ءبارى توپىرلاپ، تەڭگەنىڭ ۇيىنە كىرىپ كەلگەندە، بۇلار ساسىپ قالدى. بايعۇس تەڭگە قوناق كەلەدى دەپ ويلاماپتى دا.
— كەلىڭدەر، تورلەتىڭدەر. ءقازىر عانا قۇران وقىپ ءبىتىپ ەم، — دەدى تەڭگە.
— قۇران؟ نە ءۇشىن؟ — دەدى قوناقتار.
— باياعىدا باقيلىق بولعان قاعاز ءبىر تەڭگەلىكتەن باستاپ قاعاز ءجۇز تەڭگەلىككە دەيىنگى باۋىرلارىمىزدىڭ قۇرمەتىنە... ايتا بەرسەم ءتىزىمى كوپ. بۇگىن سولاردىڭ تۋعان كۇنى عوي. قۇران باعىشتاپ دەگەندەي...
— دۇرىس...
— سەندەر رەسەيدىڭ ۆاليۋتاسى بولاسىڭدار ما؟ — دەدى ەۋرو تەڭگەگە قاراپ.
— جوق، نەگە ولاي دەيسىڭ؟
— ورىسشا جازۋلى تۇر.
— ەەە، — دەدى مىڭ تەڭگەلىك. — سەن مىنا بەتىمدى عانا كورىپ تۇر ەكەنسىڭ عوي. مىنە، مىنا بەتىمە قارا، قازاقشا جازىلعان، — دەپ ەكىنشى جاعىنا بۇرىلىپ جاتقان مىڭ تەڭگەلىك قاعاز وسى كەزدە عانا وزىنەن كىشىلەرگە بۇيرىق بەردى. — ءاي، نەعىپ وتىرسىڭدار؟ تۇرىڭدار، قوناق كۇتەيىك. بۇگىن تۋعان كۇنىمىز.
— مەن تويلامايمىن، — دەپ 20 000 تەڭگەلىك پەن 10 000 تەڭگەلىك تەرىس اينالدى.
— نەگە؟
— ءبىز 1993 جىلى جوق ەدىك. ياعني، بۇگىن مەنىڭ تۋعان كۇنىم ەمەس.
— ول كەزدە مەن دە جوق ەدىم، سوندا دا تويلاعالى جاتىرمىن عوي، — دەدى مىڭ تەڭگەلىك.
— مەن دە جوق ەدىم، — دەدى 2000 تەڭگەلىك.
— مەن دە جوق ەدىم، — دەدى 500 تەڭگەلىك.
— مەن دە جوق ەدىم، — دەدى 200 تەڭگەلىك.
قاعاز اقشالاردان ەشكىم قالماي، ءبارى ءبىر شەتكە ىسىرىلىپ كەتتى.
— ويباي، ەندى مىنا قوناقتاردى كىم كۇتەدى؟ — دەپ سارى باقىر ءجۇز تەڭگەلىك شارت ەتە قالدى.
— سەن كۇتەسىڭ. سەن 1993 جىلى بار ەدىڭ.
— جوق! ول كەزدە قاعاز ءجۇز تەڭگەلىك ەدى! مەن سياقتى تيىن ەمەس!

قازاق بانكنوتتارىنىڭ باسى بىرىكپەي-اق قويدى. شىنىمەن دە، 1993 جىلى 15 قاراشادا اينالىمعا شىققان بانكنوتتاردان ەشقايسىسى دا قالماپتى. ءبارى قۇنسىزدانىپ، ومىردەن ءوتىپ كەتكەن. ەندەشە نەسىنە جەتىسىپ تۋعان كۇن تويلايدى؟

تەڭگەنىڭ تۋعان كۇنى سولايشا اتالماي قالىپتى.

مىقتىبەك ورازتاي ۇلى