ق ر مادەنيەت جانە سپورت ءمينيسترى ارىستانبەك مۇحامەدي ۇلى جەتەكشى گولليۆۋد كينوكومپانيالارىنىڭ پروديۋسەرلەرىمەن ورتاق جوبالار بويىنشا ىنتىماقتاستىق ماسەلەلەرىن تالقىلادى دەپ حابارلايدى Qamshy.kz اقپارات اگەنتتىگى.  

قازاقستاندىق مادەنيەت ۆەدومستۆوسى باسشىسىمەن كەزدەسۋگە الەمدىك كينووندىرۋشىلەردىڭ تانىمال پروديۋسەرلەرى –  م. حيۋ (The Walt Disney Company)، ل. ۋلمان (NBC Universal)، گ. لي (CBS)، ۆ. مەندوزا (Paramount Pictures Corporation)، م. ۆالبرەحت (Warner Bros.)، د. روي (HBO) جينالدى. قازاقستان تاراپىنان سونداي-اق، قازاقستاننىڭ اقش-تاعى ەلشىسى ەرجان قازىحانوۆ جانە كينەماتوگرافيالىق ونەر مەن عىلىم اكادەمياسىنىڭ پرەزيدەنتى ايمان مۇساقوجايەۆا قاتىستى. بۇل قازاقستاننىڭ مادەنيەت سالاسىنداعى ۋاكىلەتتى ورگان باسشىلىعىنىڭ الەمنىڭ وزىق كينوكومپانيالارىمەن العاشقى كەزدەسۋى.

قازاقستاندىق سىنشىلاردىڭ پىكىرىنشە، تانىمال گولليۆۋد كومپانياسى باسشىلىعىمەن كەزدەسۋدىڭ ءوزى ساتتىلىك. الەمنىڭ ءىرى كينوكومپانيالارىمەن ىنتىماقتاستىق قازاقستاندىق كينووندىرىسكە الەمدىك دەڭگەيگە شىعىپ، ەلىمىزگە ينۆەستيسيالار مەن شەتەلدىك تۋريستەردىڭ جاڭا اعىنىن قامتاماسىز ەتپەك.

«بۇگىنگى تاڭدا كينو تەك ونەر ءتۇرى عانا ەمەس، سونىمەن قاتار، ەكونوميكا سالاسىنىڭ انىقتاۋىشى. ماسەلەن، «اۆاتار» ءفيلمى جارىققا شىققاندا، تۇسىرىلىمدەر جۇرگەن جاڭا زەلاندياعا الەمنىڭ تۇكپىر-تۇكپىرىنەن تۋريستەر كەلە باستادى. كەيبىر مەملەكەتتەر كينوقىزمەت كورسەتۋدى تابىس كوزىنە اينالدىرعان. ولار: ۆەنگريا، بولگاريا، كانادا سىندى مەملەكەتتەر، - دەدى مينيستر ارىستانبەك مۇحامەدي ۇلى.

مينيستر كانادادا ءتۇسىرىلىپ، باستى رولدە  لەوناردو دي كاپريو ويناعان «ءتىرى قالعان» ءفيلمىن مىسالعا كەلتىردى. مۇحامەدي ۇلىنىڭ پىكىرىنشە، الەمدىك دەڭگەيدەگى كينوكومپانيالاردىڭ وكىلدەرىن قازاقستاندىق تاراپتىڭ ۇسىنىستارى قىزىقتىرىپ وتىر. وسى ورايدا ناقتى قادامدارعا دا قول جەتكىزىلدى.    

باستى فاكتورلاردىڭ ءبىرى - قازاقستانداعى كينويندۋستريا دامۋىنىڭ بارلىق قىر-سىرلارىن قامتيتىن «كينو تۋرالى زاڭنىڭ» قابىلدانۋى بولماق.

«ماڭىزدى اسپەكتىلەردىڭ ءبىرى - قازاقستاننىڭ ساياسي تۇراقتىلىعى مەن ەلىمىزدەگى ۇلتارالىق كەلىسىم بولىپ تابىلادى. بۇل كومپانيالار ءوز ينتەللەكتۋالدىق جانە قارجىلىق مۇمكىدىكتەرىن تەك ساياسي تۇراقتى ەلدەرگە سالاتىندارى بەلگىلى. بۇل ورايدا قازاقستان ولار ءۇشىن وتە قولايلى»، - دەدى مادەنيەت جانە سپورت ءمينيسترى.

سونداي-اق، ارىستانبەك مۇحامەدي ۇلى ەكسپو-2017 حالىقارالىق كورمەسىنە الەمگە تانىمال ۇجىمداردى، اتاپ ايتقاندا «لا سكالا» تەاترىن شاقىرىپ، پلاسيدو دومينگونىڭ دۇنيە جۇزىندەگى ەڭ بەدەلدى «وپەراليا» حالىقارالىق جاس ۆوكاليستەر بايقاۋىن وتكىزگەندىگىمىزدى اتاپ ءوتتى.  قازاقستانعا ەسىمدەرى الەمگە ءماشھۇر ارتىستەر مەن مۋزىكانتتاردىڭ كەلگەندىگى ەلىمىزدىڭ الەمدەگى ابىرويىنىڭ وسكەندىگىن تاعى ءبىر دالەلدەي تۇسەدى. 

«ءبىزدىڭ ماقساتىمىز - قازاقستان كينويندۋسترياسىنىڭ الەمدىك كەڭىستىكتەگى ورنى جوعارى بولۋىن قامتاماسىز ەتۋ.  بۇل ەلباسى ءبىزدىڭ الدىمىزعا قويعان اتقارىلۋعا ءتيىستى ماڭىزدى تاپسىرما.

ءبىز امەريكالىق كورەرمەندەرگە «اناعا اپارار جول» ءفيلمىن ۇسىندىق. ونى بۇل جەردە ۇلكەن قىزىعۋشىلىقپەن قابىلدادى. قازاقستان كينوونەرى حالىقارالىق كينوفەستيۆالدەردە لايىقتى تانىستىرىلىپ، جوعارعى ماراپاتقا يە بولعاندىعىن قالايمىز» - دەپ قورىتىندىلادى مينيستر مۇحامەدي ۇلى.

ەستەرىڭىزگە سالا كەتەيىك، قازاقستان رەسپۋبليكاسى مادەنيەت جانە سپورت مينيسترلىگى الەمنىڭ جەتەكشى كينوكومپانيالارىمەن كينووندىرىس سالاسىندا ىنتىماقتاستىق تۋرالى كەلىسسوزدەر وتكىزگەن بولاتىن.  لوس-انجەلەسكە ءىسساپار جانە «رۋحاني جاڭعىرۋ» باعدارلاماسىن تانىستىرۋ اياسىندا مينيسترلىك قازاقستان رەسپۋبليكاسىنىڭ اقش-تاعى ەلشىلىگىمەن بىرلەسە  «Spirit of Great Steppe» شاراسىن وتكىزدى. بىرنەشە قازاقستاندىق فيلمدەردىڭ كورسەتىلىمى، سونداي-اق ق ر حالىق ءارتىسى ايمان مۇساقوجايەۆا، ديماش قۇدايبەرگەن جانە تاعى باسقا ونەر جۇلدىزدارىمەن كونسەرت بەرىلدى.