ۇيىقتاپ ءجۇرىپ وڭىندەگى سەكىلدى جۇرەتىندەر بار. الايدا بۇل ءسومنامبۋليزمنىڭ جالعىز ءتۇرى ەمەس.

بي-بي-سي كوررەسپوندەنتى ساللي ابرامس تۇسىندە نە ىستەپ نە قويعانىن بىلمەيتىن ادامنىڭ باستان وتكەرگەن وقيعاسىن باياندايدى.

سارا تومدى ورتاق دوستارىنىڭ ۇيىندە كەزدەستىردى. ەكەۋى ءبىر-بىرىن ءبىر كورگەننەن ۇناتىپ قالدى. سارا مەن توم كەزدەسىپ ءجۇردى. بارلىعى جاقسى ەدى. تەك ءبىر جاعداي ونى ەسەڭگىرەتىپ جىبەردى.

تۇندە توم سارانى جىنىستىق قاتىناسقا ماجبۇرلەمەكشى بولعان. ابىروي بولعاندا، سارا سىتىلىپ شىعىپ كەتە الدى.

ول تۇندەگى جاعداي تۋرالى ۇمىتىپ كەتتى. ءبىراق بىرنەشە ايدان كەيىن جاعداي قايتا قايتالاندى.

تاڭ ەرتەڭ سارا ايىرىلىساتىنىن ايتىپ، تۇندەگى جاعدايدى تومنىڭ ەسىنە سالعاندا توم نە ىستەگەنىنەن حابارسىز بولىپ شىقتى.

سارا نە ويلارىن دا بىلمەدى. توم ومىردە مۇلدە باسقا ادام ەدى. مەيىرىمدى، قامقور. ال تۇندە قۇددى ءبىر وعان باسقا ادامنىڭ جانى كىرىپ كەتكەندەي بولدى. سارا كوپ ويلانا كەلە توممەن تانىستىقتارىنىڭ باسىندا ول كوپ جىل بۇرىن بۇرىنعى سۇيىكتىسى كارەندى زورلاعانى ءۇشىن 7 جىل تۇرمەگە وتىرىپ شىققانىن ايتقانى ەسىنە ءتۇستى.  

سارا تومنىڭ باسقا دا تۇسىنىكسىز قىلىقتارىن ەسىنە ءتۇسىردى. توم ءتۇننىڭ ورتاسىندا جارتىلاي عانا كيىنىپ بەلگىسىز باعىتقا قاراي كەتىپ قالاتىن. تاڭ ەرتەڭ تۇندە بولعان جاعداي ەسىندە بولمايتىن.

سەكسومنيا

سارا تومدى دارىگەرگە كورىنۋگە كوندىردى. دارىگەر تومدى كلينيكالىق تەكسەرۋگە جىبەردى. ول ءتۇنى بويى باسىنا ورناتىلعان ءتۇرلى قۇرىلعىلارمەن ۇيىقتادى.

تەكسەرۋ ناتيجەسى بويىنشا، تومنىڭ ءبىر ۋاقىتتا ۇيىقتاپ جانە وياۋ جۇرەتىنى انىقتالدى. توم وتە سيرەك كەزدەسەتىن سەكسومانياعا شالدىققانى بەلگىلى بولدى.

«ونىڭ ەنسەفالوگرامماسىنان قىسقى ۋاقىتتاردا ۇيقى كەزەڭىن بىلدىرەتىن تولقىنداردا ىرعاقتى سىزىقتاردى بايقاۋعا بولادى. بۇل دەگەنىمىز سول سىزىقتار كەزدەسەتىن كەزەڭدە ول وياۋ جۇرەدى» دەپ ءتۇسىندىردى نەيرولوگ دارىگەر گاي لەشزينەر.

