ينسۋلتتان كوز جۇمعان الماتىلىق 48 جاستاعى ەر ادام 3 ادامنىڭ ءومىرىن ۇزارتتى. مارقۇمنىڭ تۋىسقاندارى ونىڭ ىشكى ورگاندارىن مۇقتاجدارعا بەرۋگە كەلىسىم بەرگەن، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ. بۇل تۋرالى ا.سىزعانوۆ اتىنداعى ۇلتتىق عىلىمي حيرۋرگيالىق ورتالىقتىڭ باۋىر ترانسپلانتاسياسى جانە ۋرولوگيا ءبولىمىنىڭ مەڭگەرۋشىسى راۆيل يبراگيموۆ ايتتى.

10 قاراشادا 48 جاستاعى ەر ادام اۋرۋحانادا ينسۋلتتان كوز  جۇمعان. مارقۇمنىڭ ايەلى مەن تۋىستارى 2-3 ساعاتتىق كەڭەسۋدەن سوڭ ىشكى ورگاندارىن دونورلىققا بەرۋگە كەلىسىم بەرگەن. 2 بۇيرەك الماتىدا قالسا، جۇرەك استاناعا جونەلتىلدى. ا.سىزعانوۆ اتىنداعى ۇلتتىق عىلىمي حيرۋرگيالىق ورتالىقتىڭ باۋىر ترانسپلانتاسياسى جانە ۋرولوگيا ءبولىمىنىڭ مەڭگەرۋشىسى راۆيل يبراگيموۆ باستاعان كوماندا كۇردەلى وتاعا كىرىسىپ كەتتى.

«12-14 ساعات دايىندىققا كەتتى. مارقۇمنىڭ اعزاسىنان اناليز الىندى. تەكسەرگەن سوڭ 2 بۇيرەك، 1 جۇرەك الىندى. باۋىرىن المادىق، سەبەبى باۋىرىندا وزگەرىستەر بولدى. 1 تاۋلىك ىشىندە كەزەكتە تۇرعان ناۋقاستاردان دا اناليز الىنىپ، سايكەستىگى تەكسەرىلدى. ناتيجەسىندە 5 جىل گەمودياليز اپپاراتىنا تاڭىلعان 48 جاستاعى ەر ادامعا بۇيرەك اۋىستىرىلدى. سوسىن 1 جىل گەمودياليز اپپاراتىن جاعالاعان 34 جاستاعى جىگىتتىڭ بۇيرەگى اۋىستىرىلدى. ەكەۋى دە 3 اپتادان سوڭ شىقتى. دەنساۋلىقتارى جاقسى. گەمودياليز اپپاراتىن پايدالانبايدى. ال جۇرەگى استاناداعى پاسيەنتكە سالىندى. بۇل وقيعا دا جاقسىلىقپەن اياقتالدى»، — دەدى راۆيل يبراگيموۆ. 

رەسپۋبليكالىق ترانسپلانتاسيا ۇيلەستىرۋ ورتالىعىنىڭ مالىمەتىنشە، بۇگىنگى تاڭدا بۇيرەك اۋىستىرۋ كەزەگىندە 2779 ەرەسەك، 51 بالا تۇر. ال باۋىر اۋىستىرۋعا - 549 ەرەسەك، 9 بالا، جۇرەك اۋىستىرۋعا - 122 ەرەسەك، 16 بالا، وكپە اۋىستىرۋعا 11 ەرەسەك ادام كەزەك كۇتىپ تۇر. قازاقستاندا ەڭ العاش رەت بۇيرەك اۋىستىرۋ وتاسى 1979 جىلى جاسالعان. وسى ۋاقىتقا دەيىن ەلدە مىڭعا جۋىق وتا جاسالدى.