەرەردى جوندەۋگە 100 ميلليون ەۋرو جۇمساپتى. كۇزەت قىزمەتى ەكى جىلدان بەرى جۇمىس ىستەپ كەلەدى. پاتەر نەگىزىنەن دوستارىمەن كەزدەسىپ، باس قوسۋعا ارنالعان. قازاقستاندىق ساتىپ الۋشى مەنىڭ بەدەلىمدى جاقسى بىلەدى، سوندىقتان تەز ارادا كەلىسىم جاسادىق"، — دەدى يگناس ميۋۆيسسەن.