يەل ۋنيۆەرسيتەتىنىڭ پروفەسسورى مەير كريگەر تومنىڭ دەرتىن ءلۋناتيزمنىڭ ءبىر ءتۇرى ەكەنىن ايتادى. بۇل دەرتكە شالدىققان ادام ميىنىڭ ەستە ساقتاۋ، شەشىم قابىلداۋ جانە  دۇرىس ويلاۋ قابىلەتىنە جاۋاپ بەرەتىن بولىگى ۇيىقتاپ جاتادى. ال كورۋ، قيمىل، قوزعالىس جانە ەموسياعا جاۋاپ بەرەتىن بولىگى وياۋ بولادى. سوندىقتان ادام جۇرەدى، سويلەيدى، ءتىپتى اس ازىرلەي الادى. ءبىراق بۇل ۋاقىتتا وزىنە ەسەپ بەرە المايدى.

اتالمىش اۋرۋ تومدى اقتاپ شىعا الا ما؟ ازىرشە بەلگىسىز. ءبىراق توم وزىنە تاعىلعان ايىپتان اقتالىپ شىعامىن دەپ ۇمىتتەنەدى. ول وسى ۋاقىتقا دەيىن ادىلەتسىز تۇرمەگە وتىردىم دەپ ويلاعان.

«زورلاۋ ارەكەتى بولعان كەشتە تومنىڭ باسىنا ەلەكترودتار ورناتىلىپ تەكسەرىلمەگەندىكتەن تولىق سەنىممەن سەكسومانيانىڭ سالدارىنان قىزدى زورلادى ما جوق باسقا نيەتى بولعان بولماعانىن ناقتى ايتا المايمىز. سوت ونى كىنالى دەپ تاپتى عوي» دەيدى دارىگەر لەشزينەر.

دەگەنمەن ءۇمىت بار. سوڭعى جىلدارى ۇيىقتاپ جاتىپ قىلمىس جاساعانداردى اقتاپ شىققان جاعدايلار بولعان. ماسەلەن، تورونتودا ەر ادام ۇيىقتاپ جاتىپ، كولىككە وتىرىپ، ەنەسىنىڭ ۇيىنە بارىپ، ونى ولتىرگەن. سوت قىلمىس جاساعان ادامدى اقتاپ شىقتى.

وعان ۇقساس جاعداي اريزونادا دا بولدى. بىرنەشە جىل بۇرىن ەر ادام ءوز ايەلىن ولتىرگەن. ول مۇنى ادەيى ەمەس، ۇيىقتاپ جاتىپ جاساعانىن ايتقان. الايدا سوت ونى كىنالى دەپ تاپتى.

سەكسومانيادان ەمدەلۋگە بولا ما؟

تومعا قويىلعان دياگنوز سارانىڭ ەسەڭگىرەتىپ جىبەردى. سەبەبى ول وسى ۋاقىتقا دەيىن تومدى كىنالى ەمەس ەكەنىنە سەنىمدى بولعان.

«تۇندە قىلمىس جاساپ، تاڭ ەرتەڭ ەشتەڭە ەسىڭدە قالماعانى قيىن ەكەنى انىق. ول تۇندە نە ىستەگەنىن مۇلدە بىلمەيدى عوي» دەيدى سارا.

وكىنىشكە قاراي، اتالمىش اۋرۋدى ەمدەيتىن ەشقانداي ءادىس ازىرشە جوق. الايدا ونىڭ الدىن الۋعا بولادى.

دارىگەرلەر سەكسومانياعا شالدىققاندارعا وزگە ادامنىڭ دەنەسىن سەزبەۋى ءۇشىن كيىممەن ۇيىقتاۋعا كەڭەس بەرەدى. كۇيزەلىس، ىشىمدىك جانە دۇرىس ۇيىقتاماۋ دا اۋرۋدىڭ ۋشىعۋىنا اكەلەدى.

توم پسيحولوگيالىق ساۋلىعى ءۇشىن اتالعانداردىڭ بارلىعىنان باسىن اۋلاق ۇستاۋعا تىرىسادى. تومنىڭ ايتۋىنشا، بۇرىن ونداي جاعدايلار ايىنا ءبىر مارتە بولسا، ءقازىر بىرنەشە جىلدا ءبىر مارتە بولادى.