بۇگىن ءماجىلىس سپيكەرى نۇرلان ءنىعماتۋليننىڭ توراعالىعىمەن وتكەن پالاتانىڭ بيۋرو وتىرىسىندا الداعى جالپى وتىرىستىڭ كۇن ءتارتىبى ناقتىلاندى دەپ حابارلايدى Qamshy.kz اقپارات اگەنتتىگى. 

        وندا دەپۋتاتتار باستاماشى بولعان بالالاردىڭ دەنساۋلىعى مەن دامۋىنا زاردابىن تيگىزەتىن اقپاراتتان قورعاۋ تۋرالى زاڭ جوباسىن ىلەسپە تۇزەتۋلەرىمەن ءبىرىنشى وقىلىمدا قاراۋ ۇسىنىلعان.

        دەپۋتاتتىق زاڭ جوباسىنىڭ نەگىزگى مىندەتى - بالالاردى فيزيكالىق جانە پسيحيكالىق دەنساۋلىعىنا، يماندىلىق، رۋحاني، پسيحيكالىق، الەۋمەتتىك جاعىنان دامۋىنا زاردابىن تيگىزەتىن اقپاراتتان، ونىڭ ىشىندە زورلىق-زومبىلىق پەن قاتىگەزدىكتى، قوعامعا جات جانە قۇقىقبۇزۋشىلىق ارەكەتتى ناسيحاتتايتىن باسپا، دىبىس جانە دىبىس-بەينە ونىمدەرىن، ەلەكتروندىق جانە كومپيۋتەرلىك ويىنداردى تاراتۋدان قورعاۋدىڭ ۇيىمداستىرۋشىلىق-قۇقىقتىق تەتىكتەرى مەن زاڭنامالىق كەپىلدىكتەرىن ەنگىزۋ بولىپ تابىلادى. 

        سونىمەن بىرگە جالپى وتىرىسقا قازاقستان رەسپۋبليكاسىنىڭ ۇكىمەتى مەن رەسەي فەدەراسياسىنىڭ ۇكىمەتى اراسىنداعى «بايقوڭىر» عارىش ايلاعىنان ۇشىرۋ كەزىندە تاسىمالداعىش زىمىرانداردان بولىنەتىن بولىكتەردىڭ قۇلاۋ اۋدانى رەتىندە قازاقستان رەسپۋبليكاسىنىڭ اۋماعىنداعى جەر ۋچاسكەسىن بەرۋ جانە پايدالانۋ شارتتارى تۋرالى كەلىسىمدى راتيفيكاسيالاۋ تۋرالى» قازاقستان رەسپۋبليكاسى زاڭىنىڭ جوباسىمەن جۇمىستى جالعاستىرۋدى قاراۋ كوزدەلگەن.